بالعامية .. الحمدلله اللي اجت ع قدر هيك


بقلم/ محمد نافذ السوافيري

23- 8-2010

“قل لن يصيبنا إلا ما كتب الله لنا” .. قررت أن أتحدث اليوم بالعامية لأن صراخي وصراخ أمي وإخواني والأطفال في بيتنا عندما اشتعلت النار فيه من “ماتور الكهرباء” لتتسارع في التهام كل اشي قدامها .. حتى أبويا المسكين كان صاحب النصيب في الإصابة ولكن ربنا قدر ولطف والحمد لله – زي ما بقولوا الناس – أجت ع قدر هيك.

القصة وما فيها إنه الكهربا كانت قاطعة وهادي أس البلوة والمصيبة وجهزنا حالنا وعمال قاعدين ع السفرة بدنا نفطر مع أذان المغرب “الله أكبر .. الله أكبر” لسة بنسمي وما كملنا أكلنا إلا ماتور الكهربا صار ينتع يعني بدو يطفي ما فيه بنزين، قام الوالد الله يحفظه ويرعاه يشوف شو الدعوة.

كان ماتورنا ع باب الدار الخارجي من جوا، طفى الوالد هالماتور وبكل بساطة جاب قالون البنزين بعد ما كان الماتور شغال أكثر من 3 ساعات وربنا بيقدر كل الأمور جاب الحاج بربيش ومده في القالون والطرف الثاني في تنك البنزين للماتور ونفخ مشان يسحب بنزين للماتور وبالفعل وع سهوة وبعد صيام يوم طويل ومتعب فلت البربيش من طرف الماتور ولحظتها كان حامي فما كان إلا ما كتب الله والحمد لله شبت النار في الماتور والبنزين وفي الوالد، وضلت النار تشب مع وجود قالون البنزين.

وبعدها ما عرفنا شو نعمل النار زادت بشكل صار صعب نسيطر عليه فالتهمت النار ماتور الكهربا وقالون البنزين وماتور المية اللي كان قريب منهم وعداد المية كمان وقربت تدخل النار ع أنابيب غاز جوا الدار بعد ما التهمت كل ما في طريقها من أشياء.

ولكن ربنا ستر ومع صراخنا التمت كل حارتنا واتصلوا بالدفاع المدني وقبل ما يجي الدفاع المدني كانوا شباب وأولاد حارتنا طفوا النار بالمية وبكل اشي شافوا قدامهم، ياااااااااه كانت لحظات عصيبة ومرة وقاسية كل ما أتخيل المنظر بقول في نفسي “يا رب ما تخلي حد يشوف اللي شفناه” لأنه مع هذه اللحظات الإنسان ما بيقدر يسيطر على نفسه وبيصير زي المجنون مش عارف شو يعمل.

يعني الوالد والنار مشتعلة في ايديه ورجليه كان بيحاول يبعد أنابيب الغاز ويعبرها داخل الدار جوا لأنه بيعرف قديش حجم المصيبة اللي كانت راح تحل لو كانت النار وصلت للأنابيب المليانة بالغاز .. ولكن ربنا ستر وقدر ولطف والحمدلله.

رددوا الناس علينا مثل بقول “اللي بيشوف مصيبة غيره بتهون عليه مصيبته” وإحنا مؤمنين بهذا الأمر لأنه لما رحنا ع مستشفى الشفا وأخذنا الوالد كان مليان بالمحروقين، اللي محروق نصه واللي محروق كله مش باين إلا وجهه، يعني الشعب كله منيل ومغلوب على أمره، يعني القصة ما وقفت علينا لحالنا ولكن كنا فعلاً راح نكون ضحية للكهرباء وأزمتها .. يلا الناس بتموت من أجل قضية كبيرة وهامة مشان تدخل فيها الجنة وإحنا بنموت مشان قضية الكهرباء اللي صارت حديث الساعة بالنسبة للناس وقدروا الملاعين يشغلونا عن الأقصى والقدس والتهويد وأمور كتير ثانية وحصروا كل السياسة والاقتصاد والدين حتى في الكهرباء لأنه بعلمكم إذا الواحد صلى بالجامع وفش فيه كهربا بيروح ع البيت صارت مش فارقة معاه لأنه الدنيا شوب وفش مراوح .. الحمدلله إنه ربنا أحيانا مشان نموت فدى قضية محترمة تستحق التضحية من أجلها.. ودايما ستي وامي بيعلمونا دعاء حلو بيقول “اللهم أحسن خاتمتنا وجنبنا مصارع السوء” فعلاً يا رب أحسنها من خاتمة وأمتنا موتة مريحة.

أنا بديش أحكي كتير لأنه اللي بيشوف منظر الحريق غير عن اللي بيسمع عنه وبأكرر يا رب ما تفرجي بني آدم مسلم اللي شفناه .

بس حابب قبل ما أنهي أقول هالشغلة .. بعد ما الوالدة الله يحفظها ويرعاها شافت منظر الحريق وشافت الحروق اللي كانت بأطراف الوالد دعت دعوة قوية هزتني وتمنيت إنها ما تدعيها ولكنها خرجت قالت : “اللي تسبب في مصيبتنا ينحرق هو وبيته وأهله وما يلاقي حد يطفيهم” لعلمكم الحجة قلبها طيب وما بتتمنى سوء لحد لكنها معذورة والله بعد ما شافت اللي شافته، ولكن رديت عليها قلتلها يا امي لا تدعي على حد ربنا بيحاسب وبيجازي.

قالت وقربت الدمعة تنزل من عينها “يما انت مش شايف شو صار لنا .. حسبنا الله ونعم الوكيل” قلتلها أحسن كلمة قولتيها يما “حسبنا الله ونعم الوكيل على اللي كان السبب”.

وبالآخر .. زي ما قالوا الناس المال معوض والخسائر المادية مكلفة في هالوضع اللي مش تمام كتير، لكن بنقول الحمدلله إنه ربنا سلم كل الأهل وكانت إصابة الوالد متوسطة، وبنقول لكل واحد تسبب في قطع الكهربا اتقي الله واعرف انك مش راح تسلم من دعوة أم مقهورة ولا طفلة مذعورة ولا ختيارة مرعوبة.

Be Sociable, Share!

2 Responses to “بالعامية .. الحمدلله اللي اجت ع قدر هيك”

  1. yousef el hnawey >> قال:

    يعني بصرآحة مش عآرف شو آحكي ولا شو آتكلمــ

    ياعمي القصة صارت اكبر من قصة موتور كهربا واكبر من قطعة كهربا

    القصة صارت بدهم يغطو شي عن شي

    يعني بالعربي المفيد شغلونا بقصة المواتير والكهربا ورجعونا لخلفاتنا السياسية علشان يستفردو هما بمصالحهم الخاصة

    وبرجعوا بيضحكوا علينا وبقلولنا المشكلة عند فتح وحماس ,…… للأسف الشعب غاب عنو الرؤية وصار اعمي وهوة مفتح العنين علشان هيكـ انسو او ان ما قدرتو اتناسو الخلافات يلي بناتكم

    وفكرو بشي يجمع الطرفين بدل ما يفرقهم
    وحمدلله على سلامتكـ يا حج ابو يحيى انت والوالد والوالدة وكل الاهل … ومشكور على موضوعكـ,,,,,,,,,,,

  2. wedding dresses قال:

    Thank you for posting this article. I also plugged the show on Facebook, with mixed results from my friends. All I ask of people, whether they are familiar with homeopathy or not, is to watch my cheap wedding dress.

Leave a Reply

*
To prove you're a person (not a spam script), type the security word shown in the picture.
Anti-Spam Image

Powered by WP Hashcash