أبوكي يالتكنولوجيا

بواسطة , سبتمبر 29, 2009 3:44 ص

صحيت اليوم لقيت ستي مبسوطة، انبسطت صراحة على انبساطها وعلى وجها الصبوح

قلتهلها: الله يسعد صباحك شو اللي مخليك صاحية ومبسوطة اليوم لهالدرجة؟

قالت وهي مبتسمة: اليوم لعبت أتاري وانت عارف طول عمري بشوف أولادك بيلعبوا وبيكون نفسي ألعب معاهم.

قلتلها: يا ستي أولادي صغار كيف بدك تلعبي معهم أتاري؟ صعبة عليكي، وبعدين علشان تشبكي الأتاري قصة وفلم هندي.

قالت ستي: بسك عاد قلتلك لعبت أتاري – عصبت- بس أتاري غير شكل يا ريت كان موجود على ايام ابوك وعمامك وسيدك الله يرحمه.

هان بدكم الصراحة بلشت اضحك وفكرت ستي خرفت وقلت في نفسي العمر اله أحكامه، لكن شكلها ستي انتبهت علي ولقيتها فجأة تغيرت ملامحها

وقالتلي بشوية خبث: انا ما خرفت انا اليوم غسلت.

غسلتي؟؟!!!!! شو ؟ كيف وليش وعشان ايش؟ بلشت أخربط في الحكي

قلت: ليش تغسلي وين مراتي ووين امي كيف بيسيوبكي تقومي تغسلي وتشطفي وظهرك ينكسر وهما نايمين؟ وقمت بدي أعمل واسوي.

لقيت ستي ضحكت لحد ما خفت توقع ضبتها ومالت عليا وقالت: يا ابني هادا هو الأتاري اللي بحكيلك عنه، يا ابني كل الشغلة اني بحط الغسيل في الغسالة وبحط الصابون وهي بتعمل كل شي.

بدكم الصراحة انا انتبهت فجأة انو فعلا ما في غسيل وانو بمقارنة بسيطة بين كيف كانت تغسل ستي زمان وكيف بتغسل الستات اليوم فعلا غسيل اليوم أتاري

لكن السؤال اللي ما لقيت حد يجاوبني عليه هو ليش الستات اليوم لما بتغسل الواحدة منهم بتفضل نايمة في الفراش شي 10 ساعات وبتفضل تشكي يومين مع انو الغسالة هي اللي عملت كل شيء؟؟؟؟!!!!

بسكم عاد اي هادا كـــــــــــــلام؟؟؟؟؟؟!!!!!!!

Be Sociable, Share!

2 ردود على “أبوكي يالتكنولوجيا”

  1. همام قال:

    نسوان عصر التكنولوجيا فاضين اشغال وما وراهم غير الثرثرة عالفاضي والمليان. ما بيعملوا شي وبيقولوا انهم بيشتغلوا كثير، كيف لو كانوا عايشين في ايام ستي وستك؟ الله يستر من اللي جاي من تكنولوجيا جديدة.

  2. كلام قال:

    عزيزي همام شرفت كلام بمرورك فعلا الله يسترنا من تكنولوجيا العصر القادم

اترك رد

*
To prove you're a person (not a spam script), type the security word shown in the picture.
Anti-Spam Image

Powered by WP Hashcash