مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



أرشيف مارس 4th, 2020

مَوّال ..

مارس 4, 2020

حسّون بيغنّي عالشّجر موّال
طربان في زمن خربان ما بيدري شو هي الأحوال
مهي القصّه صارت معروفه للكل
ضاع الوطن وزادت المحن حصار ومهانه مع ذل
وما عاد في إشي جديد تينقال
اللي قبّع قبّع واللي ربّع ربّع
واللي بتجوز إمّي هو عمّي
والشّمس ما بتتغطّى بغُربال
الكل نايم نوم العوافي ما دام الكرش مليان والجيب دافي
واللبس فرنجي والحال برنجي وعال العال
لويش البُكا والزعيق
مهي المفاوضات ماشيه مع التّنسيق
وكل من صبر نال
والعجله من الشيطان
خطوه خطوه بالقيراط والميزان
وكبير السّيرك مثل الأراجوز صال وجال
في كل عُرس إلو قُرص
مثل رقّاصه مع خلخال
مهو أبو المفهوميّه حامل عكتافو القضيّه من أجيال
شكرا يا كبارنا منكم ممنون
بيكفي فشر وضحك على الذقون
الغلب صار عالقلب جبال
يا ناطرين الفرج وكل مين صبر
سوق الحلاوه جبر وتعب الحال
قول مية قرن أو ميتين تيبيض الديك ويولد التّيس عنزتين
وترقد المي في الكُربال
بهمّة الفهمانين
راح نرجع لورا ونوكل العلقم والشوك مع الخرا
إذا بقي الحال على هل مِنوال
وحسّون بيغني عالشجر موّال ..