زَعْموط ..

            سلامتِك يا ام صابر بِروح عنّك الشّر …= الله يسلمك يا ابو صابر وربّي ينجيّك من كل حظ عاثر…= يا ام صابر حالك هاليومين مِش عاجبني قامْطه راسك وما بتسألي عن جوزك ولا عن ناسك…= يا ابو صابر خلّيني في حالي لأنّك ما بتعرف شو الّي جرالي…= خير يا طير شو صارلِك يا حُرمه ولا تشغلي بالي لأنّك الغاليه عندي وكل حالي وراس مالي…= يا ابو صابر انا مَعْمولّي عمل والعمل محطوط في ابريق عتيق ومرمي في البحر لا هو طايش ولا غريق وبيجرفه الموج لبلاد الاغريق…= ومين قالّك هالكلام يا حرمنا المصون اي صدقيني قرّب عقلي يطق واصير مجنون…= يا ابو صابر هذا كلام الشّيخه ام عدنان الّي بتفك السّحر ومخاويه الجان…= طيّب لويش ما فكّت السّحر وخلّصْتي حالك من الحيره والقهر…= قال يا سيدي لازمها رِجل برغوث عزّابي وعُرف ديك أحمر على عنّابي وبخّور جاوي حتّى أبخّر كل تيابي وحافِر حمار مخطّط وقرن غزال منقّط…= الله يعوّض عليك يا ابو صابر المره ضرب عقلها ومستشفى المجانين بيلبقلها…= وقالت والّي عامله العمل جاره وقريبه وبتقول انها الك حبيبه وعامله كمان عمل إلك مربوط بْزَعموط محطوط فوق شجرة بلّوط  بيحرسه قرد اسود مسخوط…=  يا ام صابر لا تصدقي هذا الكلام واكيد هذي ام عدنان نصّابه والله يُقصف عُمرها وتطلع عليها دبّابه…= لا يا ابو صابر لا تغلط على ام عدنان بلاش يزعلوا منك الجان وتقول يا ليت الّي صار ما كان…= يا حرمه لا جان ولا بطيخ وبيتنجان كل القصّه وما فيها من أوّلها لتاليها انّك شويّه تعبانه وما بتهتمّي بنفسك ولأمورك نسيانه ، دايما قامطه راسك وبتشكي همّك وبتبكي وتحرقي في دمّك ، يا ام صابر الحياه حلوه وعيشيها ولا تقولي انا صِرت عجوز وما الي فيها…= يمكن يكون معك حق يا ابو صابر وانا بعترف انّي قصّرت بحق نفسي وبحقّك والذنب ذنبي ما هو ذنبك…= وإلك عليّ يا ام صابرغير أعوضك عن اللي فات وآخذك كل اسبوع على المنتزهات ونروح احلى رحلات نشم الهوا وصدقيني هذا الك احسن علاج ودوا ، وبلا فتّاحين ودجّالين وكلام خرافات ، وطق حكي في مجالس النّسوان الجاهلات ، وهالحين قومي البسي لحتى انروح  هالمشوار يا ست الحلوين والله الرّزاق والمُعين …..

Be Sociable, Share!

• 
•