مِشوارْ ..

بِتْقولْ الأخْبارْ  شدَّدوا الحِصارْ ، وأغْلَقوا الجِدارْ ، وهَدَموا  خيْمِهْ ودارْ
والشَّعْبْ تَحْتِ  الاحْتلالْ ، مْكبَّلْ بالتَّنْسيقْ  والأغْلالْ ، والقَهِرْ والنّارْ
بيْصيحْ مَذْبوحْ بيْجيبْ القرْشْ بِطْلوع الرّوحْ وشايِلْ الهَمْ عَكتافو قِنطارْ
وفي ناسْ واصْلينْ ،بْيِجْمَعوا المَلايينْ ،عِندْهُمْ قْصورْ مَعْ جَنّاتْ وأنْهارْ
وناسْ بِتْعاني مِن الألَمْ ، عيشِتْهُمْ مَرارْ وهَمْ وعَدَمْ ، وليْلْهُمْ ما إلو نْهارْ
وناسْ بارودِتْهُمْ كَلامْ  عاتبينْ عَلى الحُكّامْ والأيّامْ ، وبيْطَرْزو في الأشْعارْ
وناسْ بالحالْ راضيينْ ، مونِتْهُمْ الخُنوعْ وبِطاقِةْ التّموينْ ، وبيقولوا أقْدارْ
وناسْ بالْهُمْ فاضي ، بِيْقولوا مالْنا ومالَكْ يا قاضي ، مَهْما جَرى وصارْ
ليشْ تِرْضوا بالجوعْ ، والمَذلِّهْ والرُّكوعْ ، وطَريقْ العِزْ والحُرِّيِّهْ مشْوارْ
إرْفَعْ  راسَكْ ، شَدِّدْ باسَكْ ، إنْتِ  وناسَكْ ، يا إبْنِ الثّورَهْ  والأحْرارْ
إحْمي  أرْضَكْ ، هِيِّهْ  عرْضَكْ ، وصَلّي  فرْضَكْ ، لا تِتْرَدَّدْ  لا تِحْتارْ
إنْتِ وهيِّهْ ، وهِمِّهْ قوِيِّهْ ، نِمشي سَوِيِّهْ ، للحرِّيِّهْ ، وألفِ تحِيِّهْ للثّوارْ *

Be Sociable, Share!

• 
•