مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



حبّة فلافل ..

يوليو 11, 2015
0 views

          يعطيك العافيه يا أبو صابر …= الله يعافيكي لكن من وين بدها تجي العافيه والحاله تعبانه وغافيه …= بقول المثل يا رجّال من طلب العلا سهر الليالي ومن طلب العنب نكش الدّوالي ، لكن قولّي لويش شوال الحمُّص وبُكسة البصل وتنكة زيت القلي …=  يا غشيمه أنا قلت في عقل بالي لازم أرقص على النّغمه وأغيّر من أحوالي بدل ما أظل في العتمه ، علشان احنا شعب مناضل فلافلولحتّى الجميع يعمل النا حساب مثل غيرنا عملوا دوا من الكفته والكباب ، ولأن شعوب الأرض سابقتنا في الانجازات فأنا قرّرت أعمل أكبر حبّة فلافل لحتى تدخل موسوعة جنس ونرفع راسنا بين الامم ونصير بشر بدل ما احنا مثل الغنم ، ولاّ احنا مش قد المقام وشاطرين بس بالخطب وتطريز الكلام ، اي عليّ الجيره غير هالعَمله تخدم القضيّه اكثر من المؤتمرات وغير اتصير حديث كل الدّنيا وخاصه الخواجات …= يا عيني عليك يا أبو صابر قال حبّة فلافل لحتّى تعدّل البخت المايل ، اي قول يا رجّال لازم نتعلم ونفتح جامعات ونفتح مصانع ونطوّر الخدمات لحتى نصير متقدمين مثل الأمم والخواجات …= قال جامعات قال يا غشيمه الّي معهم شهادات جامعيّه قاعدين على القهاوي لا شغله ولا عمله وعلى قفا من ايشيل ، طول الوقت بدخنوا معسّل في الأراجيل ، مش لاقيين شغل وكثير منهم هاجروا لبرّا هرب من الفقر والعيشه المرّه …= معك حق يا أبو صابر في غياب المسؤوليه والتخطيط ضاعوا شبابنا في المقاهي والتفحيط أنا قايمه أنقع الحمّص وافرم البصل يمكن الحال يتغيّر ويعقد القمح سبل ، ونزرع بروح شبابنا العزيمه والأمل ، ونحترم الوقت والمسؤوليّه وحب العمل ، وبلاش النّوم ونقول شو ما حصل وصل .. !!

  نشرت في جريدة القدس بتاريخ 6/11/2015

Be Sociable, Share!


أضف تعليقك

*

*
To prove you're a person (not a spam script), type the security word shown in the picture.
Anti-Spam Image

Powered by WP Hashcash