مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bahlool@hotmail.com



أبو صابر ..

أبريل 22, 2015
0 views

  imagesCA0E928Cيا مستوره المنظر مُهم ولازم الناس يقولوا عني مرتَّب وفي كلامي فهمان ومأدّب ، علشان هيك لازم كل يوم ملابسي تكويهم وبالخزانه إتْرتبيهم ، وخصوصي الحطّه والشّروال لأن بتجي عليهم العين في أغلب  الأحوال ، وصدق المثل ومين قال كول الّي بيعجبك والبس شو بيعجب النّاس وأنا بعمل على هذا الأساس …= كلامك على العين والرّاس لكن يا رجّال طول عُمرك ما بتآمن بالمظهر وبتقول انّو الانسان قيمتو في الجوهر …= يا ستّي كُنت غلطان وأنا على قولي هذا ندمان  والشّاطر الّي بيتعلم من غيرو و بينجح في الامتحان وعلى شان أقفز لفوق وأصير من الأعيان لازم أعمل مثل أبو رضوان ، من يوم ما لبس الشّال والعبايه كِبرتْ معاه لِحكايه ، الله وكيلك صار مختار في الحاره وما ناقص غير يصير كبير للاماره ، وكل النّاس بتتناقل أخباره من الجار والجاره ، وحتّى صار إيْحل مشاكل النّاس  ويروح في العطوات ويقضي الحق والحُقّان ويرد حردانات ، مع انو غشيم حتى ما بيعرف يكتب اسمو ولا الواحد كيف رسمو ، وعمل لحاله ختم مع هيبه و صار يُصبغ ذقنه مع الشّيبه ، دنيا وفيها العجايب وأنا بلا قافيه مدعوم من أهلي والقرايب ، وبعرف اطق حكي مثل الأبو كاتو وبرقص على الحبل وبقلّد القرد في حركاتو والمثل بيقول – مين سَرى باع واشترى وبياكل مهلبيّه وبينام على فرشه طريّه  وبيقول كمان أكل العيش بيْحب الخفِّيّه على رأي خالتي مرضيّه ، يا ستّي في كتير ناس فهمانين لكنهم فقرا ومُعدمين ، وما في حد سامع كلامهم أو شكواهم وملامهم ، عصرنا عصر الفلوس والمظاهر وما يسبح في هالبحر الاّّ كُل حدق وشاطر ، والعمليّه عايزه تكتيك وتدبير ونُقطه على نُقطه بيتْملّى البير …= يا عيني عليك شو فهمان تقبر قلبي يا أبو صابر وان شا الله تصير من الأعيان  لحتى أقهر كل النّسوان …= أيوه لازم أصير والقضيّه مثل ما قلت بدها فهلوه وشويّة  تدبير ، الأول بسعى على المختره وبعديها لمجلس النوّاب وبعد المجلس للوزاره وبعدين رئيس للوزاره وبعديها شويّة دعم من الأعوان والحبايب والخلاّن لحتّى أصل للكرسي الكبير وكل شيئ بالتدبير والتزوير في بلاد العرب بِصير ، وانها لثوره حتى النّصر والتّحرير ..

نشرت في جريدة القدس بتاريخ 4/ 12/ 2015

Be Sociable, Share!


أضف تعليقك

*

*
To prove you're a person (not a spam script), type the security word shown in the picture.
Anti-Spam Image

Powered by WP Hashcash