مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



أرشيف مايو 7th, 2014

وُجهة نظر ..

مايو 7, 2014

           تستاهل يا أبو صابر لأنّك ما سمعت كلامي وقلت أنا بعرف خلاصي وبعمل الّلي في راسي … = خير يا ام صابرقولي الّلي على بالك وكمان زيدي في دلالك … =  يا أبو صابر هذا الشيخ أحمد زوج بنتك صبريّه عامل مشكله مع البنت حتى وصلت إنو يهدّدها بالطلاق935194_442033179220465_1009065171_n ونسي الّلي بينهم من عشره واتفاق … =  يا ام صابر أنا قلت هذا الزلمه شيخ وعندو دين وبخاف الله ربّ العالمين ، وأكيد بتكون معاملتو لزوجتو منيحه وما بيعمل كل يوم معها طوشه وفضيحه ، لكن أكيد بنتك عملت غلط كبير وناقصها شويّة مسايره وتدبير … =  القصّه وما فيها من أوّلها لتاليها لا مسايره ولا تدبير ولا رمت البنت حجر في البير ، وكمان لا غلط ولا ضرب بالزّلط  يا سيدي الموضوع ان الشيخ أحمد بيقول للبنت لازم تلبسي نقاب وتغطي وجهك قدّام القرايب والأغراب قال لحتّى تضمن الجنّه يوم لحساب ، والبنت رافضه وبتقول دخول الجنّه ما هو بالنقاب لكن بعمل الخير وكثرة الثواب  والحجاب بيكفي ووقعت بينهم وبين الحجاب والنقاب حتى صارت عيشة البنت شقا وعذاب ،  زوجها بيقول الرجال قوّامون على النساء ولازم تسمع كلامه وتمشي وراه ما هو قدّامُه ، والبنت بتقول النقاب ما هو فرض ولا اجباري وكان في السابق يلبسوه الجواري ولازم تحترم رايي ورغبتي واختياري ، يا أبو صابر الأفضل تحكي كلمتين مع زوجها وتِصْلح بينهم … =  شو بدّك أقول للشيخ أحمد أقول البنت معها حق وحضرتك غلطان وبدّك دق ، وبعدين يتهمني بالكفر وقلة الدين ويلعن سَنسفيلي مثل الشياطين ، خليني أنا بعيد عن هذا الموضوع وبشوف انّو كلامك انتي أكثر  مسموع ، يا ام صابر الافضل  روحي لعندهم وحاولي تقنعيه  أو تقنعيها حتّى تعود الميّه لمجاريها ، لا يا أبو صابر أنا ما بروح يعني بدّك الشيخ أحمد يقول لازم انتي يا مرت عمّي تلبسي نقاب كمان وبدل ما انحلها انعقدها وتكثر علينا الأحزان وأصير حكايه وسيرتي بين كلّ النسوان … =  يا عيني عليكي يا ام صابر وانتي في النقاب أي صدقيني غير تكوني مثل القمر لكن في آخر الشهر … =  يا أبو صابر أنا نَفَسي مخنوق من غير نقاب وبعدين وجه المرأه ما هو عوره اذا كان بوضعه الطبيعي ومقياس العفاف عند المرأه ما هو بالمظهر لكن بالسّلوك والجوهر ، والدّين يُسر ما هو عُسر وعدم لبس النقاب ما هو خروج عن الدّين ولا هو كُفر … =  الله يا ام صابر هذا انتي مخبّيه في قشورك ومعك حق لكن شو بدّك تقولي في الّلي عايز يقيم الدين في مالطه  وما بدّو يخلّي الأمور قالطه ، أنا بقول ان الدين موجود لكل زمان ومكان  وفي هذا الوقت المرأه بتخرج للعمل وبتسوق سيارات وبتشتغل على الماكينات وبتشارك الرجل في مسؤوليات الحياه كيف بدها اتقوم بهذي الامور بشكل صحيح وهي لابسه نقاب ، ويمكن ايقول كمان لازم  تلبس قُبقاب  ،والافضل ان نعطي كل انسانه حرية الاختيار دون ضغط او تهديد او إجبار ، وكمان  ايكون هذا ضمن الاصول  وما نعقد الّأمور ونعمل من القطران مَعمول …