مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



أرشيف نوفمبر 5th, 2013

صبريّه 1

نوفمبر 5, 2013

64529.imgcache           يا ام صابر المثل بيقول الغالي غلّيه والرخيص روح وخلّيه ، واللي بيعرض بضاعتُه في السّوق بيرخص سعرها وبقلل من قدرها … – لكن يا أبو صابر بنتنا صبريّه ما هي بضاعه ولا فُستان معلق في الشماعه ، والمثل بيقول كمان اللي مش عايز يجوّز بنتُه بغلّي مهرها لحتّى تصير عانس ويزيد من قهرها … – أنا عارفِك طول عُمرِك غشيمه وما عندِك بُعد نظر وبتخلطي بين الفقّوس والجزر ، بنتي صبريّه ما في مثلها وأنا عايز اللي بيعرف قدرها لأن الغالي سعرُه فيه ، والناس بتحطّه على الراس وبتعليه ، انتي بتعرفي انها صبريّه مزيونه ومثل الجوهره المكنونه ، واللي ما بيقدر على الحمل بلاش ايشيل ، ويعمل قبضاي ويغنّي للناس عتابا ومواويل ، صبريه بنت متعلمه وبتعرف تقرا وتكتب ما هي مثلك ما بتعرفي الألف من العصا ولا الجوهر من الحصى … – الله يخليك يا أبو صابرلا تفقّع في قلبي وتحط الشوك في دربي ، بيكفي صبري عليك وطول غُلبي ، خطيّة البنت في رقبتك والرحمه في هل أيام مطلوبه ، لأن الحاله تعبانه والدنيا مقلوبه ، بعدين لازم تشاورها وتشوف رايها في الموضوع ولاّ كلامها كمان مش مسموع … – يا فهمانه أنا أبوها وولي أمرها ، وبعمل لمصلحتها حتّى لو طال صبرها ، وأنا ما بشاور البنات وما بسمع كلام الستّات ، وبعمل اللي في راسي وبعرف خلاصي ، أنا بعرف قيمة بنتي منيح وبحكيها بالعربي الفصيح أيْ عليّ الجيره بتعمل قلاّيه وطبيخ ما في مثلهم حتّى في المريخ ، وبنت بيت فهمانه ، لا بتعرف فيس بوك ولا بليفونات ولا مُسلسلات ولا فلانه وعلاّنه ، وكمان حلوه مثل فلقة القمر ومثل زهر الرّبيع اذا حضر ، يعني شو فيها اذا طلبت شقّه للسكن وثلاث مية غرام ذهب وغرفه صالون مع سجّاد وكنب ، وغرفة نوم مع تخت هزّاز للمعلوم ويكون خمس نجوم ، وعفش بيت مع مطبخ وموكيت ، وكسوه مع بدلات لزوم البيت والسهرات ، وخمس آلاف دينار مقدّم وكمان خمس آلاف مأخّر ، لحتى يعملوا للبنت مقدار وإلنا قيمه واعتبار ، وحفله في قاعه كبيره على شان نعزم الأهل وكل الديره ، يا ام صابر اللي بتعب بالشيئ بقدّر قيمته ومقدارُه وبحافظ عليه بكل عزيمته وإصرارُه ، أي صدقيني اذا بتْساهل في الأمور غير يحصل المحظور وكل ما نط الكوز في الجرّه غير ايبهدلها ويقللها امك وأبوكي واطلعي برَّه ، والمثل بيقول اسال مجرّب ولا تسأل طبيب وكل شيئ في الدّنيا قسمه ونصيب ، واللي عاجبه الكحُل بيكحّل عِنيه وبِحَنّي ايديه مع رجليه ، يعني اللي عايز صبريّه يتفضل ويدق الباب وقبل ما يغلبني يقرا الموضوع ويِعرفْ الجواب ..

             الى اللقاء في صبريه  2