مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bahlool@hotmail.com



أرشيف نوفمبر, 2013

مراهقة سياسيّة

نوفمبر 26, 2013

          السّكونْ يلفُّ المدينة كأنّها في سُبات والنّجوم أخذت تستيقظ من نومها والقمر يسترقُ النّظر ويُطلّ على شرفات المنازل العتيقه ، كلّ شيئ هادئ لكنّ دوام الحال من المُحال فجأة تبدّد السّكونُ وعلت الأصوات في صراخ وصياح وكأنّ مصيبة قد حلّتْ بالجوار ،هذه دار أبو فؤاد كم كانت هادئة وادعة ، أمّا هذه الليلة فقد اختلف فيها الحال ، وكأنّ عينا أصابتها أو نزلت عليها لعنة الفراعنة ، أنا أحبّ جاري أبو فؤاد فهو جار الرّضا وعشرة عُمرْ وأمره يهمّني ، ولأنّي أتمنّى له الخير أسرعتُ الى بيته كي أستطلع الأمر ، طرقتُimagesCAS471U5 الباب واستأذنت ودخلت ، لقد فاجأني ما رأيت ، وقفتُ محتارا مشدوه البال لا أعلم كيف أبدأ السّؤال ، وما رأيت كأنّه ساحة حرب ، وجاري أبا فؤاد يقف في مساحة تتوسط الغُرف ، كان عرقه يتصبّبُ وعيناه جاحظتان يصيحُ حينا ويتوسّل حيناٍ آخر ، وزوجته وأبناؤه الصّغار يسترقون النّظر لما يجري والخوفُ مرسومٌ في عيونهم البريئه ، قلت – خير يا جاري ان شاء الله ما في شر خبّرني شو مالك ، ضحك جاري ضحكة هستيرية قائلاً ،- يا جاري أوّل شيئ يكثّرْ خيرك لأنّك مهتم في أمري ، لكن يا جاري اللي جرى لا بينكتبْ ولا بينقرا ، المشكله في الأولاد فؤاد وأحمد ، طول الوقت في زعيق وخناق ، قال يا سيدي مختلفين في الراي ، قلنا النقاش منيح لكن أن يتطوّر للعراك ومد الأيادي والكلام الفارغ ، هذا يا جاري كل واحد منهم متعصّب لطرف في مشاكل البلد وفاكر حالو الفهمان وانّو الصّح وغيره عميل وغلطان ، اتصور يا جاري انهم عملوا طوشه وكل واحد منهم متحصّن في غرفة وبيهدّد وبيتوعّد الثاني ، ما ظل غير يعلقوا الشعارات على الحيطان ويعملوا اعتصامات مثل الميدان ، شو صار في الدنيا يا جاري اذا الواحد بيوْقع في ضيق أو بصيبه ألم أوّل حاجة بقولها أخْ ، هذي ما هي وطنيّه وحب للوطن هذا تعصّب أعمى ومراهقه سياسيه وسمّة بدن ، – هوّن عليك يا جاري ما هو الحال من بعضُه وأنا كمان عندي في البيت نفس المُشكله ، نُصْ العيله قيس والنص الثاني يمن ، يعني ام صابر والولد صابر عاملين حزب ومحتلين غرفه وطول الوقت فاتحين على محطتهم في التلفزيون ، وأنا والبنت الكبيره فِكرنا مثل بعض واحنا كمان بنشوف محطتنا على التلفزيون في الغرفه الثانيه ، وباقي الأولاد الصغار ضايعين ومش عارفين يقفوا مع مين ، خليها على الله وقول يا ترى عن اللي وصل الو الحال مين المسؤول ، وكل يوم ورا يوم بتزيد على راسنا المِحن واحنا بنقول بالروح بالدم نفديك يا وطن ، يا جاري لازم يكون عقلنا وقلبنا كبير كل واحد يتحمّل ويستوعب الثاني ، أنا مُمكن أختلف معاك في الراي لكن ما بعاديك ، حتى ان وقعت في ضيق بالمال والرّوح بفديك ، لأن دمّي من دمّك و حتى نبني هل وطن لازم اتكون معي شريك ، عتبي على هيك ناس لأن كل واحد فاكر الناس فراخ وهو الدّيك …!!!

صبريّه 4

نوفمبر 22, 2013

               وبعد إم العريس ما خلّصَتْ كلامها يا جاري أبو محمود الفار لِعِبْ في عِبّي وقلتْ الله يُسترني من الخوازيق اللي جايه في الطريق ، وبعدين قُلت للجماعه لازم نِقرا الفاتحه على نِيّة الاتفاق ، وطلبتْ 421282_368175636592904_1522765804_nمِنهم يعملوا مُعاملة عقد قَران في المحكمه والشيخ يُحضُر لعندي في البيت حتّى يتمّمْ المُعامله ، طبعاً رايحين يجيبو الأكل معهم عادة النّاس من رُز ولحم وحلو للمدعوّين من الطرفين ، وطلبت كمان يشتروا الذّهب للبنت قبل عقد القران لحتّى أضمن حَقها ، ويستأجروا قاعه لاعلان الخُطوبه رسمي أمام كلّ النّاس ، وغادرونا بعد ما طلبوا أسبوعين مُهله لهذا الموضوع ، وبعد ما راحوا مِثل ما بيقولْ المثل ، فِضي القِردْ لمَعْطْ الجِلدْ ، قُلت لام صابر- شو كان قصدها ام العريس في كلامها ؟ يعني شو لازم أقدِمْ قالت – يا أبو صابر الله يعينك على هلْ حِملْ وانت اللي جِبتْ الهَمْ لحالك مَطلوب حاجات كثيره قُلت – فسري كلامك بالعربي المُفيد – قالت بعد الخُطوبه لازم نروح نبارك للعريس وأهله وناخد هديّه مِحرْزهْ مَعانا ونِعزمْهُم عِنّا على الغدا ، وبعد شهر أو شهرين ضروري نعمل عزومه ثانيه أسمها ، عَبْرِةْ البيت ، وهذي العزومه بيكون فيها خاروف وضلعات مَحشيه وكلْ أنواع المَحاشي واللحومْ من المّحمّر والمُقمّرْ مع الطبيخ ، والعزومه للعريس وأهله وقرايبُه ، وقبل الزواج لازم انْحَضّرْ شنته للعريس فيها كِسْوه كامله مِن البدله حتّى المحرمه وكسوه لأبوه وإمّه واخوانه وأخواته ، ويوم العُرس على الغدا لازم اتنقّط العريس وفي الليل اتحضّر قِدرة لحم مع مخلوطه عشى للعرسان ، وتنقط البنت عند خروجها من الدّار واسم النقوط ، نَزْلِة الدّرَجِهْ ، وفي الاحتفال ضروري اتنقّط العريس والعروسه إسواره أو عُقدْ ذَهبْ قُدّام النّاس ، وفي صباح اليوم التالي ضروري نِبعَتْ فطورْ للعرسان زغاليل مَحشيّه مع كبابْ وغيرُه ، وفي الليل لازم نروح إحنا وقرايبنا على بيت العرسان ناخذ معانا صواني كنافه ، واسم هذي الليله ، السُّبْحهْ ، وكمان بتنقط البنت فلوس انت والقرايب ، وطبعا بناخد معانا طقم كراسي كنبْ مُباركه أو ثلاجه هديّه لبيت العِرسان ، وكمان ضروري نِعزمهم بعد أسبوع وهذي العزومه اسمها ، عزومة العرسان ، وبِنحضّرْ فيها مأكولات وحلويات ، وكمان يا أبو صابر ضروري انحضّر كسوه لأوّل مولود للبنت مع ألعاب ، يعني قول ثلاث شُنت مليانه من الملابس من عُمُر يوم لحتّى سنتين مع سرير مُعتبرْ للولد … = خلاص لا تكمْلي آه يا راسي لويش كل هذي الأشياء … = هذي يا أبو صابر العادات والتقاليد وحضرتك طالبت بالعادات والتقاليد … = يا ام صابر هذي عادات بتخرِب البيوت ، حرام يا ناس اللي ما مَعاه شو يعمل ايروح يسرق ، أنا كُنتْ غلطان وعلى كلاميthamr007k5lg1vq2 وطلباتي ندمان ، ولازم أحكي مع خطيب البنت لحتّى نِلغي كثير من هذي الأشياء اللي إحنا وهُم لازم انقدّمها ، وكمان رحمه للعريس بدل ما يلحقو الدّين .. ودعى أبو صابر خطيب البنت ليتفاهم حول الموضوع وكان جواب الخطيب – يا عمّي اللي بتقدر عليه اعملو ولا تحمِّل حالك دْيون ، وجاوبه أبو صابر – بارك الله فيك يا عمّي وكثر الله من أمثالك وانت كمان لا تحمِّل نفسك أكثر من طاقتك والمثل بيقول ،على قد لحافك مد رجليك .. وتمّ التفاهم بين الطرفين بالغاء العديد من الاشياء الشكليّه والتي يكون الهدف منها المّباهاة وتُشكل عبء على الطرفين ، وتزوّجت صبريّه في احتفال جميل ، وحين غادرت منزل والدها نزلت دُموع أبو صابر حين ودّعها وتمنّى لها السّعاده ……..

صبريّه 3

نوفمبر 17, 2013

            يا جاري أبو محمود أنا سمعت كلامك ووافقت انها البنت والأفندي يقعدوا مع بعض بعد ما اتأكدت ان الشرع بيسمح ، لحتى يتعرفوا على بعض ، طبعا كنت أنا صاحي قعدوا في غرفة الصالون imagesCAWEOL4Eوطلبت من الولد الصغير يراقب الوضع من بعيد لبعيد وأنا كمان كنت أتنحنح كل فتره لحتى يسمع صوتي ويعرف اني موجود ، وقول بعد ساعه من الزمان قلتلهم خلص الاجتماع ، لاحظت على الخاطب انه كان مبسوط ومزقطط من الفرح وقال يا عمي أنا متوكل على الله وشاري نسبك ، جاوبته منيح لكن بعد أسبوع احنا بنتصل فيك وبنعطيك الجواب ، بعديها قال لكن يا عمي قبل ما يصير أيه حاجه لازم وضروري نعمل فحص دم أنا والبنت ، جاوبته اعمل فحص لحالك أنا بنتي صحتها مثل الحديد والشر برّه وبعيد العين تحرسها ، جاوبني هذا الفحص ما هو للمرض هذا لتوافق الدم عشان ما يصير في المستقبل مشاكل للخلفه ، قلت خليني أسال في هل موضوع وفعلا سألت جارنا أبو يوسف التّمرجي ، قال كلام خطيب بنتك مزبوط ومعاه حق ، اذا كانت نتيجة الفحص مش ملايمه خلفتهم بتكون معرّضه لأمراض كثيره .. ما بدي أطوِّل عليك المهم راحت البنت مع امها وعملت الفحص الي بيقولوا عنو تلاسيميا والولد كمان ، والنتيجه كانت منيحه يعني ما في مشكله اذا اتزوجوا … = يا أبو صابر صدقني ان الولد فهمان وعمل عين الصّواب والعقل ، وكمان بدي أقلك منيح اللي هو غريب يعني ما هو من عيلتك لأن زواج القرايب بيعمل مشاكل وكثير من خلفتهم بيكونوا معرضين للاصابه بالاعاقات وبيقولوا هذا من الوراثه ، والرسول الكريم قال غربوا في النكاح يعني الأفضل الواحد يتزوج من عيله ثانيه ما هي من قرايبه …= ابنرجع للموضوع يا جاري أبو محمود بعد ما غادرنا العريس سألت البنت صبريه عن رايها صدقني انها خجلت وقالت الراي رايك يا با ، مع هذا أصرّيت اني أسمع الموافقه منها قالت اذا انت موافق أنا كمان قلتلها يعني موافقه هزت براسها وراحت مبسوطه لعند امها … = اعملت عين الصواب يا جاري أبو صابر وعقبال عند ولادك تفرح فيهم … = وعند ولادك كمان يا جاري أبو محمود طبعا سألت عن الشب في مكان شغله وكمان في حارته وكانت الأخبار والمعلومات منيحه ، قلنا نتوكل علي الله واتصلت في العريس وطلبت منو يحضر مع أهله لحتى نتفاهم ، وعصر يوم الجمعه الماضي حضروا لعنا العريس وأبوه وامه وخالو ومرت خالو ، أهَّلنا وسهَّلنا فيهم وقمنا بالواجب وقلتلهم خلينا نحكي في المهم وأكيد ابنكو خبركو عن طلباتي ، قالوا مرحبابك احنا جاهزين احنا اللحم وانت السكين ، قلتلهم ولا الضالين آمين بعد 6 شهور بتم الزواج وبيكون العريس فرش داره وعملو جهاز للبنت ، لكن يا عمي أنا دقّه قديمه وكل الأمور رايحه تصير حسب عاداتنا وتقاليدنا ، قالوا يا أبو صابر الفرح لابنا وعروسه واحنا كمان بدنا نعمل عرس معتبر ونفرح قلت 10376063_1436905563229365_5045863271521804143_nكيف يعني أنا ما بوافق ايكون العرس مختلط ، يعني بدّي رجال في ناحيه والنسوان في ناحيه ثانيه ، ولمّن سمعت هذ الكلام ام العريس قالت يعني كيف بدهم يفرحوا أهلنا والناس مقسّمين يا أبو صابر ما في حد غريب كلنا أهل وجيران ، قلتلهم أنا ما بوافق تكون بنتي فرجه لخلق الله قالت مرت خال الولد أنا في عندي حل وهو انها العروس تلبس فستان فرح شرعي ، وبعد ما سألت ام صابر قالت يعني بكون مستور ، في هذي الحاله وافقت لكن يجتمعوا الأهل ويفرحوا بعد مغادرة الناس الأغراب … = وفي هذا عملت عين العقل كمان يا أبو صابر الناس بدهم يفرحوا والعرس مره وحده في العمر والأحسن خلّي الأمور ميسّره لحتى تفرح بنتك كمان … = يا جاري أبو محمود اللي قاهرني ان أبو العريس قاعد وما حكى ولا كلمه غير ايقول موافق ويهز براسه وكان كل الحكي مع ام العريس وكانت عامله حالها مثل الضابط أو قول مثل الابوكاتو وقالت اذا انت يا أبو صابر عايز الأمور تمشي حسب عادات الناس واحنا كمان بدنا حقنا حسب الأصول ، قلت فسري كلامك يا مستوره ، قالت يعني احنا رايحين نقدم لحضرتك كل طلباتك عالراس والعين وبالمقابل لازم تعاملنا بالمثل يعني عايزين تقدم عادات الناس والعدل منيح وما في حد أحسن من حد . بلعت ريقي وقلت في عقل بالي اكيد الموضوع في ورطه كبيره …

        الى اللقاء في صبريه 4

صبريّه 2

نوفمبر 12, 2013

   يا جاري أبو محمود حضر لعنّا واحد دَق الباب وقلنا أهلا وسهلا ، قال أنا فُلان الفُلاني وجاي لعندكم طالب القرب وبطلبْ ايد المحروسه بنتك صبريّه ، قُلنا خير وبركه لكن بتعرف شو المطلوب والعادات والتقاليد ؟ قال نعم أنا جاهز لجميع الطلبات ، قلت طيّب ليش ما حضر أبوك أو أ205859_4222689162239_405627800_nهلك لحتّى نتفاهم عل موضوع ونتعرّف أكثر لأنها العجله من الشيطان ولازم تعطينا فرصه لحتى نسأل عنك وبعدين بصير خير ، قال في هذي معك حق لكن يا عمّي ياريت لو تعطيني فُرصه وتسمحلي أقعد مع البنت لحتى نتعرف على بعض مثل حضرتك ما حكيت واذا تم التّوافق والرضى بيني وبينها بعدين بنكمّل المشوار ، شوف هالكلام يا جاري أبو محمود ..!! ..= نعم معاه حق يا جاري أبو صابر ضروري يقعدوا مع بعض ويتفاهموا لأن هذا الموضوع بيتعلق بحياتهُم ومستقبلهم ورايهم ضروري ينسَمَعْْْ … = شو بتقول يا أبو محمود أي هي بنتي صبريّه بضاعه لازم أعرضها على طالبها لحتى يقلّبْها ويتأكّد منها ، بيكفي انها تقدّم القهوه وتشوفه ويشوفها … = يا أبو صابر شو فيها لو قعدوا وتم التعارُف بينهم كمان هذا شرعا مطلوب لحتى تضمن ما يصير مشاكل في المستقبل … = ناقص تقوللي كمان ياخذها عالسينما ويسهروا في المراقص … = أنا ما قُلت سينما ولا مراقص مُمكن يتفاهموا عندك في البيت أو يتقابلوا في حديقه عامّه قدّام كل الناس لحتى ياخذوا حريتهم في الكلام لأن الزواج يا أبو صابر عشرة عُمُر ولازم يكون بينهم توافق وتكافئ وانسجام ونظره للمستقبل وكمان استلطاف لحتّى يدوم الزواج ويكون ناجح بدون مشاكل والسّبب ليش بتكثر نسبة الطلاق في هالأيام السّبب طبعا زواج الأهل والخاطبه وكل طرف بيهتم بالمظاهر والمنظر بدون معرفة الجوهر ، وكمان لأن الأهل ما أتاحوا الهم فرصه كافيه لحتى يتعرفوا على بعض ويكون قرارهم سليم ، والأفضل يعرفوا انها القيمه الحقيقيه في الانسان قدّيش عندوا وعي ومفهوميه وقديش ممكن يحترم الحياه الزوجيه ، لكن بيتم الزواج بسرعه كأنها طبخه وبيكثروا فيها الطبّاخين والعريس والعروس آخر من يعلم وكأنهم مِتفرجين … = لكن يا جاري أبو محمود اذا سمعت كلامك وراحت صبريه مع هذا الأفندي على حديقه لحتى يتعرفوا ويتفاهموا مثل حضرتك ما بتقول وما تم بينهم الاتفاق بعدين شو رايح يصير ..؟ أكيد سيرتي بتصير على كل لسان وفضيحتي بجلاجل لأن الناس رايحه تقول شُفنا صبريه بنت أبو صابر مع رجّال غريب سايحه نايحه ودايره على حل شعرها ما بيعرفوا انه ما صار بينهم شيئ لا من بعيد ولا من قريب وما صار قسمه ونصيب … = يا جاري أبو صابر معك حق لأن الناس دايما بتحكم على الظاهر وهوايتهم سيرة الناس وهاد دليل فلس وعدم وعي وصدقني كثير من العادات والتقاليد بتقيّد حرية الانسان ، أنا بقول كمان مرّه انه من حق البنت اتوافق على زوج المستقبل وتتعرف عليه بشكل كافي وافي ويكون التعارف دون تمثيل أو تهويل أو تسبيل ، لأن الصراحه أفضل والغش رايح ينكشف في المستقبل وبقول كمان ان الرحمه مطلوبه اذا توفّر الانسان المناسب لحتى يقدروا يشقّوا طريقهم في الحياه … = لكن المثل بيقول يا أبو محمود اللي ما بيتعب في الشيئ بيفرّط فيه والناس رايحيين يقولوا أبو صابر تخلّص من بنته في أقرب فُرصه … = لا يا أبو صابر الناس رايحيين يقدْروا شهامتك وكرمك والمثل بيقول كمان اذا أكرمت الكريم ملكته ، وصدّقني انها نسبة العنوسه بين البنات مرتفعه والسبب تعنُّت الأهل وأسباب أخرى كثيره ولهذا بيعزفوا الشباب عن الزواج ، أنا قلت رايي وقناعتي وانت حُر في بنتك لكن لا تنسى ان خطيّتها في رقبتك ، والفّرص المنيحه ما ابتتكرّر كل يوم …
               الى اللقاء في صبريه   3

صبريّه 1

نوفمبر 5, 2013

64529.imgcache           يا ام صابر المثل بيقول الغالي غلّيه والرخيص روح وخلّيه ، واللي بيعرض بضاعتُه في السّوق بيرخص سعرها وبقلل من قدرها … – لكن يا أبو صابر بنتنا صبريّه ما هي بضاعه ولا فُستان معلق في الشماعه ، والمثل بيقول كمان اللي مش عايز يجوّز بنتُه بغلّي مهرها لحتّى تصير عانس ويزيد من قهرها … – أنا عارفِك طول عُمرِك غشيمه وما عندِك بُعد نظر وبتخلطي بين الفقّوس والجزر ، بنتي صبريّه ما في مثلها وأنا عايز اللي بيعرف قدرها لأن الغالي سعرُه فيه ، والناس بتحطّه على الراس وبتعليه ، انتي بتعرفي انها صبريّه مزيونه ومثل الجوهره المكنونه ، واللي ما بيقدر على الحمل بلاش ايشيل ، ويعمل قبضاي ويغنّي للناس عتابا ومواويل ، صبريه بنت متعلمه وبتعرف تقرا وتكتب ما هي مثلك ما بتعرفي الألف من العصا ولا الجوهر من الحصى … – الله يخليك يا أبو صابرلا تفقّع في قلبي وتحط الشوك في دربي ، بيكفي صبري عليك وطول غُلبي ، خطيّة البنت في رقبتك والرحمه في هل أيام مطلوبه ، لأن الحاله تعبانه والدنيا مقلوبه ، بعدين لازم تشاورها وتشوف رايها في الموضوع ولاّ كلامها كمان مش مسموع … – يا فهمانه أنا أبوها وولي أمرها ، وبعمل لمصلحتها حتّى لو طال صبرها ، وأنا ما بشاور البنات وما بسمع كلام الستّات ، وبعمل اللي في راسي وبعرف خلاصي ، أنا بعرف قيمة بنتي منيح وبحكيها بالعربي الفصيح أيْ عليّ الجيره بتعمل قلاّيه وطبيخ ما في مثلهم حتّى في المريخ ، وبنت بيت فهمانه ، لا بتعرف فيس بوك ولا بليفونات ولا مُسلسلات ولا فلانه وعلاّنه ، وكمان حلوه مثل فلقة القمر ومثل زهر الرّبيع اذا حضر ، يعني شو فيها اذا طلبت شقّه للسكن وثلاث مية غرام ذهب وغرفه صالون مع سجّاد وكنب ، وغرفة نوم مع تخت هزّاز للمعلوم ويكون خمس نجوم ، وعفش بيت مع مطبخ وموكيت ، وكسوه مع بدلات لزوم البيت والسهرات ، وخمس آلاف دينار مقدّم وكمان خمس آلاف مأخّر ، لحتى يعملوا للبنت مقدار وإلنا قيمه واعتبار ، وحفله في قاعه كبيره على شان نعزم الأهل وكل الديره ، يا ام صابر اللي بتعب بالشيئ بقدّر قيمته ومقدارُه وبحافظ عليه بكل عزيمته وإصرارُه ، أي صدقيني اذا بتْساهل في الأمور غير يحصل المحظور وكل ما نط الكوز في الجرّه غير ايبهدلها ويقللها امك وأبوكي واطلعي برَّه ، والمثل بيقول اسال مجرّب ولا تسأل طبيب وكل شيئ في الدّنيا قسمه ونصيب ، واللي عاجبه الكحُل بيكحّل عِنيه وبِحَنّي ايديه مع رجليه ، يعني اللي عايز صبريّه يتفضل ويدق الباب وقبل ما يغلبني يقرا الموضوع ويِعرفْ الجواب ..

             الى اللقاء في صبريه  2