مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



كلامْ نواعِمْ ..

سبتمبر 15, 2013
0 views

                     صوتْ من الخارج يُنادي – ام صابر .. ام صابر . تهلّل وجهُ ام صابر فرحاً حين سمعت صَوت جارتها ام راضي وصاحت بأعلى صوتها ..- أدخلي يا ام راضي الباب مفتوح أهلاcoffee وسهلا حَلّت علينا البرَكهْ مِن زمان هالوجه ما بان كيف قلبكْ طاوعِك تغيبي عنّي طول هالمُدِّه صارلك يومين ما زُرتيني والله انّي بشتاقلك واليوم اللي ما بشوفِك فيه انتي والمُسلسلْ التُّركي ما بينحِسبْ من عُمري بَظل مقهوره وحايصه لايصه مثل الجّاجه المنتوفْ ريشها ..- والله يا جارتي ام صابر انِّك غاليه عِندي وأنا كمان صَدقيني بشتاقلك وبَحِبْ القعْدِه مَعِكْ وانتي دايماً عالبال لكن يا جارتي أعذريني من كثر الأشغال ومشاكل الأولاد وأبو العيال ..- ولا يهمِّك لا تنحِمْقي وتِحرْقي في دمِّك اتفضلي فوتي أقعدي البيت بيتك وحظي من الدّنيا حلو عشان في الي جاره منيحه مثلك وانّي حبيتك وجُواة صماصيمْ قلبي حَطيتك ..- حبَّتك العافيه والكنافه الدّافيه لكن ما بدّي أتاخَّر عن البيت لأن أبو راضي جاب شويِّة مَحشي لازمْ أقوِّرْهُمْ وأطبخ قبل ما يرجع من الشغل ..- تاكلوه بعرق العافيه لكن الوقت بكّير قبل العصر، كل يوم طبيخ ونفيخ نِيّال الأجانب في بلاد برَّه قال يا ستّي كل أكلهُم في المطاعم وستّاتهم مدللين مع انّه بنات العرب أصايل لكن شو تقولي في البخت المايل ..- يا جارتي هاذ حظنا ونصيبنا وان شاء الله الهَم والعين ما تصيبنا ..- معك حق يا ام راضي لكن قوليلي شو آخر الأخبار..- يا ستي بلاش يقولو علينا بنحبْ النَّميمه وفضَح الأسرار وطق الحكي وسيرة الناس ..- ما ظل على الرجال غير يكتمو علينا الأنفاسْ نميمهقولي وتْبَحْبَحي وعلّي صوتك وتنَحْنحي أيْ ما في أكثر حكي من الرجال لكن ذنبهم مغفور ومش على البال ودايما في القيل والقال وسيرة النّسوان فلانه طويله وعلاّنه قصيره وهذي شقره والثانيه سمره وقلوبهم بتاكلها الحسره هذا غير سماع الأخبار ومباريات الكوره وسعر المونه والدّولار .. – لكن يا جارتي لا تقولي انّي حكيتْ وهاذ الأسرار ما بدّي تنتقل من بيت لبيت .. – قولي وسرِّك في قاع بير يا أميره وبنت الأمير .. – يا ستّي ام عباس زعلت من ابنها قال لأنّه اشترى لزوجته بلفون جلاكسي قالت لابنها -امك اللي ربتك وتعبت عليك وكبرتك دايما ناسيها حتى في ألمها ما بتواسيها الجلاكسي لناس والهم والشقى لام عباس .. – معها حق لكن شباب اليوم طايشين ومحكومين لنسوانهم وبقولوا ولا الضالين آمين .. – وام محمود كمان طلقت كنِّتها حلفت يمين غير تجوِّز ابنها ست ستها قال يا جارتي لأنها بتضل نايمه للضُّهر وما بتساعدها بشغل البيت وبتقهر فيها قهر .. – وأبو نبيل اشترى لداره غرفة نوم مع ان عفش بيته عمره 3 سنين ام نبيل بتقول ان غرفة النوم القديمه ديكور وعلى الفاضي بيقولو عنها

شغل ايطالي وقولي ان شاء الله زوجي يشتري غرفة نوم وعقبالي وبيقولو انه اشتراها شغل بلدي مثل الحديد حتى لو لعب مصارعه فوقيها بضل خشبها جديد ، وبيقولو أبو عارف خسر كل فلوسه والدهر عليه جار .. – ليش هوه بيلعب قمار او يمكن زوجته طلباتها كثيره للدار ..- لا لا بيقولو خسرهم في البورصه .. – بيستاهل بلا شماته لأنه رقص على الحبل وعقله صغير مثل السخل ..- وفي اشاعه بتقول ان مقبول متزوج على مرته بدون علمها قال يا جارتي علشان العروس غنيِّه ومعاها مصاري كثير وهو بيكذب على مرتُه وبيقول انو فتح محل ثاني بالشمال ولازم يداوم هناك يومين في الأسبوع لحتى يشرف على محله ، مسكينه مرته طول عمرها غشيمه والمثل بيقول اللي مأمنه الرجال مثل اللي مأمنه الميِّه في الغُربال .. – والمثل بيقول كمان يا ماخد القرد على ماله بيروح المال وبيضل القرد على حاله .. – وفي خبر يا جارتي بيقول انو سعاد زوجها اشترالها سيّاره وصارت شايفه حالها وسايقه في دلالها ..- آه ابيلبقلها مع انها عامله عملية تجميل بمُنخارها لكن الدنيا أرزاق وحظوظ .. مهو المثل بيقول يا جارتي القرد في عين امُّه غزال والشمس ما بتتغطى بغربال ..- لو تعرفي يا جارتي شو بيقولو الناس عن سميره بنت ام سمير ..- خير شو بيقولو يا جارتي ..- بيقولو انها دايما دايره على حل شعرها في السّوق مهو صدق المثل اللي بيقول طب الجرَّه على فمها ابتطلع البنت لأمها وزوجها يا جارتي مسكين بيشتغل ليل مع نهار لحتّى يلبّي طلباتها فاكره حالها صبيِّه مع انو عمرها فوق الخمسين وبتقول للناس أنا عمري ثلاثين يعني عمرها مثل عُمر بنتها سميره .. – يا عيب الشوم عليها نسوان آخر زمن ..- اسمعتي يا جارتي شو بيقولو عن جارنا أبو عزيز ..- خير شو بيقولو ..- بيقولو انهم شافوه وهو بينشر الغسيل لمرته وبيقولو كمان انو بيطبخ وبيجلي وحتى بنظف البيت وهي واقفه على راسه وكاتمه انفاسه مثل الضّابط ..- مسكين ابو عزيز لأنو رجال عاقل وبيقول يا رب السّتر وبلاش فضايح بين الناس ..- بيقولو انو مسعود اتزوج على مرته لانها بتخلف بنات مع انها راحت للفتاحين اكثر من مرَّه لحتى تعمل بخت عشان اتخلف أولاد لكن ما نفع العمل ، وابن ام سعيد بطل عن خطيبته قال يا ستي اكتشف انو امها مخلفه سبع بنات وما خلفت ولاد، وسميحه حامل بالشهر السّابع مع انو عندها أربع ولاد وخمس بنات وبتقول بدها اتخلف كمان لحتى تعمي اقمار زوجها في الخلفه وما يقدر يتزوج عليها .. – وجارنا مروان بيعلم ابنه في الجامعه بيقولو مُحامي لكن بنته مع انها جابت معدَّل أكثر من أخوها قال يا ستي أبوها رافض تتعلم في الجامعه وبيقول مُستقبل البنت للزَّواج ومصروف التّعليم بيروح خساره ، أبوها عامل من حاله أبو العُرّيفْ وهو ما بيعرف ان التعليم والشهاده للبنت سلاح للمستقبل . رجال آخر زمن ، وبيقولو في ناس شافو ميمي مع رجال غريب ويمكن كان الشيطان ثالثهم لكن هي بتقول انو الرجال خالها يقطع الناس شو بحبّو الاشاعات لكن واحنا مالنا ومال الناس الله يستر على جميع خلقه ، وام عايد ابتعمل كل يوم طوشه هي وكنتها قال يا ستي لأن كنتها ما بتبوس ايدها وبتقول انو الحق على اللي ربّوها وامها بتحرضها مِش أبوها ، وسلمى بتغار من سِلفتها لأن جوزها بيشتريلها كل شهر فستان جديد وسلمى المسكينه بتقول ان جوزها بيشتريلها فستان من العيد للعيد ، وجارتنا سلوى زوجها ضربْها وعمل معها طوشه كبيره وراحت على أهلها زعلانه قال لأنو اكتشف انها ابتحكي مع الرجال على الفيس بوك قام عمل عمايله ورخا شمايله وحلف يمين بالطلاق غير يتزوج عليها لحتّى يربيها لكن هو مسموحلو يظل كل ليله للصباح ياخذ ويعطي مع الستات ، وسميحه صبغت لون شعرها بالون الأشقر وصارت اتحط على وجها الأخضر والأحمر وتمشي وهي تتمختر قال يا ستي خايفه زوجها يتزوج عليها وبتقول انو بضل طول الليل يبحلق ويبصْبص على الستات الشقر في التلفزيون لكن يا جارتي تسمحيلي أروح على البيت واحنا مالنا من سيرة الناس عشان ما بيجي منها غير وجع الرّاس خليني يا جارتي أروح أطبخ المحشي قبل ما يرجع زوجي من الشغل ..- لكن يا جارتي الوقت متاخر لعمل المحشي لأن الوقت صار بعد المغرب ..- الله يُسترْني الكلام أخذنا وما عرفت كيف راح الوقت بسرعه الله يُسترني من زوجي لأنّه ناطر لحتّى يتعشى مَحْشي أكيد رايح اينيِّلها عليي وايخليها مثل الطرشي .. !!

 

Be Sociable, Share!


أضف تعليقك

*

*
To prove you're a person (not a spam script), type the security word shown in the picture.
Anti-Spam Image

Powered by WP Hashcash