مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



إستثمار ..

يوليو 30, 2013
0 views

              صباح الخير يا ست السّتات يا ام صابر يا مزيكه في قلبي ونغمة كل الرّنات ، وكمان صباح النور على طبق بنور يا اميره ويا نواره يا زينة نسوان كل الحاره ، وصباح الخير يا عسل يا وردة عمري وكل الأمل …=  يسعد صباحَك يا ابو صابر لكن ما الك بالعاده على مثل  هذا الخرّاف والصّباح خبّرني يا رجّال الفار لعب في عبّي والوسواس عشش في قلبي …= يا ستي كنت مغمِّ--_1_~1ض وهالحين فتحت كنت غلطان وساقط في الامتحان ومقصّر في حقك يا اميرة كل النسوان ، والمثل بيقول الاعتراف بالذنب فضيله يا اصيله ويا بنت الاصيله ، أي صدقيني صباحك برد الرّوح وبيشفي القلب المجروح وبيطلِق الصّوت المبحوح …= يسعد صباحك يا تاج راسي يا كبيري وعزوتي وكل ناسي ، لكن لا تفقِّع قلبي وتزيد من وسواسي ، فوت في الموضوع وكلامك ان شاالله مسموع …= هذا يا ستي القصّه وما فيها ومن اوَّلها لتاليها ان كل الجيران والناس وأهل البلد حاطين مصاريهم يعني فلوسهم عند الشيخ أبو محمود لحتى يشغِّلهم في الاستثمار ، وآخر الشهر بيوخذوا ارباحهم عل المعدود حلال زلال بلال قال يا ستي الشيخ أبو محمود بشغّلهم في شراء وبيع العقار وبيقولوا انّو هذا إسمو استثمار ، والمرابح بعيده عن الرِّبا وقرش الحرام وكل شي حسب الشّرع بالكمال والتّمام …= طيّب يا ابو صابر الله يوفقهم ومن فضله يرزقهم ، واحنا مالنا ومال الجيران والناس …=  ما هاي هي المشكله يا حُرمه فتحي مخك معي وخلينا انخطط للمستقبل يعني حتى نستفيد ونودّع الفقر ، ونوكل جاج مثل الناس هذا غير لحم الهَبِرْ …= يعني يا ابو صابر بدَّك تقول يعني هالحين  صار  معك فلوس وطول عمرك بتقول أح  بح ، وبتلعن الحظ المنحوس ،  يعني طول عمرك بتخبي عنّي وما بتقول الصّح ، لا تظلميني يا ام صابر انتي عارفه البير وغطاه لكن لو تسمعي كلامي وتسايريني على قد عقلي وبلاش تتّهميني في شقلي بقلي …= طيب قول اللي عندك وانا بسمعك ..=  يا ام صابر هذا البيت الي احنا ساكنين فيه انتي اخذتيه ورثه من أهلك وبتمنى لا تقاطعيني يعني بقول مثلا لو بعنا هذا البيت بنقبض حقه حوالي ستين الف دينار ويعني لو اعطينا المصاري للشيخ ابو محمود لحتى يشغلهم اكيد رايحين نقبض ارباح مش اقل من 600 دينار كل شهر مثل ما بيعطي الناس ، وفي هذي الحاله ابنسكن في بيت بالآجار واحسن بيت اجرته 300 دينار والباقي 300 دينار مربح صافي وافي للمصروف وخلافه ، وفي هذي الحاله ابنسكن وبنعيش وبنّام على فرشه ريش ، قولي شو رايك .؟..= اعوذ بالله ابدا ما ببيع البيت ولو دفعو ثمنه مال قارون يا ابو صابر هذا البيت من ريحة اهلي وما بفرط فيه ولو على قطع رقبتي …= لا لا سلامة رقبتك يا ام صابر انا عارفك طول عمرك غاويه الفقر وبتقهري في قلبي قهر ، وبهل الحاله عايزك تقللي من الطلبات ولا تظلي اتنقي وتقولي جيب وهات … ومرت الأيام وأبو صابر عاتب على زوجته كانت أيامهم بين ود وخصام الى أن كان ذات يوم حيث سمعوا في الأخبار عن هرب المدعو الشيخ أبو محمود من البلاد مع كل أرصدة العباد وغادر بالجمل وما حمل وعلى المتضررين الشكوى وطلب العوض من الله …!!

نشرت في جريدة القدس بتاريخ 21/2/2014

Be Sociable, Share!


أضف تعليقك

*

*
To prove you're a person (not a spam script), type the security word shown in the picture.
Anti-Spam Image

Powered by WP Hashcash