مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



أرشيف يوليو 15th, 2013

رمضان كريم .

يوليو 15, 2013

رمضان كريم       
-  اللا قللي يا صديقي هوّه في بالسّما قمرين ..؟ ..imagesCAQURYKB
– ابتحكي عن جد ..؟
-  أيوه بحكي عن جد وقلت يمكن غلطان بالعد .. احنا ابنعرف في للأرض قمر واحد وقريب .
-  ولكن شو قصدك بهل سؤال الغريب .
-  السؤال علشان الوصل الو الحال . كل سنه نفس الحكايه والموّال وبنضيع في القيل
والقال .  والكل بيصير مفتي . حتى الصغيره بنتي …! الموضوع يا سيدي هلال شهر
 رمضان . كل سنه ابيختلفوا فيه … يمكن الحق علقمر ولازم انقاضيه ..!
-  لا بيجوز لأنهم العرب قسّموا القمر . وكل جماعه الها نُص وكل ناس الهم راس .
– غريبه مع ان الناس  وصلوا للمريخ واحنا مختلفين عالقمر …!
لكن بهل حال شو رأي المشايخ ولاّ بيبصموا بمن حضر ..؟
-  أنا بقولك الحكايه فيها سياسات وكل جماعه لجماعه ابتعمل شانات .
وحُكلي تحكلك حتى بالعبادات .
-  قولك هالقصّه فيها قبض وصرْف .  اللي بيسمع كلامك بتكرمه مثل ما جرى بالعُرف .
-  لكن يا صاحبي بلا من وجع هالراس . و بُكره بنصوم اذا صاموا الناس .
-  ما هم بيقولوا سبت رمضان عنّا . واحنا بنغني مع المفتي اذا غنّا … وبكره بعد
لفطور والواجبات . وشرب القهوه وأكل الحلويات . عازمك على تمثيليه
بتشوف فيها بعض زوايا العليّه . وسيبك من هالحكايه حتى نتفرج عالرّوايه  .         

                      المشهدالأول – في قصرالبيك ابوالعز      
-  يا ماما أبوكي صايم . وطول النهار شقيان على شان مصلحة الشّعب .200945big8436729
و ما هو مثل غيره بيقضيها لعب في لعب . قولي للطباخه ام بدوي  تعمل اليوم على
الفطور دجاج  محمَّر وستيك مقمَّر. والباميه تطبخها مع اللحمه وتشتري القطايف بكير
قبل الزحمه . وتعمل ضلعه محشيِّه . متبله بالزعفران والتقليه .. و ما تنسى شويّة
راس عصفور تقليهم قبل ميعاد الفطور . وجاط فريكه مع سلطات مشكله .. والبابا غنوج
والطرشي . والزيتون بلا بزر وطنجرة محشي . وتحضّر المشروبات من كل الماركات .
و شويِّة مشبّك . على شان البيك  بطنه ما يتلبّك . وعلى الرُّز لا تنسي الصنوبر واللوز …
والقطايف تعملهيم مع جبنه . وشويه مع جوز . وقولي للسائق ابو زكي ايبطل طق حكي .
 وخليه ايجيب اللوز والبندق والمخلوطه . علشان  نتسلى مع المسلسل فطوطه .
ويجيب تفاح اصفر واحمر. وكاكا وموز وكيوي اخضر. ويجيب بُرغر وجبنه كشكوان
والخبز طازه من عند الفران . مع قالب كيك علشان بيحبُّه البيك ..
-  حاضر يا ماما رايحه احكيلهم وبعدين بروح عالنادي .
مع سوسو وفيفي وشادي . وبرجع بالسياره مع دادي ..
                                     
                                        المشهد الثاني ..
       -  الحمد لله .. الفطور كان مش بطال لكن ناقص ..
– لا تتعب حالك يا ابو العز ..احكي وانت جالس ..
 -  يا ام العز بفكر اغيِّر الطبّاخه ام بدوي  مرضيّه ..علشان كل سنه ابتنسا  اتحط العسلimagesCA1AOYPZ
 عالمهلبيّه . و قاليه راس العصفور بزيت مع اني بحبه مع سمنه بلديّه ..
 -  بسيطه .. انا بحكيلها ما تنسى . ولا تخلي قلبك عليها يقسى ..
 -  يا ام العز يوم الجمعه ميعاد العزومه .. لا تنسي تعملي برنامج وتكتبي أسماء كل
المدعوّين . وترسلي فكسات الهم عالعناوين .
– لا تخاف مثل كل سنه . وعلى راسهم ابو الفهد وابو النمر وابو العبد .
 وراسم بيك وكل الأصحاب وشلة الأحباب ..
 -  وكمان لا تنسي ابو الماجد . علشان في المجلس ما ايعاند . وابو المنصور
علشان مفاوضات حولين صفقه بتدور والباشا ابو نضاره علشان ما ينساني وقت تشكيل الوزاره
وابو نضال مدير بنك الأعمال .. وابو الكايد صاحب جريدة الرّائد ..
 -  ولا يهمك .. كلهم حيكونوا موجودين … مع الخرفان المحشيّه . والقدر الخليليِّه .
 والحلو كنافه نابلسيّه . بالفستق الحلبي والسمن مقليّه . . والسّهره رايحه اتكون في
البستان . حولين النوافير وبركة المي والرّيحان ..
وانشاء الله كل سنه وانت سالم . والسنه الجايه بتصير باشا وخيرك دايم …
            

                      الفصل الثاني .. المشهد الأول في حي شعبي .. بيت ابو راضي …419650_360169367334700_197002240318081_1342709_753962516_n
   -   اهلا وسهلا ابو راضي الله يعطيك العافية وكل سنة وانت سالم .
-  الله ايعافيكي وربنا الي ايخليكي شو اعملتي علفطور يا ست زهور..؟
-  يا سيدي الخير اكثير والشاطر ما بيعيقه  تدبير . اليوم طبخت مجدّرة بالثوم
 والكمّون معطرة ..  شغل اديّي علشان ترضى عليّي ..
-  يسلموا اديكي على كل حال .  نعمة والله يحفظها من الزوال . اعملى معها سلطة
علشان الدنيا صيام والمجدره ناشفه  ولاتقولى انسيت أو مش عارفة .
-  يا ابو راضي البندورة غالية علشان رمضان ومثل ما بيقول المثل الخضرة صارت
في عباب العرايس والفقير يا عينى حايص لا يص .. لكن طبختلك معاها شوربة عدس
-  يعنى كلها عدس بعدس طيب نعمه بناكلها ولا الفلس ..
-  صحتين وعافية يا أبو راضي و الاولاد أكلوا حتى خلوا الصحن فاضي ..
-  الحمد لله على عطاه صدقيني الأكل كان طيِّب مع الزيتون والبصل
وللحلو ماعاد في  محل ..
-   لكن اليوم ما اعملت حلو قلت رمضان بعدو باوَّله .. اليوم يا ابو مجدره2راضي ابنشرب شاي
 و الخير لقدام جاي ..
-  طيّب خلي مع الشاي نعنع واذا ما في ميرميّة  كمان بينفع
-  حاضر ولا تنسى بكره تجيب بكيت حليب وكيلو نشا بعملهم مهلبيّة بناكلها بعد العشا
 قالوا الاولاد عايزين قطايف قلتلهم خلو القطايف لقبضة الخميس
 واذا ما في قبضة بعمل شعيرية  او شوية هريس
-  كل شي لوقته فرج او بيصير . علينا السعي وعلى الله التدبير…
                                                  
                          المشهد الثاني
-  يا ام راضي يوم الجمعة الجاي لازم نعمل عزومة رمضان
لأنه صلة الرحم أوصى عليها الرحمن ..
-  أيوه لازم نعملها مثل كل سنة وبعزك تكون . وكل سنة وانت سالم يا أبو  قلب حنون .
 وبنعزم البنات وعمتك وخالاتك وبنات عمك وكل رحمك ..
-  حاضر وكمان لا تنسي الحجة فاطمة جارتنا مهيّة فقيرة و ما الها حدا وابعتي صينية
فيها أكل لاولاد المرحوم عوّاد علشان يتامى وربنا أوصانا عالمسكين واليتيم
-  ان شاء الله وبنعمل العزومة يوم الجمعة الجايه
ولا تنسى اتجيب بشكيروصابون وتحلاية  …!!؟؟
                                                                                                   
                                       النهايه..
 في هلغنيِّة تعالوا نسمعها وهذا اوّلها مع مطلعها .. كان القمر سهران وأهل البلد نايمين
 آل القمر يا ناس مين اللي صاحي مين .. مين اللي صاحي مين..؟
 وكل سنة وانتم سالمين ورمضان الجاي بنصوم وبنعيّد مع الفلبين
 وربّي ايحنّن قلب التجّار والبكوات والباشوات المحترمين .. ويتذكروا انه في بهلوطن غلابة ومساكين..!!؟؟

نشرت في جريدة القدس بتاريخ 28/9/2007