مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



أرشيف مايو 31st, 2013

عِجِلْ أبو صابرْ

مايو 31, 2013

         

            بشوفك نازل على سوق الحلال يا أبو صابر ..= أيوه يا بقرهجاري لأني ناوي أشتري عجل صغير ..= لويش العجل أكيد ناوي تربي حلال ..= لا يا سيدي ان شاء الله ناوي أذبحه لما يصير صلح بين جماعة غزه وجماعة الضفه ..= أي أحسن وفر فلوسك لأن عمرو ما رايح ايصير صلح ..= لا تكون متشائم يا رجال ..= علي الطلاق غير أحلق شنباتي اذا صار صلح والأيام بينا  يا أبو صابر عمر الزيت ما بينخلط مع المي والنور ما بينخلط مع الفي ..= لا تقول هذا الكلام يا جاري إحنا أهل وإخوه ..= أيوه أهل وإخوان وشعب واحد لكن المشكله يا أبو صابر إن كل فريق بيقرا من دفتر غير وكمان واحد قبلتو للشرق والثاني للغرب ..= طيب يا جاري الأيام بينا وبنتواجه …  دخل أبو صابر البيت وهو يجر العجل مناديا على زوجته ..= مبارك العجل يا أبو صابر لكن لويش شريتو ..= يا إم صابر أنا اشتريت العجل عشان أذبحو وأعمل عزومه لأهل الحاره يوم ما يتم الصلح بين ولاد البلد ويتوحدو ويصيرو للقضيه سند ..= لكن هذا عجل صغير يا أبو صابر وما بيكفي أهل الحاره ..= أنا بقول طول عمرك غشيمه يا ست فهيمه وبتحسبيها غلط يعني فكرك من بكرا 12b0d36aa665رايح ايصير الصلح ؟ هذا إذا بلشو مفاوضات يمكن تقعد أكم من سنه بين خوذ وهات وحرد ومشاورات وتشكيل الوزاره والصلاحيات يعني بهل الحال بصير العجل ثور كبير وعلى الله الوفق والتدبير ..= يا  عيني عليك يا أبو صابر طول عمرك صاحي وبتحسبها من كل النواحي ..= لكن يا مستوره أنا خايف ..=  خايف من شو يا أبو صابر ..= خايف القصه تقعد سنين طويله وأموت قبل ما نذبح الثور ونعمل احتفالات ونطخ الفتاش ونعلي الرايات ..= لا سلامتك يا أبو صابر وان شاء الله ايطول عمرك لكن مثل ما بتقول اذا الحوار أخذ سنين كثيره بهل الحاله الثور رايح يصير هرش يعني كبير في العمر ولحمته رايح تكون قاسيه وما تستوي في الطبيخ ..= قولي من غير شر وان شاء الله النوايا بتكون سليمه وبيقسمو بينهم هل غنيمه والكل بيكون راضي والنوايا صافيه والك كمان مع اللحم اجيب للحلو كنافه بالجبن والقطر سخنه ودافيه … !!