مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



أرشيف مارس 8th, 2013

أبو صابر ..

مارس 8, 2013

          آه يا تعبي وشقاي .. والله يسترنا من اللي جاي..   – ما لك يا ابوصابر اصبحت اتولول كأنها القيامة قامت والعدالة  بالدنيا نامت..    – يا مستورة ضاع حالنا ومالنا..الضعيف بيضيع بين الزحمة  والقوي واكل الدنيا من غير رحمه  . الدنيا آخر وقت..  والعيشة صارت مثل الزفت..!    – قول يا رجال.. شغلت بالي وغيرت حالي..   – شو اقول لك يا مستورة..طول السنة احرث الارض وازرع  وبحط سماد وزبل.. ومطارده مثل النمل، وغنمات جارنا بتوكل  الخضرة والزرع عالبارد..واكثر من مرة قلت له يا جاري خاف ربك والله شاهد . لكن دون فايدة .. شو يعني فكره  اترك الارض او ابيعه اياها .. ما هو عارف اني بعشق ترابها  وريحتها وهواها..    – طيب لا تشغل بالك يا ابوصابر.. جيب جمعة ارجال وخليهم يتوسطوا بينك وبين هل جار..ويحطو له حد بدل ما توقع الفاس بالراس واتصيرجد.    – يا بنت الحلال ما خليت ولا مخلوق الا وطلبت منه يتوسط وايحل  ا لقضية،  حتى المختار فلس منه وما قادر يعمل حاجة وقدامه بيصير صغيرمثل الجاجة.. راكب راسه وبيقول ما في غيري عالارض .. وغنماتي الهم الحق يرعو بالطول  والعرض . حاطط حاله فوق البشر والقانون وما في حدا سامع صوتي بهل  زمن الملعون.    – هونها يا رجل وبكره بتهون .. والليلة ابتسمع رأي الاولاد . وارمي حملك على رب العباد. …   ابوصابر يجلس الى مائدة العشاء .. وبجواره زوجته واولاده .. صابر وصبري وابنته الصغيرة صبرية .    – يا مستورة الاكل ما هو نازل من زوري من القهر – صبرت على هالبلا واكلت الشوك مع الصبر.. ولازم نوضع حد لهل جار . والوقية بالحق اثقل من الباطل ولو كان قنطار .    – اتعيش وتسلم يا تاج راسي .. خلينا نسمع رأي الاولاد  قال صابر- خلينا نعمل سور بينا وبينه وبهل حال غنماته ما تقدر اتفوت لعنا …   - قال سور قال يا ولد الاسوار خرّبت بيتنا، وفرّقت الاخو عن اخوه هذا حل مرفوض واحنا بنطالب بهدم الاسوار حتى ايفوت النور والهوا للدار .    قال صبري – انا عندي الحل . ابنعمل خندق حوالين الارض .. .  – قال خندق قال . وكمان هذا الحل مرفوض كيف بدنا نروح ونتحرك عايز اتحطنا داخل سجن . احنا ابنكره السجن وكل السجانين …   قالت صبرية – اذا كانوا قرايبينا والناس اتخلوا عنا وما بدهم ايساعدونا خلينا نزرع شوك وصبر حوالين ارضنا …  – قال شوك وصبر .. احنا ازهقنا الشوك والصبر . قولي نزرع ورد وزيتون بدل الزيتون الي بيرعوه الغنم وبيقطعوه .. قولي نعمل ارضنا جنة وبستان . ونزرعها فواكه من كل الالوان .   قالت ام صابر: – انا بقول  لو تنزل انت والاولاد على سوق المدينة وتشتري كلب حراسة وتخليه في الارض حتى يمنع كل معتدي وبهذا ما في حدى بيلومك .   – والله فكره مش بطاله .. يعني لفينا الدنيا او ما خلينا مخلوق حتى ايحل هالقضية .. يمكن الكلب ايحلها خلينا انجرب …. ابو صابر والاولاد في سوق المدينة داخل محل لبيع الحيوانات والطيور الأليفة . وفي قفص بالناحية الغربية من الدكان كلبان . كلب ابيض والاخر اسود . وقف الجميع ينظرون اليهم حيث قال ابو صابر مخاطبا الاولاد - شو بتقولوا. مين الاحسن الابيض ام الاسود ؟    قال صابر – الاسود لانه صغير في العمر وعيونه ابتلمع مثل انيابه وبقول انه الافضل ..! اما صبري فله رأي اخر حيث قال – انا افضل الكلب الابيض لانه كبير في العمر وله تجارب في الحراسة . ..  اختلف الاولاد في اي منهما الافضل . واحتار ابو صابر في الامر وسأل الصغيرة صبرية رأيها بالموضوع  فقالت بكل براءة :   – اسمعوا الكلب بيظل كلب وان اختلف لونه كان ابيض او اسمر ولا تنسوا ان  جدي قال – ما بيحك جلدك غير ظفرك . سمع البائع كلام صبرية وتعجب مع صغر سنها وهز برأسه قائلا كما قال الكاتب الطاهر وطار -

     (صحيح ما يبقى في الوادي غير حجاره)..!

                       نشرت في جريدة القدس بتاريخ 1/2/2009