مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



أرشيف فبراير 19th, 2013

بنتْ العمْ

فبراير 19, 2013

             اسمعي يا حُرْمِهْ .. كلامي لازم يمشي لو حتى على قطع راسي .. وأنا بقولك وبحذرك .. وقد أعذر من أنذر .. – يا خيبتي عليكي يا فهمانه هذي آخرتها بتهدد كأنك مجلس الأمن وكمان بالفصل السابع وكلامك مثل ضرب الرصاص حتى المدافع .. لكن يا أبو صابر يا زوجي العزيز أنا بسمعك دايما بتحكي مع الناس عن الديمقراطيه والعدالة والمساواة والحرية .. مهو المثل بيقول بسمعك بصدق كلامك وبشوف أمورك بستغرب .. – لا تستغربي ولا حاجه .. كل شي بهل دنيا لازم يمشي حسب الأصول والرجّال في البيت هو المسؤول .. – لكن يا أبو صابر أنا كمان عندي رأي وحسب كلامك لازم يعني تعطيني حقي في الكلام وأقول رأيي من غير ملام .. عشان أنا مش طنجره في البيت وبلاش التهديد والوعيد كل ما حكيت ..عامل من حالك نصير للديمقراطيه والعيشه معك كلها قهر ورزيّه .. – يا عيني ويا فرحتك يا أبو صابر الحرمه بدها اتحط راسها براسي وتعد علي كلامي وحتى أنفاسي .. يا فهمانه بشوف لسانك مطلوق هذا اليوم وكمان ابتحكي في السياسه .. أي شو رأيك انرشحك للبرلمان أو الرياسه .. – يا أبو صابر القضيه ما هي رجال ومره .. الحياة مشاركه وتعاون والنقاش مفيد من غير عبد وسيد وهذا من حقي لأن مستقبلنا واحد ومصيرنا واحد وبلاش العناد وتفرج علينا خلق الله والعباد .. كل ما أقول شرق بتقول غرب كأنها حرب بين البوسنة والصرب ..- طيب اتفضلي قولي اللي عندك واختصري في القول على شان انا مش فاضي ومشغول ..- بقول يا ابو صابر بلاش تجبر الولد عل الزواج من بنت عمه لأن صابر ما بيرغب في البنت والمثل بيقول كل شي ممكن يصير بالخناق الا الزواج بالاتفاق ..- يا فهمانه انا اعطيت كلمه وكمان قريت الفاتحه مع اخوي الكبير مهي القصه اخوي شاورني  لأن في ناس طلبو البنت وانا ما هان علي تروح البنت  للغريب وقلتلواسمع يا اخوي المثل بيقول جحا اولى بلحم ثوره وانا بطلب ايد بنتك سلوى لابني صابر وانا اللحم وانت السكين وافق اخوي على طلبي واتفقنا على كل شيئ  ولا الضالين امين يعني فكرك بنت اخوي يتزوجها الغريب وابن عمها صابر ما يكون الو فيها نصيب وبهل الحال الورثه ما بتروح للغريب وسلوى بنت عمه وعرق عينه وصابر بيلبقلها ما شاء الله عليه ويا زينو..- يا ابو صابر كلامك على عيني وراسي لكن انت ما شاورت الولد وما اخذت رايه في الموضوع ..- يا حرمه انا بعرف انو كلامي عند صابر مسموع وهو ما بيخرج عن طوعي وهاد اللي صار لكن لا تلعبي براس الولد احسن ما اقيم الدنيا على راسكو ويتفرجو علينا اهل البلد .. رضخ صابر لأبيه وكذلك سلوى لأبيها وتم زواجهما حسب التقاليد .. كان كل منهما ينظر الى الاخر ويرى صورة من يحب صابر كان يرى طيف بنت الجيران تلك الفتاةالتي احبها وتمنى ان تشاركه حياته وسلوى ايضا كانت ترى صورة فتى احلامها ذلك الشاب الوسيم الذي التقت به في يوم من الايام في المكتبه .. لكن هذا ما كان دفنوا احلامهم وامانيهم احتراما لآباء لا يرون ابعد من انوفهم . هي العادات والتقاليد العفنه والتي ما زالت متفشيه في العديد من بلاد العرب ويقولون ويتساءلون لماذا ترتفع نسبة المشاكل والطلاق في هذه الايام ومن المسؤول ..