مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



سُكَّرْ وزيْتْ

يناير 30, 2013
0 views

              بشوفك يا ابو صابر بتناقل بالسُّكر والمونه والزيت  حتى مليت المخزن والبيت ، أكيد بدْها ترتفع الأسعار أو قالوا ن وربنا اينجْحك قولْ آمين ، أنا طول عمري بقول انّك مخبّا بقشورك وإنّك قدْها وقدود وفي العدد بألف رجّال معْدود ، وهالحين افهمت السّببْ في إنّك ربيت ذقنك وبطّلتْ تحلقها …-  يا عيني عليكي شو انّك فهمانه واشتريت كمان بُرْنيطهْ يعني طاقيّه خواجاتي وبدله مْحزَّقه وربطهْ مْعرَّقه ْوكمان عبايه مقصَّبه ومسبحه مذهَّبه وهذي الاغراض لزوم الوجاهه وعدّة الشغل لكل جاهه  …-  لكن الذقن ما بتركب مع البرنيطه يا أبو صابر …- ما هو هذي هي الشطاره وهذا أسمُه تكتيك وحسن إداره ، يَعْني  الّي بشوفْ الذقن بيقول هذا انسان فاضل ومستقيم وبينتخبني والي بشوف البرنيطه بيقول هذا مُنفتح وكمان بينتخبني ، وبهل الحال بَقصْ الأصْوات على الوجْهين يعني مثل المُنشار نازل واكل طالع واكل …- العين تُحرسك شوفهمان ويخليك ربّي ذخر وسند لهلْ أوْطان …- يا ام صابر القصّه عششت في مُخّي وبعد عمل المشاورات وطول تفكير قلت في عقل بالي الحياه لازمها الشطاره وحسن التدبيرومش لازم أظل قاعد ومتخبّي في قاع بير ، ومثل ما بيقول المثل – أكل العيش بحب الخفّيه – ولأَنّّا بنعيش في بلد الشاطر بشطارته قرّرتْ كمان أنا أخُذ من الغنيمه  نصيبي  وأحسن طريقه اني اقول عايز أخدم أهل بلدي وجاري وقريبي ، يعني بالعربي الفصيح ناوي أرشّح حالي للانتخابات حتى الهَط كل الامتيازات ، ومثل ما قلتلك هذا الزيت والسكر لزوم الدّعايات طبعا غير العزايم والولايم وتقبيض الكاش وطخ الفشكْ والفتاش ، لكن هذا الكلام بيني وبينك يعني ما هو للنشر، وهلحين خلّي عِندِك مفهوميّه وحضْري ذهباتك عشان أبيعهم وبعد الانتخابات بشتريلك قدْهُم مَرْتين …- لا يا أبو صابر كُلشي ولا الذّهبات وأنا شو بيضْمنلي انّك رايح تنجح في الانتخابات …- أعوذ بالله من كلامِك ومن فالِك النّحس هذا بدل ما تقولي مَرْحَبابكْ وتشجعيني وتعملي دعايات بين النّسوان والجارات ، أيْ بيكفي إنّك رايْحَه تصيري زوجة نائب في البرلمان وتطلقي كل الفقر والأحزان …- ولا يهمَّك يا ابو صابر لكن من غير ما أبيع الذهبات لأنْهُم الحيله والفتيله وربنا يقدرك على هالحمل وتظل تاج راسنا وكبير العيله …-  طيّب بلاش الذّهبات لأنّي لو نجحت رايحه اتظلي اتنُقّي واتقولي انهم ذهباتك السّبب في نجاحي ، يا ستي ما بدّي ايّاهم وبدبّر حالي من القرايب …-  أكيد رايح تعمل عمايل في المجلس وتصلح أُمور البلد وتخلّي الحُكومه عايشه في قلق ونكدْ …- يا حُرْمِه اذا غيري عمل شيئ أنا بعمل ما إنتي عارفه كل الطابق طق حكي وما بينْسِمع من نائب او حد بيِشتكي ، يعني كل جماعه بتسعى لمصالحها وبينسوا مصالح النّاس والمواطن بيظل مقهور ومِحْتاس ، يعني انتي بتفكري انّي رايح أقيم الدّين في مالطه ، وهالحين أُترُكيني عشان أرَكّز وأحفظ  كمْ من كلمه ألقيهُم في الخطابات والنّدوات عن الحرّيّه والعداله والمُساواة يعني لزوم الشغل والدّعايه للانتخابات …
لا تِبْكي يا بَلدْ على مَصيرك
ما في حَدْ بْهلْ زّمَنْ نَصيرِكْ
جاحدين عَطاكي ولحْم كتافْهُم مِنْ خيرِكْ
عَجَبي …!!!!!!!!!

Be Sociable, Share!

  1. samurai Said,

    مشكوور وباررك الله بيك

    عاشت الايادي

    والى الامام

أضف تعليقك

*

*
To prove you're a person (not a spam script), type the security word shown in the picture.
Anti-Spam Image

Powered by WP Hashcash