مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



أرشيف يناير 7th, 2013

إلحالْ مايِلْ ..

يناير 7, 2013

يا ليلْ ليشْ مْعَدّي عَلى ضَيْعِتْنا
الحِمْلْ ثقيلْ مَعْ الألمْ في غرْبِتْنا
والحالْ مايلْ وصِرْنا حَمايِلْ
وزادْ الطمَعْ فرْقِتْنا
وآهاتِ الوَجَعْ بِتودّي صَدى قِصِّتْنا
لكنْ الطريقْ مَسْدود
مزْروعَه بالشّوكْ والبارودْ
وعمْلوا حدودْ قدّامْ لِحدود ْ
وعْيونْ ترْصدْ همِّتْنا
والعَدلْ مسْجونْ بأمْرِ القاضي
وما هو فاضي حتّى يسْمَعْ شَكوِتْنا
والحالْ سايِبْ ما دام العَدِلْ غايِبْ
وما في حَدا يْحاسِبْ وبِتزيدْ بَلوتنا
وبْهَلْ زَمَنْ ما في للضّعيفْ صاحِبْ
ويمْكِنْ الحَقْ علْقرايِبْ وما عادوا عِزْوتْنا
هبّينا كثيرْ تَنْقرّرْ المَصيرْ
رجِعنا لورا مَعْ قَضيِّتْنا
ما دام في تنْسيقْ بِيظلْ الغَريقْ غَريقْ
وصِرْنا أكثَرْ مِنْ فريقْ وزادَتْ مِحْنتنا
والمُحْتلْ عامِلْ حِصارْ
بِلحَواجِزْ والأسْوارْ خانِقْ حُرِّيِّتْنا
رُحْنا لمجْلِسْ الأمْنْ وألقينا الخُطبْ
ورَفعْنا العَتَبْ تنْقيمْ دولتِْنا
وشَكينا هَمْنا وهَدِرْ دَمْنا
كان الرّدْ ما في حَدْ وقِفْ لنُصْرتْنا
هذا ظُلمِ الغَريبْ
لكِنْ ليشْ ظلم القَريبْ يا حُكومِتْنا
البيتْ فاضي يا الّي عامِلْ قاضي
وخِلصِتْ مِنْ زَمانْ مونِتْنا
والجْرون صارْ مَحَلها عَسْكرْ ومُعَسْكرْ
مِحْتلينْ ديرِتْنا
والزّيتوناتْ مْكسّرينْ والقلبْ حَزينْ
والبَطالهْ رْفيقِتْنا
والأسْعارْ صارَتْ نارْ
وجَشَع التُّجّارْ فوقْ قدْرِتْنا
لا تقولْ إحْنا مقيّدينْ مِن الخَواجاتْ المَلاعينْ
وبِدْها صَبِرْ والله المُعينْ وبْتنْحَلْ ضْيقِتْنا
صِرْنا مِثلْ الشَّحّادينْ على ابْوابِ السّلاطينْ
وبإسمْ فَلسْطينْ التَسِوُّلْ صارْ مِهْنِتْنا
طزْ في باريسْ وبِالخَواجاتْ المَناحيسْ
وشيلْ الضَّرايبْ عَنْ لقْمِتْنا
بْيِكفينا هذا الزَّمَنْ عايبْ
ولاّ انْت حابِبْ تْزيد فوقْ النّكْبِهْ نكْبِتْنا …

نشرت في جريدة القدس بتاريخ 27/12/2013