مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



تيتي تيتي .

يناير 3, 2013
0 views

          قال تيتي تيتي مثل ما رُحتي مثل ما جيتي . وكأنك يا 575103_127637820706422_100003806154874_135825_238064345_nابو زيد ما غزيت ..-  خير يا ابو صابر شو القصّه اليوم ..-  يا ستي القصه اليوم أغرب من الخيال وصدق المثل  ومين قال ( الطمع ضرَّ وما نفع .. والمسؤوليه تكليف وما هي تشريف ) ..- اكيد لأنها المسؤوليه عايزه رجالها ومين يقدِّرها والحاله التعبانه مين ايدبِّرها ..- نعم كلامك صح ومزبوط  يا ام صابر في هذا الزمن ، كل ما قرَّب الفرج بتزيد علينا المحن ، يا ستي الكل فرح وهلل لثورات الربيع العربي وقلنا اخيرا أجا الفرج ورايحين نتخلص من الديكتاتوريات وانظمة الشلل والعصابات والتسلط والفساد وقمع الحريات ، ونعيش مثل باقي خلق الله في حريّه وديمقراطيه لحتى نبني الاوطان ونصير في بحبوحه وعيشه كريمه وهنيه ونشعر بالأمن والأمان  ونغني ميجنا وعتايا لحب الأوطان ، لكن يا حسره تعالو شوفوا اللى جرى لا بينكتب ولا بينقرا ..- لا يا أبو صابر انت طول عمرك زعلان ومتشائم وما بيعجبك لا عادل ولا ظالم ..- يا ستي المثل بيقول اقرا المكتوب من العنوان . اللي صار ان بدل الثوره صار عنا ثورات والكل قال يا معين وهلَّت لبشارات وبعد النصر غنينا وعلينا الرّايات لكن اللي صار خلا العقل من راسي طار. قالوا نعمل انتخابات وصارت الانتخابات والنتيجه ناس ربحوا وناس خسروا وهذي هي طبيعة الانتخابات   لكن اللي خسروا يعني المعارضه ما عجبها الحال وصارت حايصه لايصه واخذت بالقيل والقال وقالت انها الانتخابات مزوَّره والمؤامره على الشعب مدبَّره والشعب انقسم أطياف وأحزاب وأحلاف يا عجبي  واجتمع الشامي مع المغربي وولاد الاصول مع الفلول وعملوا جبهة حرب كانهم الرابحين في الانتخابات من الاستعمار او الصرب . الكل صار بيسعى للكرسي وحطوا عيوب الدنيا بالغلبان المرسي . طيّب وين راحت الديمقراطيه والشعارات الثوريه واحترام الاخر والتعدديه واختيار الاكثريه . يا ستي انا غير منحاز لاي طرف وما بدافع عن احد لكن المثل بيقول من جد وجد . ولازم نعطي الناجح فرصه ونحترم قرار الشعب وبعدين بنقرر في الانتخابات المقبله شو عمل للوطن وبهيك بيتقرر مركزه ومكانته من خلال أعماله لكن اللي صار انهم داسوا على الديمقراطيه والحريه والتعدديه وصار الكرسي هو أهم قضيه حتى لو تم التحالف مع رموز النظام السابق .. يا ناس جميعكم ولاد بلد ولكل واحد نصيب حسب ما اجتهد . يعني لازم نحترم نتيجة الانتخابات وما نعلّق تقصيرنا وفشلنا على الشماعات والتجريح في الآخر ونطلق الاشاعات . المفروض الكل يشارك في عملية البناء حاكم ومحكوم ومعارضه بدون استثناء . بدل الهدم والتجريح والصّخب والبكاء . بلاش الانقسام اللي صار حتى على مستوى الأسره بين الاشقاء . وين راحت الديمقراطيه يا فهمانين ويا تجار الوطنيه في الميادين . وما هي  هيك الحريه وبلا  متاجره في مصير الوطن  والدّين .. ام الدنيا رايحه تبقى أكبر من كل السّاسه المراهقين من اليسار واليمين . وقلب العروبه النابض بالحب والخير والعطاء ليوم الدين  … وفي بلد ثاني بعد الانتصار بدل التخطيط والبناء والنهوض بالارض الخضراء وشعبها حتى ينعم بالحريه والرفاهيه اتشقلب الحال وكل واحد صار ايغني موّال وقامت الدنيا وما قعدت صار نص الشعب مؤمن والنص الثاني قالوا عنُّه كافر  وكل طرف عايز دوله ونظام حكم حسب تفصيله وعلى قياسه والفهمانين فقط هم أهله وجماعته وناسه . طيّب وين راحت الديمقراطيه والحريه والتعدديه واحترام رأي الاخر . يا حرمه احنا ما بيلبقلنا لا ديمقراطيه ولا حريّه . صدقيني لازم ناخد دروس كيف نعيش ويكون علينا حاكم مثل الحجاج والدليل على هالكلام الكل كان بيشكي وبيبكي من ملك الملوك لانه ديكتاتور . وقامت ثوره وانتهى حكم الديكتاتور . واللي حاصل اليوم ان كل مدينه أو قبيله بتحكمها ميليشيا بيرأسها ديكتاتور يعني بدل ديكتاتور واحد صار هناك العشرات وبدل جيش واحد صار ميليشيات والحال سايب وأنا على ناسي وأهلي عاتب . والامثله كتيره ويمكن تشمل اغلب الديره لكن بيكفي لليوم . وهذي كلمة حق دافعها المحبه بدون زعل أو عتب أولوم ..

                               نشرت في جريدة القدس بتاريخ 26/7/2013
Be Sociable, Share!


أضف تعليقك

*

*
To prove you're a person (not a spam script), type the security word shown in the picture.
Anti-Spam Image

Powered by WP Hashcash