مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



أرشيف أكتوبر 15th, 2012

ألوقت ..

أكتوبر 15, 2012

            بشوفك قاعد حيران وشايل هم الزّمان  وشايل السّلم بالعرض وبتوزّع مواعظ لكل الأرض .. – أّيوه يا صاحبي شايل الهم من النّاس وعمايل الناس  ، اللي بيطيروا العقل من الرّاس ..- مالهم الناس مهم حلوين والخير للرّكب وكلهم مفهوميّة وأدب ، لكن انت مثل عادتك عايز اتقيم الدّين في مالطه ، يا زلمه خلي المركب قالطه .. – يا صاحبي لا قالطه ولا مالطه ، أنا بعد ما قلت حاجة ، لكن صدّقني البعض ابيتصرّف  مثل الجاجة ، ما عندها قيمة وتقدير للوقت ودايما قلقانه وبتنق ، مثل صوت الطبل  والرّق ، بيكون القمح قدّامها ابتتركه وبتفتش  وفي الأرض ابتحفر وتنكّش ، وكأنها  ابتشكي من قلّة البخت ، والعمى ضاربها من فوق لتحت ، يا صاحبي الكل ابيهرب  من المسؤوليّة حتى صارت الدّنيا مثل المهلبيّة .. – طيّب أقعد وفش خُلقك وطوّل بالك بكره بتهون وبيقولوا رايح يرخص الطحين  والسكّر وزيت الزيتون .. – قال بكره بتهون ، أي أنا خايف الصّاحي ايصير مجنون ، ويقول عن البصل كمّون ..- قلت يمكن انت زعلان علشان غلا الأسعار ورخص العملة مقابل الدّولار .. – لا هذا الموضوع في لعلاجه دوا بالسوق .ابنشرب كل يوم ملعقه على الرّيق  قبل الفطور . وبتقضي يومك في هنا وسرور .. – أو شو أسم هذا الدّوا .. – أسمه اعمل ومد رجليك على قد اللحاف ، لأن اللي فوق لا من دري ولا من شاف ، أنا اللي مزعلني الوقت والمواعيد عند النّاس ما الهم قيمه . مع انهم الأصل  والفصل والغنيمة بتلاقي الشباب طول النهار قاعدين عالقهاوي . أو بيقولوا ما  في شغل . والوقت بيضيع يوم ورا يوم  واحنا شاطرين بالعتب واللوم . وناطرين  العنب من الكروم ، طيّب الحق عليهم ولاّ عالوقت  ولاّ يمكن الحق عالطليان .. – الحق عالحكومة وعلى أصحاب رؤوس الأموال وكمان عالاحتلال .. – ليش..؟ هوّه الاحتلال بيقول للناس اللي معهم مصاري ايطلعوها لبرّه   أو ايخبوها بالجرّة . وبيقول للناس ما يعملوا مشاريع ويقضّوا وقتهم  بالانتاج والتصنيع . أنا بعرف في كثير من الناس عملوا في بلاد برّه مصانع ومزارع . وبنوا دور وقصور .وباقي الناس قاعدين وأراضيهم بور ، بيموت فيها حتّى العصفور، ولاّ عايزين الاحتلال يطعمنا ويسقينا ، صحيح فيه حصار لكن وين راح الشّعب الجبّار ، غاندي حارب الاستعمار بالاعتماد على الذّات بدون استجداء ولا خذ وهات ، وسلاحه كان النّسيج والملح وحب الناس حتى صار الصّلح .. – كلامك على حق  وأنا بالكنافة بلتق ، لكن المشكلة انه كل واحد عايز ايصير كبير ،  و ما بيريد ايكون عامل أو أجير والسّؤال كيف ممكن ايصير بدون عمل وتدبير . وعايشين عالخيال والأوهام  ومكانك واقف ولا خطوة لقدّام . مهو هذاك الزّلمة  قال مسيرة الألف ميل تبدأ بخطوة والفيل بيولد صغير مثل القطوه ، احنا ناس  اتكاليّين . اتعودنا على جيب وهات . ووصلت المساعدات وقبض التموين . وبنلوم هالزّمان اللعين طول النار طق وحكي ، فلان اشترى وفلان باع  وفلان سرق . يا صاحبي اللي ابيزرع شجرة على الطريق أحسن من اللي بيرسم  غابة على الورق .. – كلامك حكم  ومعك كل الحق ، وهل مرّة أنا بالكنافة بلتق .. -  لكن أنا عارفك في حاجة امخبيها عنّي ، فضفض يا صاحبي وقول وأوّل الحكي  بنصلي على جمال الرّسول … – حاضر يا صاحبي ..انت عارف انه عندي بنت صبيّة . او في ناس عايزين يطلبوها للزّواج . وعادة الناس يتوجّه العريس وأبوه وأمّه في زيارة حتى يتّفقوا  على التّفاصيل . هذا يا جاري في جماعة قالوا عايزين ايزورونا طبعا بعد ترتيب النّسوان للموضوع وقلنا أهلا وسهلا .. اتصل أبو العريس وقال طالبين الاذن بالزّيارة . وكمان قلنا أهلا وسهلا . قال ان شاء الله اليوم بعد صلاة الظهر. وكمان قلنا  أهلا وسهلا . وانت عارف يا صاحبي اني صاحب دكّان . ولأجل الزيارة أغلقت  الدكان وقلت كفاها الباري . وتوجّهت بسرعة لداري .. الوقت صار  بعد الظهر وحضراتهم  ما شرّفوا وصار بعد العصر . وكمان ما شرّفوا. وصار المغرب ، وكمان ما شرّفوا .. قلت في عقل بالي يمكن غيّروا رايهم .. لكن مع أذان العشاء  سمعت دق عالباب وصوت ينادي . فتحت الباب واذا بحضراتهم مشرفين . قلت أهلا وسهلا . وقبل ما أسألهم عن سبب التأخير قال أبو المحروس .. – لا تآخذنا بسبب التأخير . والسّبب ان ام المحروس طابخة روس غنم عالغدا ، لكنهم طلعوا كبار في العمر . وأخذوا وقت كبير عالنّار ، وصار الغدا عشا  والله يرضى عليها ام المحروس عملت نفس أرجيله  دخّنته مثل العادة بعد العشاء .. وهذا اللي صار .. مع هذا بلعتها وقلت أهلا وسهلا .. يعني بعد الظهر من الساعة 12  الى الساعة  8 .. كل هذا الوقت ما الو عندهم حساب ..! وسألت عن شغل العريس  قالوا الولد اتخرج من الجامعة ومعاه شهادة معلقة على الحيط .  وقدّم طلبات شغل لأكثر من دائرة وشركة . وقالوا ابنبعث وراك هذا الحكي من   قبل سنتين ولهذا الوقت واحنا ناطرين .. قلت يعني العريس عاطل شغل ..  وسألت كيف عايز اتجوزه وكيف عايز يفتح بيت .. البيت عايز مصروف . قام أبوه  ودق صدره قال يا عمّي ما يكون عندك فكر .. أنا جمل العيله . والخير كثير  وما يكون عندك تفكير .. قلت افرض ما تم توظيف المحروس ابنك ..  قال دلّوني على واحد واصل يعني واسطة كبيرة ، وانشاء الله قبل الزّواج  بيكون في الوظيفة   قاعد على كرسي من الجوخ والقطيفة .. وكمان بلعتها وقلت  ما دام الأب وضعه ميسور خلينا انجوز البنت والعجلة اتدور ، مع انّه غلط مثل بلع الزّلط يا سيدي اتفقنا وقلنا على بركة الله . وسألت عن موعد  الزّواج قالوا ان شاء الله في الصّيفيّة .. قلت الصيفية من شهر 4 الى شهر 12  وانتو حنّاكو مجرّب . يا ريت اتحدّدوا وقت علشان أكون مستعد   حتّى أخبّر أهلي وجماعتي  اللي في الخارج .. قالوا خليها عالتّساهيل .  والعجلة من الشيطان ، اذا ما صار نصيب هذي الصيفية . أكيد بيكون الزّواج في  السّنة اللي بعديها بيكون الولد اشتغل بوظيفة وبصير الفرح فرحين وعقبال عند   السّامعين  .. يا صاحبي لعند هون ما اقدرت أصبر . قلتلهم اذا ما كنتوا مستعدين   لويش اتدقّوا أبواب الناس . هو الوقت عندكم ما الو قيمه ما في عندي عرايس   والله يرزقكم .. قالوا بحبحها شويّة  الله خلق الدنيا بستة أيام .. قلت الله قادر   يخلق الدّنيا بلحظة  لكنّه خلقها في ست أيام لأجل يعطي الانسان عبره . انه في وقت  لازم نحترمه ونستفيد منه ونكون مستعدّين قبل القيام بأي عمل   وانصير مثل البشر ، وقلت اذا عايزين بنتي لازم العريس  ايروح دوره عاليابان حتّى ينجح في الامتحان .. خرجوا وهم يهمسوا … باين عليه صابو جنان ..قال عايز المحروس ايروح عليابان .. وهذي الحكاية يا صديقي ..وانا اليوم عازمك على كنافه .. – اليوم عندي شغل .. خليها لبكره انتظرني بعد الظهر .. – بعد الظهر كمان … اه يا راسي …!!

نشرت في جريدة القدس بتاريخ 2008.2.24

إرفع راسك ..

أكتوبر 15, 2012

إرْفعْ راسَكْ  أهْلكْ ناسَكْ عِمْلوا ثوْرَه في  المَيادينْ
قولْ أنا مَصْري بَكتُبْ نَصْري بْدَمِّ الشُّهدا والعَناوينْ
ميْري  ومينَهْ  سُمعَهْ  وزينَهْ   إيد  بإيد  ومِتّحْدينْ
نِبْني وَطنّا  الخير أهو عِنّا  ونيلكْ  غّنى  إنتو فينْ
إحْمي بْلادَكْ أرْضْ أجْدادَكْ  يوم الشِّدّه  مَنْصورينْ
شِد الهِمِّه حِلوهْ اللمِّهْ  دَمَّكْ  مَصْري في  الشّرايينْ
إبْنِ  مَصانِعْ   وَيّا  مَزارعْ   وحَيّي  كُلِّ  الفَلاحينْ
إحْمي الثّورَهْ  مَصْر  الحُرّهْ  أمْ  الدُّنيا  ويّا  الدّينْ
إنْتو ولادي وحُبّي عْبادِهْ  بيِكفي إنْكمْ   مَصْريّين ..