مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



عزومة رمضان ..

أغسطس 3, 2012
0 views

       
 يعطيك العافيه يا أبو صابر ..- الله ايعافيكي هي أنا حضّرت كل أغراض العزومة حتّى الحلو جبت بقلاوة مع قطايف ولا تقولي  هات وجيب كمان  لانّّي صرت مفلس وطفران ..- إن شاءلله كل سنه وإنت سالم  ومثل الزّيت فوق المي عايم وبيظل نفسك وخيرك ، وطاير في السّما طيرك والله يعطيك الف عافية  وبتظل بصحتك وفرشتك هنيّه ودافيه ، يا أبو صابر نيّال مين جبر رحمه في هذا الشّهر الفضيل ومن صام يومه وقام ليله الطويل..- شوفي يا ام صابر هذي هيّ اللحمه ثلاثه وستين شقفه بالعدد ، وصدقيني إنها لحمة جدي من أحسن لحّام في البلد ..- يسلمو إيديك طول عمرك بتشتري الحاجات المعدوله وحاجاتك منيحه ومقبوله لكن يا رجّال أنا شايفه إنها اللحمه فيها شقف كبيره وشقف صغيره يمكن اللحام الّي قطعها غشيم في التّقطيع أو كان مستعجل لحتّى يبيع ..- لا غشيم ولا حاجه أنا طلبت منّه يقطعها كبير وصغير وهذا حسن تدبير..- طيّب لويش كبيره وصغيره وقّّعتْ في قلبي الحيره ؟ ..- أيوه هذا هو السّؤال المهم يا حرمه الشّقف الكبار لازم تكون الواحده قد الصّرمه لأنّّي عازم ناس مهمّين والشّقف الصّغيره بنقدمها للنّسوان والباقيين ..- يا خيبتي عليك يا أبو صابر يعني المهمّين لحمتهم أكبر من رحمك وقرايبك ..- لا تكفري يا حرمه ألله بيقول الذكر بياخذ قد نسوان ثنتين وأنا ماجبت حاجه من عقل بالي ..- كلامك صح لكن للذكر حصتين والأنثى حصّه هذا في الميراث وما هو في الأكل والشّرب ..- والميراث شو كان زمان يا فهمانه أي هو كان في زمان مصاري مهو الميراث كان أكل وشرب وغنم وبهايم ..- على راحتك لا تعصّب وكل واحد حسابه من عرقوبه وهالسّنه مين عازم على الفطور غير قرايبك ..- آه هذي السّنه كتير مهمّه ولازم نعمل تكتيك لأنّ المثل بيقول إطعم الفم بتستحي العين ، يا ستّي عازم شويّة ناس مهمّين مثل ما قلتلك لحتّى تمشي الأمور وتسلك الطريق وعلى الله التّساهيل والتوفيق ..- أي وضّح أكثر يا زلمه شو ناوي ترشّح حالك للانتخابات ..- قال إنتخابات قال أنا بخطط لحاجات فيها منفعة للجميع أمّا الانتخابات فكل واحد بيخطط لمصلحته الخاصّه  وكيف بدو يلهط بالأيد والملقط وبعد ما ينجحوا بينسوا الناس وحتى العايز والمحتاس ، قبل الانتخابات بيقلك يا حبيبي ويا قرابتي وبيعملوا من البحر مقاتي ، وبعد الانتخابات لا قرابتي ولا نور عيني  وحياتي ، أنا يا فهمانه بخطط أعزم عضو في البلديّه يعني مسؤول كبير لحتّى يشوف إذا كان بيقدر إيفوت هو بسيارته لشارع دارنا لأنّ الشارع مليان حفر ، ويمكن تتحرك فيه النخوه ويزفتوا الشارع يا ستي بلاش يزفتوا الشارع كلّه بيكفي  تصليح الحفر ويكثّر خيره وخير البلديه ومعروفهم بحطو على راسي ، وكمان بدّي أعزم مفتّش البلديّه لحتّى يشوف بسطات الدكاكين لأن كل واحد منهم دكانته فاضيه من الداخل وبيعرض بضاعته في الشارع لحتى صار مافي محل للمشاة ، يعني النّاس اللي رايحه والي جايه ، ومفتّش الصحّه  حتى إيشوف المجاري اللي نازله صيف شتا وفايضه في الطريق والسّبب انها ماسورة المجاري في الشارع عمرها أكثر من ثلاثين سنه وضيقه يعني رفيعه لمّن عملوها كان عدد الناس قليل لكن هالحين كثر العدد ولازم يعملوا خطوط أوسع بكثير، وعازم مسؤول التخطيط لحتّى يعملوا نادي مع ملعب للأولاد أحسن ما يظلوا يلعبوا في الشّوارع ، وكمان ناوي أعزم مسؤول الشّغل يمكن هالسّنه ما ينساني في درجه أو حتّى علاوه ، وصاحب محل البقاله لأنّه بيفش قلبي وقت الزّنقات وبيعطيني حاجات على الحساب ، وجارنا أبو أحمد كمان ..-  طيب يا أبو صابر لويش جارنا أبو أحمد من دون باقي الجيران ..- آه هذا سؤال وجيه وهون مربط الفرس اسمعي يا فهمانه بيقول المثل ’حُكلي تَحُكلك’ وقدّم السّبت حتى تاخذ الأحد’ أنا بعرف انّه عند جارنا أبو أحمد بنت خرْجْ الزّواج وأنا بفكر آخذها يعني أخطبها لأبنّا صابر وأنا بعرف كمان انك رايحه تقولي كيف وليش ؟ وأنا بقول لأن الزّواج هالأيام بيكلف بقرة جحا ، وانتي عارفه الطنجره وغطاها  وانت دايما بتقول أح بح لكن الجواب يا فهمانه أنّه أبو أحمد كمان عايز يزوّج إبنه أحمد وأنا عندي بنت يعني صبريّه أنا بفكّر وبخطط نعطي صبريّه لأحمد وناخد بنت أبو أحمد مزيونه لإبني صابر ..- يا خيبتك يا فهمانة يعني بدّك تزوج الولد بَدَلْ ..- أيوه بدل وبهاد الحالة بكون وفّرت المصاي يعني راس براس ..- لكن أنت بتعرف قدّيش مشاكل زواج البَدل ، إذا وحدة زعلت لازم الثانية تزعل واذا وحدة حِرْدْتْ التانية لازم تحرد وإذا وحدة اشترت حتى فستان لازم الثانية تشتري ، والأهم من هاد كلّه إذا وحدة اطلقت لسبب بطلقوا الثانية من غير ذنب ، يا رجّال بلاش هالزّواج والله بيرزقنا بنت حلال لصابر ، وأنا مستعدّة أعطيك قلادة الذّهب راضية مرضيّة ..- اذا كان هيك  معك حق يا فهمانة  والمثل بقول ’ إبعد عن الشّر وغنّيلُه ’ وأكيد لازم يرزقنا الله واحد فهمان وعنده دين وما بيطلب بقرة جحا لحتّى يزوّج بنته ، بعض النّاس ما ضل غير يعملوا مزاد على بناتهم والّي بيدفع أكثر بتزوج ، كأن الزّواج تجارة والّي مهرها أكثر شطارة .. لكن قوليلي يا فهمانه شو رأيك  نعمل طبيخ على الفطور قدر خليليّه  أو مناسف بالسّمنه البلديّه ؟ …
            وكل عام وانتم بخير .

       نشرت في جريدة القدس بتاريخ 17-8-2012
Be Sociable, Share!


أضف تعليقك

*

*
To prove you're a person (not a spam script), type the security word shown in the picture.
Anti-Spam Image

Powered by WP Hashcash