مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



خدمات عامّه

يونيو 4, 2012
0 views

  

                قوليلي مبروك يا أبو صابر ..- مبروك لكن على شو المباركه ..- يا ستّي استاجرت محل في وسط البلد ..- وشو ناوي تبيع فيه ..- يا فهمانه المحل للخدمات العامه  ناوي أبيع فيه شعارات ونظريّات وأقدّم خدمات يعني طق حكي لأن هذي البضاعه مطلوبه ومرغوبه بهل أيّام وسوقها ماشي مثل كتُب تفسير الأحلام ..- ما فهمت عليك يا زلمه شو يعني تبيع شعارات ..- هذا اشي أكبر منّك انتي خليكي للطبيخ والنّفيخ وهذي الأمور للفهمانين مثلي ، شعارات يعني كلام مزبّط وفكر مخطط ، وكمان نظريات كلامها مصفوف متل ورق الملفوف ومنمّق مثل نقْ الجاجه لكن اذا قريتيها ما بتفهمي منها ولا حاجه ، ووجهات نظر من كثر التعصّب بتعمي البصر ، وخطب للمهمّين وأشباه الأميّين ، ودعايه وتلميع ويافطات ، وأبواق طنّانه مع شويه زينه رنّانه  وسماعات ، وهتّيفه في المناسبات ، مع دبّيكه للاحتفالات ، وكل شي بسعره يعني ممكن يجي للمحل واحد أهبل أو مهفوف بلا قافيه لكن معاه مصاري احنا مستعدّين انحفظه وانزبطه ونلمعه ونرش هدايا على الجمهور ونحرق في الدواوين البخور لحتى ينجح ويصير بقدرة قادر مأمور ، وكل شي بالفلوس وبهذا الزّمن هاذ البضاعه ماشيه مثل كعك العيد والمثل بيقول فيد واستفيد ، كمان بهل أيام بيقول – قبّضني وانت عمّي بنتخبك بس فرّجلي همّي - وقبّضني بالدّولار حتى أنتخبك وأرقصلك في الزّار ، ورايحه تكون أسعارنا مقبوله ومعقوله مثلا للمجلس البلدي لازم دعايه وتلصيق اعلانات ، أمّا المجلس النيابي مع الدعايه والاعلانات لازم كمان هتّيفه في الاجتماعات ، أمّا الرياسه فلازمها فوق هذه كله كمان وقٌيفه وزُلمْ وأتباع علشان عند الشدّه يقفوا معاه بالباع والذراع ، ولكل مقام مقال لحتى تمشي الأحوال ، وفي المستقبل ان شاء الله رايحين نعمل فروع لبلاد برّه ونعلم شعوب الأرض الدّيمقراطيه الحرّه لحتى يستفيدوا من خبرتنا والكفاءات ، وشعارنا رايح يكون خود وهات ، وأبو صابر جاهز في كل المناسبات … ويا ويلك يللي تعادينا يا ويلك ويل مثل النّار تلاقينا في ظلام الليل …

           نشرت في جريدة القدس بتاريخ 7/9/2012
Be Sociable, Share!

  1. أحمد زايد Said,

    رائعة لأنها من واقع نعيشة نخجل منه ولكننا نصر علية نصر على الشعارات

أضف تعليقك

*

*
To prove you're a person (not a spam script), type the security word shown in the picture.
Anti-Spam Image

Powered by WP Hashcash