مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



يا يابا..

مارس 30, 2012
0 views

ِمِن يوم ما رَحلتْ عنّا يا يابا صارْ الحمِل عكتافي كبير
واجبِ الدّار مع الزوّار والحال معتّر تعتير
يايابا المسؤوليه تاريها كبيره والإيد قصيره
ومنِ الحيره شايلها في رقبتي مِثل نيرْ
لكن لا تِقلقْ يا بَيّ لأن إبنك رجّال
أنا قدْها وقدودْ ولشيل الحمل موجود وقدير
لأنّك ربّيتني وإبن السّبع أكيد سَبع بيصير
ومَرّت السنين والحال في تأخير
وجار علينا الزّمان وما عادْ في نَفير
قالولنا شويّة صبرْ وبعد الصّبر كل شئ بيصير
إستقلال مع دوله وابتنزاحْ عنكمْ الغمّه والزّوله
وبيغنّي الشّعب ميجنا وبيُرقص الفقير
وَمرّ الوقت وصار سنين وإحنا ناطرين
واللي صار خِربت الدّيره وإنقسمت العشيره
والكل إتخلى عنّا وما ألنا غير الله نَصير

ألإحتلال ما زال موجود والظلم بيسود
كل يوم حصار وأغلاق وإطلاق نار وتدْمير
وبضيقوا علينا عيشتنا
حتى صِرنا داخل قفصْ مِثل العصافير
يايابا خايفْ أوَرّثْ القضّيه لإبني مِن بَعدي
لأن عُمر الإنسان مِن القهرْ قصير
وزوال النّعمه إذا قلْ الحِرْصْ والتّدبير
يايابا صدّقني حطيتْ الأرض والزّيتونات في عيوني
لكنهمْ غَصبْ عنّي طردوني وجابوا الجرّافات تُهدر هدير
خلعوا الزّيتونات وهدَموا الدّار فوق العفشْ وأخدوا البير

قال في بْحدنا مُستوطنه لازمها بركة سباحه وتِكبير
وقالوا إذا بدّك مصاري بنعطيك بالدّولار والدّنانير
أقعٌد عاقل وغنّي للسّلام وحُسن الجِوارْ وإشتغل عِنّا أجير
إلحق ما هو عليّ يايابا وما حَصَلْ منّي أي تقصير
قاوَمتْ وصِحتْ بأعلى صوتي وملّيتْ الدّنيا زعيق وتَكبير
وينكوا يا عَربْ وين الرْجال
قالوا خليك بحالك جيوش العرب بهالزمن لبسوا تنانير
يايابا بَخاطبك وإنت ميّت لأن السّامعين طلقوا القضيّه
وما عاد في تحرير …

Be Sociable, Share!

  1. TotoSalcom Said,

    رائعه مشكووووووووور الى المزيد

أضف تعليقك

*

*
To prove you're a person (not a spam script), type the security word shown in the picture.
Anti-Spam Image

Powered by WP Hashcash