بحبك يا مصر

بحبّك يا مصر .. واحبّ نيلك
وهمس السّواقي .. ويّا ليلك .. بحبّك يا مصر
بحبّك يا مصر .. واحبّ فيكِ الأمان
وفي الفجريّه .. بحبّ صوتِ الودان
والمكن داير .. والعمّ صابر
وعيون بهيّه .. تزرع في الغيطان
*******
بحبّك يا مصر .. إن شالله دايما ًعمار
وبهديكي حبّي ونبض قلبي من دار لدار
يا صاحيه من كل ناحيه
من زمن مينا .. لثورة الأحرار
*******
بحبّك يا مصر .. واحبّ فنونك
وادعي ربّنا .. دايما يصونك
يا كبيره إنت الأميرة
وأحلى صوره  في  عُيونك .. بحبّك يا مصر
*******
بحبّك يا مصر .. وأفديكي بدمّي
عشان إنتي .. خالتي أخت امّي
يا ما حزنتي وضحيّتي عشاني
وياما إدّيتي .. وشلتي همّي .. بحبّك يا مصر
*******
جمايلك يا مصر كتيره علينا
مين إلّي باقي غيرك إلينا
هبّيتي جيتي
ولبّيتي لمّن نادينا .. بحبّك يا مصر
*******
بحبّك يا مصر .. يا بلد الثّوار
يا أم الدّنيا .. وسند الأحرار
وأرض الحضاره
والبطوله والإنتصار .. بحبّك يا مصر
*******
بحبّك يا مصر .. في كلّ لون ودين
وشباب الثّوره .. قالوها  بالميادين
مصر دايما حرّه .. وفي جبين الزمن دره
إيد بإيد ومتّحدين .. بحبّك يا مصر
*******
بحبّك يا مصر .. وحبّك نبينا
مدح شبابك .. يا ام طور سينا
والمسيح جالك .. وأمّه دعيالك
يا غاليه علينا .. وضي عنينا .. بحبك يا مصر
*******
يا مصري إنت أخويَ .. وهمّك هوّ همّي
والّي خانونا .. باعوا دمّك ودمّي
والدّم حينبت ورد أحمر
مصانع مزارع تنمّي
أرضك يا مصر .. بحبّك يا مصر  ..

Be Sociable, Share!

• 
•