مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



أرشيف سبتمبر 22nd, 2011

حايص لايص

سبتمبر 22, 2011

       بشوفك حايص لايص يا رجّال وقايم الدنيا على راسك imagesCAOIW8BRخير شو في ..؟ = يا فهمانه أنا بحضّر للاحتفالات من فتاش وزينه . وحتى ذبيحه سمينه ..= يا مصيبتك يا فهمانه شو ناوي تتزوّج وأنا مش داريه ..؟ = لا يا مستوره لحكايه وما فيها انّه كمان أكم من يوم رايح إيصير إلنا دوله ونصير مثل باقي الأمم . يعني دوله مع توابعها وعلم . ليش هو إحنا حظنا  ناقص ؟ ومو مثل خلق الله أي عليّ الجيره غير نعمل إحتفالات . ودبكه وسامر في السّاحات . ونرفع البيارق والرّايات . خلّي العالم إيشوف .ويصير كل إشي عالمكشوف ..= الله إيبشرك بالخير يا صابر يعني الاحتلال رايح ينسحب من لبلاد ويعود الفرج والفرح عالعباد . ويشيلوا الحواجز والتصاريح وينسر بالنا ونستريح ..= أي طولي بالك يا مستوره حتّى أوضّحلك الصوره . هذي يا ستّي خطوه أولى والخير جاي لقدّام والحركه بركه ولكل مجتهد علام ..= آه يعني مافي حاجه بدها تتغيّر ورايحين إنظل مكانك واقف ولا مين داري ولا مين شايف ..= لا لا تقولي هالكلام صدقيني غير نُزنق الاحتلال لكن القضيه عايزه طولة بال ..= وكيف بدّك تزنق الاحتلال والقوّه في إيدهم وعايزين كل الناس إيكونوا عبيدهم ..= آه رايحين نصير راس براس وند بند . عندهم دوله ونحنا دوله وما في حد أحسن من حد . وبهيك بينعدل الميزان وبيصير إلنا هويّه وعنوان وبيعملوا إلنا حساب وحتّى لكل العربان .. = لكن حسب كلامك بشوف انها البلاد راحت .وريحة الطّبخه فاحت . حتى لو طيّرت كل الحمام وحملت غصن زيتون إشاره للسلام . لكن قولك شو رايح ايصير بقضية اللاجئين وحدود 67 والقدس والمستوطنات والمساجين..؟=  يا فهمانه القضيه خد وهات وكلشي بيصير في المفاوضات . بدون اخناق لحتى يصير الاتفاق ..= لكن يا فهمان المفاوضات صارلها من زمن جدّي وهو ولد . ولحد هالحين الحال واقف وكله نكد . حتى حالنا بيرجع لورا كأنك مش داري شو الي جرى وبتقلي إنتي غشيمه يا مره ..= أنا عارف إنك مثل العظمه في الحلق وما بيعجبك شو بيعملوا الخلق . مع كل هالكلام أنا لازم أعمل إحتفال وأغني من راسي هالموال ..= أيوه ما بيعجبني لأن الحاصل مثل الرّقص عالحبل من غير لازمه ولا حتى طبل . قال دوله ونحنا مثل عصفور داخل قفص ومحسوب علينا كلشي حتى النّفس . يا فهمان بدّي أعرف كيف بدها اتصير دوله والاحتلال موجود وقاعد على قلبنا قعود . والمحتل بيقول هذي بلادنا وأرض لجدود . وما بيعترف حتى بوجودنا أو أي حدود . حتّى المسؤولين اذا صارت دوله وعايزين يغادروها لازمهم من المحتل تصريح . والبلاد مقسّمه كنتونات والفرقه بهل وطن والتجريح ؟..= مهو عشان هالسّبب يا فهمانه أنا بقول لازم إيكون إلنا دوله وبعدين بنطالب بكافّة حقوقنا وبالصبر رايحين نقهر المحتل قهر . ويرفع الرّايه البيضا ونعلن النّصر..= وبلا قافيه الدّوله شو رايحه تعمل النا..؟ أنا شايفه ما في منها غير الأسم وزيادة عدد الموظفين . ومراسم واحتفالات كل حين وصور المهمّين بتزيّن الميادين . صدّقني غير إتضيع القضيه وما يبقى من الوطن غير صوره مرسومه على النياشين . يا فهمان طول عمرهم رايحين جايين وبيقولوا مفاوضات وغراب البين . والنتيجه مكانك واقف مثل الي راح عالحج والناس راجعين . قالوا أوسلو رايحه تحل كل المشاكل وراحت أوسلو واختلط الحابل بالنابل . وبعديها عملوا 100 مؤتمر والنتيجه زيادة المستوطنات وعملوا جدار وزاد الطفر . يا رجّال الشمس ما بتتغطى بغربال . وما بيجيب الرطل الاّ الرّطلين ويا حسرتي عليكي يا فلسطين ..= هذا هو الي شاطره فيه كل حاجه بتعملي منها قوّاله وتشكي وتبكي من هالحاله . بقلّك الدّوله رايحه تحل كل المشاكل . حتى الحدود والبطاله والبخت المايل . وحتى لو كان قدها قد الحاكوره بنكون بين الأمم موجودين وفي الصّوره . وغير المندوب إيصول ويجول ويعمل عمايل . وكل الدول تقف بحدنا وناخد مثل ما بدنا ..= طيّب يا فهمان أنا ويّاك والزمن طويل لأنه باين عليك بتصدّق كلام طرطور البيت الأبيض الهبَيل . هذا كلامه ووعودُه مثل الطبل أجوَف وفاضي . وعامل من حاله واسطة خير وقاضي . والكل بيرقصله وبحُكمه راضي . والحقيقه انّه بيعمل مثل ما بيريد الاحتلال حتى يضمن لنفسه الكرسي ودوام الحال . والمثل بيقول ما بِيحُك جلدَك غير ظفرَك . حيّرت بالي وطول عُمري محتاره في أمرك …!!