مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



أرشيف يوليو 3rd, 2011

ست الحلوين

يوليو 3, 2011

ياما نطرتك بكّير بحد العين
والبنات كانوا حاملات جرار
ما بدري عيوني راحت لوين
تاهت من الزّغلله ما بين لقمار
كنتي بينهم زنبقه وست الحلوين
هدّى القلب وما عاد محتار
واختارك من بين كل الحاضرين
شعللت نار الغيره والعقل طار
والحلوات بلّشو الهمس مجتمعين
وابتدت الوشوشه وحكي الأسرار
قالوا عنّي شو معتّر وشو حزين
متل يلّي ناطر الصيف في أيّار
عملوا قصّتنا غنيّه مع التّلحين
وانتشرت لحكايه في الكون مع الأخبار
وصارت خبر بالجزيره مع عناوين
كأنها  ساحة  حرب  وجبهة  نار
وقالوا انّي  حبّيتك  من  سنين
وناطر شربة  مي  وشي  مشوار
وما  لقيت  منّك  غمزه أو  حنين
غير نظره  خجلانه  عباب  الدّار
لا تعذبيني  منشان  الله  وكل  دين
بقضيها بحد بيتك مشوار بعد مشوار
حتى اتطلّي من الشباك بنظرة عين
وايهل القمر عالكون وايشع أنوار
وبعد ما فات العمر واحنا ناطرين
ما  فقدنا  الأمل  مع  الأصرار
وبيوم قلتيها بعيونك لمكحلين
وبهمس الشفايف ما بدري شو صار
حبّيتك  وناطرتك  بكّير عالعين
مع ضمّة ورد وعقد ياسمين وأشعار
ويمكن غمره  صغيره أو تنتين
وموعد  حتى نلتقي  بشي  نهار
تيتعانقو بعد طول  فراق هالقلبين
ونطفّي جوا ضلوعنا  لهيب النار
ونعيش العمر بجنّة الحب  عمرين
حرام البعد والهجر وعيشه مرار
حتى نكتب قصة حب ما بين قلبين
العمر من غيرك بلا طعمه وكلّه مرار ..