مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



أرشيف يونيو 23rd, 2011

عتب ..

يونيو 23, 2011

              

    قالوا اعملوا اتفاق والأمور بتصير عال العال . وبعد نشاف ريق وأخذ ورد عملوا الأتفاق وغنوا هالموال . وطلعت القضيه من الأنعاش . ورقصوا الناس وأطلقوا الفتاش . والبعض من الفرح  ذبحوا الذبايح . وصارت ريحة اللحم والشوي في الحي فايح . قال عشان الخير رايح ايصير للركب . والمصاري اتهل علينا مع الذهب . ويفتحوا المعابر والفرج ايهل على كل ناطر . ونقيم الدوله وتنزاح عنا الغمه والزوله .. ومر يوم ورا يوم . ورجع القاضي يا ماضي والعتب واللوم . كأنك يا أبو زيد ما غزيت . وما انخلطت الميه مع الزيت . وصار الهمس واللمس . وارجعنا مثل ما كنا بالأمس .. قال المهمين مختلفين على اختيار رئيس الوزرا . وكل جماعه استعانوا بالمندل والخبرا . وكل طرف مصمم على واحد قريب منه . وبيزيح المرشح الثاني عنه .. شو فكركوا يعني ؟  نعمل مناقصه ونستورد رئيس وزرا . أو انفصل واحد تفصيل عالقالب . وننهي لحكايه لا مغلوب ولا غالب .. يا جماعه عيب اللي بيصير . فضحتونا بين خلق الله والحاله بدها تدبير . صدقوني أيد وحده ما بتصقف . واللي مش عاجبه يترك المهمه لغيره وايخفف . لان كل طرف بحاكورته جرب . ونيلها بستين نيله وخرب . مثل ما قال المثل (يا حواجبه يا عينيه . قال على المغتسل باين ).. خلصونا كرامه لدم الشهداء . والناس الغلبانين . والشباب الي من غير شغل قاعدين .واللي عالمعابر ناطرين . والطلاب والعيانين . القضيه ما هي تركه لحتى تقسموها بين اتنين . ولا طبخه على ملحها دايما مختلفين . واللي مش قد المسؤوليه ايزيح عن الطريق . واللي قاعد بالقصور ما هو مثل الغريق . لأنه ما بدنا أصنام . وراح الزمن اللي كان فيه الآلهه حكام … لا تآخذوني لأنها طقت في عقلي وما عاد في مكان للصبر . والكل بيقول ثوره حتى النصر ..!!

نشرت في جريدة القدس بتاريخ 7/6/2013