مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



أرشيف يونيو 17th, 2011

فيس بوك

يونيو 17, 2011


       شو مالك يا جاري معصب وغضبان مثل واحد متجوز أربع نسوان .- يا زلمه سيبني في حالي لانها واصله معي للخناق وما ظل بيني وبين مرتي الا الفراق .- الله يستر قلي شو الحكايه يا أبو صابر وفضفض عن قلبك . لأنك عزيز وغالي علي وبحبك .- قال فضفض قال والزمن صار عجب وتغيرت الأحوال . هذا يا سيدي مرتي الست فهمانه من مده بتزن على وداني . وبتقول ان عشت وربي خلاني . غير تشتريلي كمبيوتر ونت . وأنا مش ناقصه عن النسوان ولا عن أي ست . قال يا جاري بدها تعمل صفحه على الي بيقولو عنه الفيس بوك والماسنجر . وتولعها في طول البلاد وعرضها وتتأمر . عشان تدافع عن حقوق النسوان وتعملها ثوره في كل ميدان . ويوقفوا بالساحات ويقضوها زعيق وطق حكي وشعارات . وبتقول احنا كمان لازم نلحق بالثورات . وصارت تحضرمع الجارات  شعارات  ويكتبوا على القماش مثل ( واه الواه وين العدل والمساواه .. الست مثل الرجال ولازم يتغير هالحال ..  انت عليك القلي وأنا علي الجلي .. من غير زعل ولا نكد البنت مثلها مثل الولد  ) .- وين المشكله يا جاري  ماهي المساواه مطلوبه . والبنيان بيرتفع طوبه ورا طوبه .- آه هذا الي ناقص ما أنا عارف انك محكوم لمرتك وبتبصملها بالعشره . حتى لو قالت عن الفقوسه جزره . – يا جاري انت بتسميه حكم لكن الحقيقه هو تفاهم والحياه لازم يكون فيها تعاون بين الرجل والست لانها نص المجتمع . وبيكفي للرجال أنانيه وطمع .- شو هالكي قال تفاهم قال ! يعني بدك أصير أكنس البيت وأجلي الجلي . وأطبخ الطبيخ وأقلي القلي . وكمان أغسل الغسيل . وأقمع الباميه وألبس المنديل . طيب يا جاري افرض اني قليت عقلي وسمعت كلامك وشريت الكمبيوتر وصارت تقعد على الفيس بوك من الصباح للرباح وتنسى الطبيخ والنفيخ وشغل البيت . وأصير حايص لايص  مثل الميه في الزيت . وأقعد حزين وأندب حظي  وأقول يا ريت .- الأحسن يا جاري تتفاهم أنت وزوجتك يعني خليها تعمل برنامج لليوم . وبينقضي الوقت من غير عتب أو لوم .-  طيب قول هذي حليناها لكن المصيبه اذا المعدله صارت تحكي مع الرجال وتقلي هذا حكي صداقه . وياخذوا عقلها وتخربط بين الباب والطاقه . – اسمع يا جاري لو أنت اشتريت كمبيوتر وقعدت على الفيس بوك من الصباح لاخر  الليل . وحكيت وعكيت وغنيت مواويل . وشطيت ونطيت وقليت عقلك يعني كل هذا بيلبقلك . وزوجتك اذا قعدت واستفادت واتعاملت مع الوضع باحترام . يعني ممنوع عليها تقول رأي أو حتى الكلام . – يا عيني على هالراي يعني عايزني أجيب لحالي وجع الراس . وأظل مقلزه بين الناس . يعني بدك أحط الذيب بين الغنم وبعدين أصيح وياكلني الندم . واذا سايرتك وقلت موافق طيب شو رأيك بالبنات والولاد يعني بدك يشوفوا اللي ما بينشاف . لأني بسمع انه الكمبيوتر مليان مسخره .- يا جاري كلامك مزبوط الكمبيوتر مليان مسخره وسخافات . لكن كمان مليان ثقافه ومعلومات . وعالم مفتوح في كل الاتجاهات والوقت اليوم هو عصر المعلومات . والسوق مليان حلو وحامض ومر . وكل واحد بيشتري اللي عايزه وهو حر . حتى للولاد الكمبيوتر مفيد . والقصه مش عايزه شطاره أو تعقيد . ومع توجيه ورقابه وتفهيم وشرح للأمور دون تعتيم . والمشاركه في الرأي حتى الأمور تستقيم .- لكن يا جاري ضاعت ولقيناها واحنا عاملين هالحكايه قصه وقضيه وكنت نسيان بعقل بالي شر البليه . خير شوفي يا جاري .- انسيت أقلك انها مرتي الست فهمانه ساقطه ابتدائي يعني ما بتعرف القرايه ولا الكتابه وعامله كل يوم زعيق مثل شاعر بيغني على الربابه . قال بدها كمبيوتر وفيس بوك قال وتصير تعمل مثل نسوان الخواجات وتزيد علي المصيبه والطلبات . وأظل نازل طالع جيب وهات واليوم مشغوله وبكره عندي مؤتمرات .  وهي ما بتعرف اتفك الخط ولا حتى الوز من البط  . واذا كنت فهمان يا جاري قلي شو هو الحل  . لأن عقلي في راسي ضرب وقرب يختل . لكن اذا كان مفيد مثل ما انت بتقول أنا ناوي اشتري كمبيوتر  وأعمل صفحة فيس بوك لحالي لكن لمرتي فهمانه ممنوع واللي مش عاجبه يضرب راسه بالحيط  .- الله يهديك يا جاري وصدق مين قال ( شر البلية ما يضحك ) !! 

نشرت في جريدة القدس بتاريخ 5/7/2013