حكايه مصريه ..

 بيوم والدنيا ظلمه وبوسط  الزحام
 تاه الدليل وبحضن الليل ابتدا الكلام
 بهيه ناحت وبالسر باحت هبت وصاحت يولادي حرام
 حنا وعطيه دي الصحبه هي مسك الختام
 علمو الدنيا كيف التعايش كيف التسامح والاحترام
 بهيه امكم بتشكي همكم صاحت تقول لكم كفايه ظلام
 كلكم ولادي عليكم بنادي حرام الخصام
 واعلنوها ثوره امكم دايما حره
 مصر على الجبين  دره  بتعلم الدنيا الوئام
 قول لاخوك ايدك بايدي وعيدك هو عيدي
 ويا صحبه ايدي بثورة سلام
 نبنيها طوبه فوقيها طوبه
 ونشيل المعطوبه ونهدم فساد النظام
 بهيه قالت حطمو الجدار مفيش وقت للانتظار
 طيرو الحمام وازرعو المحبه وعلى الارض السلام 
 قالو البلابل ده العدل مايل واكلينها التنابل والظلم حام
 وبيوم في الفجريه صاحو ولادك بهيه
يكبير الحمل زاد والدايره علينا دايره
 ملينا الصبر وسنين القهر ..
 نعمل ايه يا كبير الغرام ؟
سرقو الفقير والغفير من التخمه نام
 وبتدت حكايه وكانت بدايه وكلمه ورى كلمه بقت روايه
 والروايه بقت مشاهد ..
 صور يبني وبلدك ابني والرب شاهد
 اصل الكبير ساكت والشله عابت
 نامت وهامت في دنيا الاحلام
 والكل ساكت والرزقه راحت ما فيش حتى خطوه لقدام
 وهبت هبه بقت قبه تعالو شوفو يا سلام
 هي شمعه بقت ولعه منوره دنيا الظلام
 وقف الشعب في الميادين من كل لون ودين
 وهتف يا كبير سنين واحنا صابرين
 عايزين شغل يا كبير عايزين لقمة العيش
 والبطاله عايزه تدبير والحاله عدم ما فيش
 وبيوم طل الكبير وقف وقال
 كل حاجة حتتصلح والحال حيبقى عال العال
 والكل حيكون راضي من اليمين حتى الشمال
 وهمس في ودان مامور الشله والاعوان
 شوفو صرفه مع دول العيال ..
 ادوهم بالشومه وكتفوهم بالاغلال
 وعلموهم ازاي الكلام قدام الكبير بينقال
 دول شوية مشاغبين وانا قاعد على قلبهم
 ايه يعني لو زاد حبه صبرهم وغلبهم
 فين الولاء للكبير والاحترام ؟
 مش عايز صوت بالساحات لاني عايز انام!
 ونام الكبير والشله اللي هي خافت يتفضح سرهم
 وجابو البلطجيه شالو القناع عن وشهم
 وبانت النيه  لكن الشعب كان صاحي
وقال الشهيد بروي تراب الوطن بدمي وجراحي
 دي الثوره امانه كملو المشوار
 حتى اكون راضي وتكمل افراحي ..
 ومرت الايام والكبير ما سمعش النصيحه
 والحاله بقت بطاله ورجعت لورى
 قتل ونهب ضرب وسلب اهو دا اللي جرى
 ورجع الكبير تاني وقال نحقق المطلوب
 وكفايه بقا خليها سماح
لا غالب ولا مغلوب واللي راح راح
 لكن الشعب ما سكتش عن حقه المسلوب
 لان الحر حبه لبلده دايم وما يتوب
 ازاي يسامح حرامية الانفتاح
 ومليارات تسرقت والم وجراح
 ويوم الجمل كان يوم مشهود ..
 ياما سمعنا منك يا كبير كلام ووعود
 ووعودك كلها سراب ووجودك بيزيد العذاب
 ما فيش فايده منك فيلمك قديم متل فنك
 كفايه بقا سيب الحمل عنك
 ارحل ارحل حرامي لانك ..
 وخلص الفصل الاول من الحكايه
 والكبير رحل وابتدى الفصل التاني  من الروايه
 وبهيه قالت يولادي ما تناموش
 لان الحاله عايزه تدبير..
والرحله بعدها باولها ويالله بينا نكتب مصير
 شد الهمه يا عطيه ..
 ويا مرقص تشيل القضيه
 واللي فات مات ..
 ياما اشتكيتم من نار الغلب والاهات
 والظلم طال الكل وانتم اخوات
 ابني وعمر دي الفرقه تدمر وكفايه نكبات
 الخير كتير ومهما يصير ده الدم واحد  والغلب فات
 بهمة  الشعب  وبهمتكم نعيد بناء النظام
 عيشو باخوه ومحبه وطيرو الحمام
 وعلمو الدنيا ازاي عملناها ثورة سلام