مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



أرشيف يناير 7th, 2011

كمان مره ..

يناير 7, 2011

         صباح الخير يا أبو محمود .. – صباح الخير والسعاده والكنافه السخنه مع قطر ازياده . – اعملي ارغيف ساندويش امرتب على كيفك ولا تنسي الشطه . – خلاص يا سيدي شطبنا ..يعني عيدت . بدنا انغير الصنعه .. والمثل بيقول ( شو بدو السوق سوق ) . – شو يعني .. ما فهمت . قصدك ناوي تحرمنا من كبابنا الوطني .. صدقني ارغيف فلافل من ايدك ما اله مثيل .. وحتى بيشفي القلب العليل . – يا جاري التجاره شطاره . وبيقولوا البضاعه في السوق عرض وطلب . وشغل الفلافل ما عاد بيبل الريق .. ولا بينجي من الهم غريق .. قضيت عمري وأنا ورا مقلى الفلافل .. وغير الشقا والهم ماني طايل . – لكن شو ناوي حضرتك تعمل ..؟ لا تقول ناوي أعمل صالون حلاقه عالموضه . ولا أبيع كستات غناني للمطرب عيضه . – لا موضه ولا عيضه .. ناوي يا سيدي أعمل شركة استيراد وتصدير . وهذا مشروع وطني كتير كبير .والهدف منه تبادل الخبرات وشعار الشركه خود وهات  - وشو ناوي  تستورد واتصدر يا أبو محمود ..؟ اتعودنا على أكل الفلافل .. والغلب والبخت المايل .. يا زلمه لا تقطع فينا .. واذا كنت زعلان حقك علينا . – يا جاري لا حق ولا مستحق .. وأنا ماني زعلان لكن الوطن واقع في مشكله عويصه .. وأنا لقيت الحل . وانشالله رايح أرضي الكل . – وشو هي المشكله والحل يا أبو محمود ..؟ جود علينا بأفكارك جود . – هذا يا سيدي كل واحد في هل بلد عامل من حاله مسؤول . حتى صاروا المسؤولين البركه من ألله على قفا مين ايشيل .. وبتلاقيهم امفصلين الوظايف علشانهم تفصيل .. وبيقولوا حتى الكل ايكون راضي . وما ايكون في عنا حدا فاضي . دستور يا أسيادي .. في عندك الجماعه الي فوق وبعدين الوزراء ووكلائهم والمدراء ونوابهم . والجماعات كل جماعه الها كبير . ومجالس قياده من أجل التحرير ومنظرين من كل لون ودين .. والحمد لله في عنا أجهزه فشر أميركا ايكون عندها مثل عددهم . ويخزي العين كلهم رتب عاليه ..! وعددهم أكثر من الموجودين في حلف وارسو . وغير المؤسسات والنوادي والجمعيات والمجالس والبلديات والقيادات والفعاليات . والقائمه طويله طويله . وما في باليد حيله .يا أخي الكل عامل من حاله مسؤول وبيقول أنا الفهمان وغيري غشيم .. أنا الأصل والفصل والقديم . حتى الحاجب في المؤسسات بيصول وبيجول وعامل من حاله مهم ومسؤول ..! والمهمين عنا مثل الهم عالقلب .. حتى ما عاد بقى في عنا شعب . – لكن يا جاري بعد سرد هالمقامه بخاف عليك تلحقك الملامه . – أبدا أنا بعمل للصالح العام وصالح الوطن .. وكل عملي خدمه للعباد .. ونيال من فاد واستفاد . الشركه يا سيدي رايحه تتعامل مع بلاد كثيره بينقصها قيادات ومسؤولين ومنظرين وكفاءات .. واحنا رايحين انصدر هذي الخبرات والكفاءات ونستورد بدل منهم شعب .. من الدول الفقيره والغلبانه . وبهل حال بنكون ساهمنا في تطوير بلدان كثيره من غير عدد .. ودخلنا عمله صعبه للبلد . والمثل بيقول الحركه بركه . وبعد حين بنكون سيطرنا على العالم .. وبيصير الكل يتكلم عربي . – يا عيني شو هالأفكار الجباره .. أي صدقني لازم يعملولك تمثال . وصدق من قال ( شر البلية ما يضحك ) . وما تنسى يا جاري اتشوفلي منصب كويس في بلد غني .. لكن أقل من مدير عام ما بقبل …!      سامحوني .