مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



أرشيف أكتوبر 10th, 2010

قالت شهرزاد

أكتوبر 10, 2010

           قالت شهرزاد.. بلغني أيها الملك السعيد أن الاتفاق قد تم بين الاشقاء بعد طول خصام وعداء . وبعد طول قحط قد هطل الشتاء ونبت الزرع يانعا وعم الرخاء . وأقيمت الافراح والليالي الملاح . وعادت المياه الى مجاريها والالفه والمحبه عمت المدينه وضواحيها ..- شو قاعد بتكتب يا زلمه ..؟-  قاعد بحلم يا مستوره سيبيني بحالي قطعتي حبل أفكاري…-  طول عمرك ابتكتب وكلامك لا قدم ولا أخر مثل البطم الذكر عمره ما أثمر..- يا ستي ألذنب ما هو ذنبي لكن اذا في واحد بيزعق بين طرشان الحق ما هو عليه يمكن الحق علطليا ن . لكن  أنا بدي أظل أزعق وماني يأسان وبقول عمر الدم ما بيصير ميه ولي قاعد بالشمس ما هو مثل الي قاعد بالفيّه . والصخره الكبيرة ابتتكسرمن كثر الطرق لكن انتي ليش محموقه هدي أحسن لا ايطق الك عرق ..- أنا محموقه لانه حلمك صعب يتحقق عشان كل واحد قاعد عالكرسي بيقول أللهم أسألك نفسي . والسبب يا فهمان عشان قالوا كيف بدنا انحل مشكلة البطالة ونعمل لكل مهم بهل بلد منصب ..!-  وكيف حلوها يا فهمانه ..؟- آه حلوها قالوا ابنعمل حكومتين وبهيك بيكون عنا بدل ألوزير وزيرين وقيس على نوابهم ووكلائهم ومدرائهم وأتباعهم . هذا غير المؤسسات والاجهزه والجمعيات وبهل حال اشي بيقبض من ألشرق واشي من ألغرب . وناس بيقولوا بدنا سلام وناس بيقولوا بدنا حرب .وبهيك بنشتت فكر ألاعداء وما بيعرفوا النا راس من طاقيه   وان طال الخلاف هذا خدمه للقضيه ..- عظيم وكلامك  معقول يا فهمانه لكن كيف غابت عني هل حكايه أي صدقيني ابتنفع مسلسل مع روايه . يا عمي مين قدنا ابتعرفي شو أجا في عقل بالي …-  قول يا أبو الافكار ..-  بقول لو بيعمموا هل فكره على كل حاجه يمكن اتصير الدنيا مثل أللحمه في لكماجه . يعني مثلا يتزوج كل رجال ثنتين حتى انزيد في العدد وانحل مشاكل ألخناقات والنكد . يعني اذا زعل الواحد من زوجته بيروح للثانيه وبهيك بيصير مدلل ومثل ألمنشار بيقصها عالوجهين ..- أي جيزه اتطق عينك هذا هو الي فكرت فيه ..-  يا فهمانه هاذا حل للمشاكل والبخت ألمايل يعني مثل حال الناس الغلابه شو ذنبهم ..-  يا فهمان رأيك بيزيد المشاكل لانه اذا في أكثر من راس للجسم بيظل مايل ..- لكن في ناس حلوا هالمشاكله وحتى ايكون ألكل عنهم راضي قالوا واحنا مالنا اذا كان ألقاضي راضي . لبسوا حطة نصها أسود والنص الثاني أخضر ومن النص ربطوا بدل لعقال شريط أحمر . وبيتنطنطوامثل السعدان وبيرقصوا في كل مولد عالطبل والنقرزان ..- يعني فكرك عن الناس الي بيرقصوا على حبلين ..!؟- يا ستي مهم ابيقبضوا من الطرفين وبيقولوا نيال من فاد واستفاد . وصوتهم بينفع للمستقبل هذا من غير شر اذاحصل حل . والمثل بيقول أكل العيش عايز الخفيّه . واللهم أدم الخلاف بيننا وكلنا في خدمة القضيه …!!؟؟

                نشرت في جريدة القدس بتاريخ 8-10-2010

فتاش

أكتوبر 10, 2010

                   

 يعني فكرك دار أبو ألعيد أحسن منا .. روح يا ولد اشتري فتاش بهل ميتين دينار عشان الفرح .. أي علي الجيره غير أخليها تولع ويقولوا عرسك يا ولد ما صار مثله في ألبلد وغير ألدبيكه يخزقوا ألارض والكولا والفواكه ممدوده بالطول والعرض وشقفة أللحمه  اتكون أكثر من وقيه وكل هذا لعيونك يا ابن مرضيه ..-  طول عمرك رجال وبتقوم بالواجب لكن بيقولوا انهم منعوا ألطخ والفتاش . شو فكرهم ما بدهم ايفرحوا ألناس ناقص ايقولوا ممنوع الرقص حتى في ألعراس ..-  يا ستي ايقولوا شو ما ايقولوا أنا بعمل الي في راسي ولازم أفرح عزوتي وناسي وأنا عندي أهم شي الفتاش ومن غيره ألفرح بيسواش . شوفي مين بيدق عالباب ..-  هذا جارنا أبو ماجد ..- قوليله يتفضل أهلا وسهلا بجار ألرضى أبو ماجد أي والله اني مشتاقلك يا زلمه ..- أهلا وسهلا فيك وأنا مشتاقلك يا جاري وقلت أجي أباركلك بالهمه بزواج ألولد وانشاء ألله ألتمام عخير ..-  الله ايبارك فيك وعقبال عند حبايبك ..-  يا جاري أنا عايزك كمان بموضوع ثاني ..- اتفضل قول وكلامك مسموع وعالعين والراس ..-  أستغفر ألله يا جاري انت ابتعرف الشارع الي بيوصل بيوتنا الحفر فيه للركبه لا ابتعرف تمرق منه سياره ولا حتى حماره . والمجلس بيقول ما عنده فلوس لحتى ايقبض موظفيه وهذا الشارع بيخدم أهل ألحي . وفي فكره انا نجمع مصاري يعني انلم لمه حتى انزفت الشارع ونتعاون الجميع . وأنا جاي لعندك وعشمي فيك كثير حتى اتساهم في الي تقدر عليه حتى لو خمسين دينار بينفعوا. لان المثل بيقول شعره على شعره بيعملوا ذقن . وكمان هذي صدقه جاريه ها شو رأيك ..؟ –  والله يا جاري جيتك عزيزه وغاليه على قلبي لكن انت عارف الحال والاحوال يعني لو تتركلي هل موضوع شويه لبعد زيجة ألولد . ما انت عارف مصاريف ألفرح . أي صدقني كنت امفكر انك جاي تعرض علي ألمساعده وتقلي اذا ناقصك شي يا جاري ..-  معلش حقك علي يعني هذي كلمتك ألاخيره ..-  أيوه لا تاخذني وسعيك مشكو ر..-  بشوف جارنا طلع مثل الزعلان ..-  يزعل ولا يشرب ألبحر قال يا ستي عايزني أتبرع مصاري لتزفيت ألشارع أي هو شارع أبي  ناقص ايقول كمان نعمل بستان مع مراجيح للاولاد ..- أو ماله ايكثر خيره أي صدقني معاه حق ألشارع صار مثل ألعمى وما في حدا سائل ..-  يا ستي لو في مهم ساكن بالشارع كان اتزفت من زمان . يعني فكرك أنا حكومه حتى أزفت ألشارع  ناقص اتقولي أساهم كمان في دفع ألمعاش ..-  صدقني أحسن ما تدفع ألف شيكل للفتاش ..-  كلشي ولا الفتاش يا مرضيه لكن عشان خاطرك بدفع وبيعوض ألله بهل عشر دنانير حتى اتكوني راضيه …!! فتاش بميتين دينار وشقفة اللحمه أكثر من وقيه وللشارع عشر دنانير بتردد . لا أريد أن أقول أكثر من كلمة  عييييب ..!!؟؟

            نشرت في جريدة القدس بتاريخ10_9_2010