مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



مقدح غلب … !

أغسطس 7, 2010
0 views

   

   عبادالله اوصيكم واياي بتقوى الله , وحق الجار على الجار وان جار . وصلة الرحم وكف الاذى عن الطريق . ومساعدة الملهوف والغريق . والاحسان للضعيف ولو برغيف . فان الدنيا الى زوال , ولا يدوم حال من الاحوال , يوم لا ينفع مال ولا بنون , ولا كنوز الارض وما تبنون , واوصيكم بالعلم وصقل العقول , ونبذ الفرقه والخرافه والحديث بهما يطول , واستغفر الله لي ولكم . هذا ما كان يعظ به الشيخ رضوان . في كل جلسة ومكان ..,كان يلبس على طريقة رجال الدعوة , ذقنه مخضبه بالحناء , يلبس معطفه الاخضر صيف شتاء , وينتعل البابوج بدل الحذاء , ولكل طريقته وله الاحترام والامتنان , لاكن بيت القصيد ما قد كان ….. جائت اليه ملهوفه..- يا شيخ يا شيخ انجدني يا سيدي من الظلموني او مثل الخرقه رموني . و من ابني و حبيب قلبي حرموني ..- خير يا حرمه .. شو القصه..؟ يا سيدي هذي كنتي وامها الله لا يوفقها ما بتخليني انام لا ليل ولا نهار , وهي قاعده قدامي في الدار …- وما هيه المشكله . افصحي يا مستوره ..- قال مستوره قال..ما هي شلت عرضي , وخبطت في ارضي . وخطفت عقل ابني عواد , حتى صرت انا في واد , وهو في واد …- لاكن شو بقدر اعمل انا. حتى اشيل عنك الضنا..؟ – قال بتقدر تعمل قال . وانت بايدك كل الافعال . وتغير هالحال , عايزه تفكلي عمل حماته, ويربي بنتها بعصاته . – ليش هي قريبه الي ولا عقلك ترللي ؟- لا..لاقريبتك ولا نسيبتك .. ما انا قلتلك هذي كنتي يعني مرت ابني اللي ربيته كل شبر بنذر , انقلب علي وانا بموت من القهر , وعايزه تعمل لي حجاب والك الاجر والثواب … – لكن يا مستوره هذا الحكي كله دجل وكلام شعوذه وحيل … – لا يا سيدي , ماهو السحر مكتوب , والمكتوب ما منه مهروب , او هذا عمل خير ..و ما في مضره للغير …- طيب الكلام في الشارع غير مستحب , الاحسن تحضري لعندي في البيت بعد صلاة العصر , حتى انظرلك في الامر , لكن ديري بالك انا شيخ ماني فتاح .. ولا تخلطي البصل بالتفاح ..!- حاضر يا سيدي .. يكثر خيرك والله يجيرك ….. دخلت ام عواد الى منزل الشيخ وهي تحمل تنكة زيت وضعتها بجوار الباب , فاستقبلها الشيخ بالسؤال والعتاب ما هذه التنكه.. ؟ – هذي يا سيدي هديه , والنبي قبل الهديه ,ماهم بيقولو المصاري حرام وانت شيخ بتعمل لقدام … – وعلشان شو هالزيت والهديه .؟ – يعني عامل حالك مش داري , ولا حاسس بقهري وناري, ياسيدي عايزه قصقوصة ورق , يعني حجاب , ماهو يا سيدي انا زمان عملت لجوزي الله يرحمه حجاب , وصدقني صار يسمع كلامي ويمشي بحدي ماهو قدامي , وصار يحلف بحياتي , ويقول راح اعزك لمماتي .. ها..شو قلت ياسيدي ..؟ – قلت اذا مافي حله عني , بكتبلك دعاء وابتهالات مني .. وانشالله بتتحسن الحال .. والفرقه تذهب الى زوال …- اكتب مثل ما بتريد .. وكثر من الدعاوي وزيد …-  ولكن لا اريد قبض ولا صرف …-  لا يا سيدي .. هذا الزيت هديه واذا صار المطلوب الك كمان جبه وهذا نذر علي.. -  طيب .. اذا كانت هديه فلا بأس بالاساس , على شان ما توقع الفاس بالراس , وتقولي قبض الشيخ , وتفيح ريحتي متل الطبيخ .. واخذ يتمتم ( انما الاعمال بالنيات , ولكل امرء ما نوى ) لكن اريد ان اعرف الموضوع بالتفصيل , حتى استطيع الكتابه والتحليل …- اسمع يا سيدي كان الولد الحيله والفتيله , ربيته كل شبر بنذر , وكان يبوس ايدي صبح ومسا , وعمر قلبه على ما قسى وكان يشاورني في كل كبيره وصغيره وكان هو الجوز والابن والاخو والعشيره .. قلت في عقل بالي خليني اجوزه وافرح فيه ودعيت من قلبي ربي يخليه ,… قالو عنها من عيلة ومستوره . خلقتها مثل القمر و الصوره , بنت اصل وفصل .. وجوزته وعملت فرح مع دبكه وطبل , ومرت الايام وانا عيني ما تنام , تاريها متل حيه من تحت تبن , وامها معجونه باللؤم عجن , او من يومها تغيرت في ابني الحال , كلام بينحكى وكثير ما بينقال .تاريها اخذت عقله بنت الحلال , او ما عاد يسال عني بكل الاحوال . ونسيني ونسي اني امه ,او ما عاد همي هوه همه … قالو النسوان والجارات هذي حماته عاملتله عمل , مربوط برقبة حمار او ذيل جمل ..! قلت لحالي لازم افك العمل وهذا يا سيدي اللي حصل … دلوني على فتاحه اسمها ام نعمان , بيقولو انها شاطره ومخاويه الجان ,ومشهوره بالشرق والغرب وكل البلدان , او بيقولو عنها انها بتلقي جبل على جبل , وبتعالج الملموس والمنحوس وحتى الحبل , او بتفك المعقود وبترجع البعيد والمفقود مثل ما قالت ام عبود. ورحت لعندها وشكيتلها همي وناولتها المعلوم . قلت خلي القيامه على راس حماته تقوم … قالت ولا يهمك كل طلباتك بتصير يا اميره يابنت الأمير , لكن حضري (كعكبان اسطوح . و خيال ميدنه . وفاسوخ . وبعرة فار عزابي ) بتلاقيهم عند عطوان العطار… وحضرت يا سيدي كل المطلوب , حتى لو قالت البسي ثوبك بالمقلوب وارجعت لعندها .لقيتها عامله ثلاث حجابات (مقدح غلب . ورصاصة عزب . وحجاب قالت حطيه تحت الباب) ..! وعدا شهر قول شهرين , وانا قلبي يا حسرة ناطر حزين , وما تغير الحال وما هديلي بال . وعاودت عندها وقلتلها ما نفعت كل الاعمال , وبعد ابني عني طال , قالت يا مسكينه اخواتي الجان قالو انو معمول لابنك عمل على طبخة مقلوبه , اكلها عند وحده على قلبه محبوبه .. واذا عايزه ينفك العمل .. لازم تجيبي ناب فيل , وشعره من راس واحد اسمه قابيل .. وسالت يا سيدي عن ناب الفيل قالو انو في بلاد بعيده , وانا يا حسره وحيده , سالت عن قابيل قالو اسمه ماهو موجود بالدليل , وقلت لحالي . ما الي غير سيدي الشيخ يطمن بالي , حل يا سيدي هالمصيبه خليني وحده من خواتك او قريبه , ماهم قالو عنك انك بركه وقاري ..وكل المطلوب تعمر داري , وتفك العمل المربوط بذيل الجمل ..! – مثل ما قلتلك يا مستوره  بكتب لك دعاء وليس بحجاب واسال الله التوفيق والثواب …-  انا فاهمه يا سيدي وقاريه للصف الرابع , وبيتنا بحد الجامع , وبصلي وبصوم , واذا نفع اللي بتقول عنه مرحبا بك بالمعلوم . جلس الشيخ الى طاوله واخذ ورقه وقلم وهي جالسه محدقه به مبهوره مشلولة الاحساس , تمني النفس بقرب الخلاص . والشيخ يسطر على ورقه ما تيسر له من كتابات . وبعد ان طوى الورقه ناولها لها مع الدعوات . بان يتم المقصود وابنها الى حبها يعود , مضيفا . ضعي هذه الورقه في مخدة ابنك واسال الله ان يهديه ويحميه من كل سحر وكل من يعاديه . ويسمع كلامك ويمشي ورائك ماهو قدامك ..! اخذت الام الكتاب , وتحينت الفرصه لتضع الحجاب . وكان لها ذلك بعد انتظار وعذاب . كما قال الشيخ رضوان , في مخدة ابنها الغلبان , واخذت تنتظر النتيجه على احر من الجمر , ولم يشغل بالها غير ذاك الامر . ومرت الايام .. وفي احدى الليالي بينما كان المحروس نائما اخذ يتحسس الوساده , فلمس بها شيئا غريبا وبعد فتحها اخرج منها تلك الورقه وفتحها وراى بها كتابات مع مربعات واحرف ومثلثات وطلاسم بعضها مكتوب بالاحمر والاخضر .. ! اخذ المحروس يصيح سائلا زوجته عن مصدر هذه الورقه بعد ان كبر جهده وتصبب عرقه . فاخذت زوجته تحلف الايمان بانها لا تعلم شيئأ عن هذا الشان . لكنه لم يصدقها واخذ يلعن اليوم الذي اقترن بها مهددا اياها باوخم العواقب وانه سوف يعرف الحقيقه وانه لأمه ذاهب … اخذ يطرق الباب على امه التي افاقت مذعوره  …- خير يا يما …- قال خير .. شوفي مرتي شو عامله .. عامله الي عمل يا يما .. وتناولت الام الورقه وهي تنكر علمها بها بسؤالها.. وين كانت الورقه يا بني ؟ – كانت في المخده ..- اعوذ بالله من نسوان هالايام .. اذا ما كانت مرتك .. اكيد  بتكون امها . ولازم تشكيها لخالها وعمها ودير بالك على حالك يايما .. قالت ذلك وفي اعماقها فرحه منسيه بعد ان تجاهلت علمها في القضيه ولسان حالها يقول .. لقد نفع عمل الشيخ رضوان وجاب نتيجه .. يا فرحتك وسعدك يا رهيجه… – انا عايز انام عندك …- نام يا بني .. مهو المثل بيقول ما الك غير امك هي اللي بتشيل همك . مهو الحق عليك على شان نسيتني او مثل الخرقه رميتني … – لا يا يما .. حقك علي .. انا غلطان وكتير ندمان وبستاهل الضرب بعود خيزران وبعد هالعمله لازم اطلق مرتي … – طلقها وانا بجوزك احسن منها ( وبحلي الشيخ اللي فرقك عنها قالتها باعماقها ) قالتها وهي راضيه قريره العين وعيناها تلمع فرحا مثل غراب البين ..! ذهب المحروس في اليوم التالي الى الشيخ رضوان طالبا منه ومخبره بطلاق زوجته وسائلا عن الاجرائات . فما كان من الشيخ الا السؤال عن السبب . فناوله المحروس اداة الجريمه تلك الورقه اللئيمه .. واخبر الشيخ بما حصل . وبعد ان فتحها وعلم انها ورقته ارتعد الشيخ واخذ يتمم لا يدري بماذا يجيب الا ان قال اسمع يابني الله اعلم بالحقيقه اترك هذه الورقه معي وسوف اعمل الليله مندل . وغدا اخبرك بما حصل واشير اليك بالحل. استجاب المحروس الى طلب الشيخ .. وعاد الى بيته ابعد ان غادرته زوجته الى بيت امها لتشكو لها همها . فقالت الام لابنتها لو بيوقف قدام الدار مثل شجره عمره ما بيشوف وجهك يا قمره ….! وسلامتكم يا سامعين ..ببشركم في فتاحه جديده فتحت اخر الشارع على اليمين ..  الدور التاني فوق بقاله ابو الامين . زوروها .. تجدو ما يسركم .. بتحل كل المشاكل وبتعدل البخت المايل . وبتداوي من الامراض وبتعمل حجابات وبتفك العمل واللمسه والطمسه وحتى الهبل . وبتشوف البخت والطالع . والناس عليها بالدور اشي نازل و اشي طالع   اما الكلفه بتنفع نقدي او بالدين . والسعر من الالف للالفين . والمثل بيقول رزق الهبل عل مجانين .. وسلامتكوا من الحجابات ويديم علينا بركة الفتاحين والفتاحات. ….!!                                                                               

         نشرت في جريدة القدس بتاريخ 27 -1 -2008
Be Sociable, Share!

  1. ريم Said,

    ما دام شغلهن مضمون جبلنا كم وحده تعملنا عمل لكل هالانظمه المستبده بلكي حلت عن ظهور هالامم .

أضف تعليقك

*

*
To prove you're a person (not a spam script), type the security word shown in the picture.
Anti-Spam Image

Powered by WP Hashcash