مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



أرشيف أغسطس 1st, 2010

همسه لها ..

أغسطس 1, 2010
 

 قال صابر لأبيه .. – زوجني يابا…. – يا بني اذا بتظل هالحاله مثل النخاله يمكن أطلق امك..! – يا خيبتي عليكي يا فهمانة .. شو ناوي اتطلقني يا أبو صابر … – يا فهمانة انا قصدي اشرح للولد عن الحال ، وهذي قواله بيقولوها بالامثال … – أيوه عايزني اصدقك وتوكل بعقلي حلاوه ، وأنت كل يوم بتهندز بحالك وتقف قدام المراية .. ليكون شايفلك شوفة ، وبتشوفني مثل الجاجةالمنتوفة..؟ – هي انتي قلتيها بعظمة لسانك ، ما انتي واقفتيلي كل يوم مثل شيخ الغفر ، وشعرك منبوش مثل واحد قاتله الطفر ، وفستانك ما غيرتيه من العيد مع انه عندك عشرين فستان جديد … – يا ابو صابر هذولا الفساتين بلبسهم في الافراح والمناسبات ، علشان ايقولوا مرت ابو صابر مثل الحلوات … – يا ستي انا ما بيهمني شو بيقولوا الناس ، المهم أنا اشوفك وأعبي الراس . المرة الفهمانة كل يوم ابتعمل (لوك) جديد لجوزها ، وبتظل حلوة مش لاوية بوزها ، علشان جوزها أيحبها لازم اتحسن منظرها ، وما ينظر لغيرها ويقهرها ، اي عليّ الطلاق فقعتيني وخليتي الشرار يطلع من عيني … – هون عليك يا رجال ، بشوف عقلك انقلب واتغير فيك الحال ، وارجعت شب صغير، وعايزني اتزوق وأكون مثل العروس وأنت الامير ، يا رجال احنا كبرنا وصار عنا ولاد .. شو بدك ايقولوا اذا الماضي عاد .. – ايقولوا شو ما ايقولوا .. يعني أحسن اتظلي مثل البومة ، ولا مثل فواتير الحكومة ، فكيها شوية وعدلي الحال ، علشان انا طقت في عقلي ويمكن أغني هالموال … – يا رجال انا طول نهاري محبوسة وقاعدة بالبيت ، مثل الزير بالقرنة لا رحت ولا جيت . وأنت حضرتك داير اتبصبص على النسوان وبلي عندك ما اكتفيت … – يا ستي انا بلّي عندي راضي وقنعان ، لكن القصة عايزة شوية بهار مع زعفران ، لانه الطبخة اليّ ما فيها بهار الأحسن تنحرق بالنار ، لانه بكيون ما الها طعم ومنظرها بلا قافية مثل الفحم … – لكن يا أبو صابر النسوان اليّ بيتزوقوا هم أل بيشتغلوا … – شو قصدك يعني .. اي هذا الّلي ناقصني .. يا فرحتك يا أبو صابر ، شو بدك ايقولوا عني الناس ، امشغل مرته علشان تصرف عليه وأصير مقلزه في البلد وأسمع تعليقات من غير عدد . عايزتيني أصير طرطور بين الناس .. لا يا ستي كلامك مرفوض من الأساس أحسن ما تقع الفاس بالراس … – شو فيها يعني لو اشتغلت ، مهم بيقولوا انها البنت صارت مثل الولد ، والمرة لازم تشتغل وتكون لزوجها سند ، والشغل ما هو عيب ولا سرقة من الجيب … – شو هذا يا فهمانه ..؟ بتقولي انه الولد مثل البنت . والزلمه مثل الست .. اي ناقص اتلمي النسوان وتطلعوا مظاهره .. واتقاهروا في الرجال مقاهرة . وتقولوا عايزين مساواة واتشقلبوا موازين الحياة .. الظاهر انك بتشوفي برنامج كلام نواعم . وانا مضروب على عيني ونايم … – يعني ما بدك اشتغل ولا اشوف تلفزيون كمان . وانت كل ليلة ابتسهر للصبح وبتشوف حاجات اشكال والوان … -ايوه… انا بشوف لاني مقهور وبعاني الحرمان ومكتوب علي الصوم حتى في غير رمضان . وانا ما قلت انك ما اتشوفي التلفزيون .. يا ستي شوفيه . لكن اتعلمي من الحاجات المفيدة . والبسي كل يوم وشوفي حالك .. احسن ما تعرفي شو رايح يجرالك .. علي الطلاق بحكي جد . ولازم اوضع لهل حال حد . يدخل ابنهم صابر… – شو القصة .. كل يوم خناق وحلفان بالطلاق … – يا بني هذي امك مجننتني … – ابتقبل الولد ايكون قاضي .. وانا ابحكمه راضي … – ايوه بقبل .. بلكي هالحال يتعدل … القصه او ما فيها …..او هذي هيه الحكايه .. قول رأيك يا ولد ..او ما تخاف من احد … – يا ست ام صابر الله جميل وبيحب الجمال . وانتي مقصرة بحق نفسك وجوزك . حتى لو كان عمرك فوق السبعين لازم اتكوني مثل ورده امفتحة في البساتين . وانت يا ابو صابر عليك شوية حق وملامه . بالمسايره ابتمشي الامور مع كلمة حلوه وشوية بخّور ، وكمان الشغل ما هو عيب ، وزوجة الرسول عليه السلام كانت تشتغل بالتجاره … سامحوني انا قلت الّي عندي ورايح لعند صاحبي علشان تتصالحوا واتحلّوا الموضوع والبيت إيكون مليان حب وتفاهم وشموع .. بدل الخناق والتهديد بالفراق … – صدقيني يا فهمانه ان كلام الولد موزون وبيحق له جيزه ..شو رأيك اذا وافق تخطبيله بنت اختك عزيزه … – من زمان وانا للفرح ناطر ..يا فرحتك يا ام صابر .. غير البسلك واتزوق كل ليله .. وخليك اتقول تعبان وما باليد حيله ..! لكن انا زعلانه منك علشان دايما ابتحلف بالطلاق وبتهددني كل لحظه      بالفراق… – كلشي ولا زعلك يا ام صابر .. اي عليّ الطلاق عمري ما بحلف بالطلاق ..!! حتى اتكوني عني رضيانه .. وحلوه مثل القمر وعود الريحانه …

 
نشرت في جريدة القدس بتاريخ2010.7.30