مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



أرشيف يوليو 9th, 2010

اكلة كرشات ..

يوليو 9, 2010

اه على أكلة كرشات مع لبن . صدقيني انها بترد الروح .  وبتداوي القلب المجروح .  وبتخليني بحبك ابوح. .   - شو قصدك يعني  انت عارف اني مريضه ودايخة من شغل البيت وغسل وترقيع الملابس .  وحضرتك ابتعبي لا داري ولا حاسس.   كل يوم طبيخ ونفيخ وطلبات مثل اولاد المدارس.  وبتغنيلي عن الحب وعامل حالك فارس. وانت عارف الحال .. الحظ نايم والزمن عابس .  -سلامتك يا ست الدار.الله يشفيكي من المرض وعميان القمار.ويبعد عنك التعب وسماع   الاخبار .صدقيني اني في الليل بحلم بالكرشات . ويا ريت حلمي يتفسر في وقت من الاوقات .  ويكون قبل ما تخلص الشتويه ويا عيني عالثوم فوق اللبن والفوارغ المحشية وبعديهم عالحلو   ناكل مهلبية .والله بوعدنا بصحن كبير ايكون مليان .ويحنن علينا قلب النسوان .  لانهم الخير والبركة والحضن الحنون لكل طفران.ويطعمنا ويطعم كل جوعان .  -طول عمرك ابتحلم وعمرك ما بتفيق .ولسانك ما بيفوت فمك مثل بعبوز البريق .وما بتشفق   على عيان او تعبان او حتى غريق .  - حلمك علي يا مستوره ..الاحسن تعالي نعمل خارطة طريق..ونحط برنامج لطبيخ الكرشات   وكل الخوازيق .ونظل حباب وصحاب مثل الصديق للصديق .  -بتقول عايز برنامج طريق للطبيخ ..وانا بقول حلمك بعيد مثل المريخ ..!.  -كيف ما بدك بصير .مهو الحكم اليوم للنسوان وخلينا صايمين مثل رمضان. -شو مالهم النسوان ..يعني حقهم ناقص..او ناقصين عقل ودين مثل ما بيقولوا الرجال .. وعاملين من سيرة النسوان حكايه وموال ..صدقني من غير النسوان غير يختل الميزان . وعيشتكوا اتصير مثل البهلوان ..مثل اللي بيمشي عالحبل .وبغني من غير طبل . -لا ..لا انا ما بقول هالكلام ..النسوان الخير والبركه .لكن الحنية مطلوبة والحركة . حتى اتدوم المحبة وتعم البركه .والحرمه اللي بتقول انها دايما تعبانه وعيانه وعامله حالها  بامور الدنيا فهمانه لازم تعرف ان للزوج عليها حق وتكون صديقته وحبيبته . حتى الزوج ايغمض عيونه ويقنع في مصيبته ..اسمعي انا رايح عند جارنا حتى اباركله لانه  خطب حتى يتزوج ..عارفه ليش لانها مرته دايما عيانه وتعبانه ..وبعديها انا نازل عالسوق .. لاني من قعدة الدار مهموم ومخنوق ..  -اتروح وترجع بالسلامة .وما تنسى اتجيب معك الكرشات .  وعلشان عيونك ..لاطبخلك احلى الاكلات..!  .قلنا هالحكي من زمان .. لانه ما بيجيب الرطل الا الرطلان..

      (الى المحرومين في الارض من اكل الكرشات . لا تحزنوا .. قلبي معكم .. ان القرج ات )

نشرت في جريدة القدس بتاريخ 2009.2.22