مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



أرشيف يوليو 6th, 2010

كذبة نيسان

يوليو 6, 2010

  

      - مبروك البلفون يا رجال .. – الله يبارك فيكي مأنتي  عارفه لولا الضروره ولا   ما بقل عقلي وبشتريه ..  – وين بدك تعلقه .. في القشاط ؟  – يعني بدّك يقولوا عني في البلد   ابو احمد اتشبّب ولا عقله اتخرّب . احسن محل بخبيه في عبّي ..  – خبّيه وين ما تخبّيه المهم نحكي مع الولد . – ايوه ما هو هاذا السّبب الي خلاني اشتري البلفون ، حزين هلولد  احمد صارله ثلاث سنين  بالغربه والله مشتاق اشوفه ..- ما هو انت السبب بدّك اياه يُدرس في بلاد برَّه  ..- يا مستوره الصبر  طيب سنتين وبيرجع ومعاه شهاده قد الحيط .. – طيب خلينا نحكي معاه ..  – ابنحكي بالليل يا ام احمد على شان الولد في هل الوقت بيكون في الدّرس والتوقيت بينا   وبينهم ابيختلف . الولد في مكتوبه الاخيرفهَّمنا هلخراف وكتب النا فيه رقم تلفونه   وكيف نحكي معاه  ولا انتي عقلك مضيع مثل العاده ..  – على مهلك علي يا زلمه ما هوّه من حرقة قلبي عليه يا ترى بياكل وبيتغطى بالليل   قبل ما ينام ..  -  الو مين بيحكي احمد .. كيف حالك يايابا كيف صحتك ودروسك .. هي امك جنبي   وبتسلم عليك .. مشتاقين كثير نشوفك شد حيلك يا بني علشان ترفع راسنا لفوق احنا   كويسين وصحتنا مثل الحديد اسمع تقولك يا بنيّ بعد ما سافرت اتغيرت الاحوال وصرنا   فوق الرّيح وكمان يا بني الوضع جيد وعنا في البلاد الخير كثير والرُّز والقمح قناطير ،  والامن  مستتب وما في حدا على غيره بيسب . اعمامك وخوالك تصالحوا من  زمان   وما في حدا عنا طفران . اتصور الناس بتخلي بيوتها مفتوحه  لانه ما في حراميّه وكل   واحد عاطل عن الشغل ابياخذ اخر الشهر  معاش مع اكراميه . والحارات كلها مضويّه  ، والشوارع صارت مثل خد  العروس بيركض فيها حتى الاعمى ويدوس . وما فيش  زباله ولا دخان والحدايق مزروعه ورد وريحان . والمجاري ما عادت تفيض من سنين  . والسواقين صاروا يحترموا القوانين . والجار صار ايحب جاره فاتحله  قلبه وداره .   احنا بخير وما تقلق علينا اي صدقني ازهقنا اكل اللحم  وبنتعشى كل ليله كماج وجاج   مشوي عالفحم .  والحلاوه كنافه  مع شوكلاطه والمصاري بنحطها من كثرها في   شوالات البطاطا  هذا غير الفراطه . وياريتك بقيت عنا وتعلمت بالوطن مهي   المدارس عنا صارت كثيره غير روضات الاطفال امّا الجامعات بيضربوا فيها الامثال  .  وبطلنا نلبس من كسوة الصين والكنادر  المعروضه بالشوارع على الصّفين.   صار عنا مزارع ومصانع  وصرنا نبيع ونصدر البضايع . اي حتى الصين استوردت   من عنا  القرنابيط والبطيخ الاحمر المخطط  تخطيط . علشان ما هو من غير  بزر .  ولمّن ترجع لذبحلك خاروف وهذا علي نذر . وشجرة البرقوق  كبرت وصارت  معرشه قدّام الدار واشترينا سياره جديده بدل الحمار . والبنزين ارخيص ما هو من بلاد   العرب . والجهل والمرض من ديارنا  هرب . لا لا تقلي هذا مثل عندكم يعني على شان   استقال عندكم وزير لاجل حفره في الطريق . اي طوِّل بالك تاقولك وخذلك نفس ما هو   عنا  وزير الصحَّه استقال على شان مواطن عطس . والحكمه صارت عنا  ببلاش من  الغيار الصغير حتى غرفة الانعاش . اي خليهم يجوا يتعلموا عِنّا مهو احنا اصل   الحضاره مثل اللوز ما بيتخبّى نواره . واسمع يا بني لا تتجوَّز من بناتهم ، الجيزه   عنا صارت ميسَّره ما بيطلبوا  كيلو ذهب وغرفة نوم وجلايه وكنب . وكمان ما   تخاف على الشغل  يا بني الوظائف والمعاملات ما عاد لازمهم وساطات والحكي   كثير وكل شي عنا بيصير .. -  سلامتك يا رجال شو هالخراف صار لعقلك حاجه ؟   – لا يا مستوره هذا الحكي علشان الولد يهتم بدروسه وما يضل  قلقان ما انتي  طول عمرك غشيمه ما هو اليوم اوَّل نيسان !    وسلامتكم يا سامعين ويكفيكم شر الفواتير والدين.

نشرت في جريدة القدس بتاريخ 17 – 8 – 2007