مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bohlool@hotmail.com



(عفارم) بالتركي

يونيو 25, 2010
0 views

 

      ورجعت ما احلى الرجوع اليه .. ما احلى الرجوع اليه .. هذا ما كانت تشدو به المطربة نجاة الصغيرة من خلال المذياع..  وابو صابر منسجم مع ما يسمع حتى صاح   من النشوة والطرب .. الله هذا الكلام الحلو  المرتب والمزبوط .. عفارم.. عفارم عليكي .  قالت زوجته – سلامة عقلك .. شو بترطن يا ابو صابر ..؟  -انا ما برطن. انا بقول عفارم . وهذي كلمة كويسة بالتركي . يعني احسنت .  -ويعني العربي ناقصة كلام حتى تحكي بالتركي ..؟  -آه يا مستورة .. الظاهر كلام العربي ما عاد مسموع ولا حدا بيقيم له وزن.  وانا قلبي صار من الهم موجوع . لان كلام العرب جعجعة من غير طحن ..!  -وقولك يا ابو صابر الكلام التركي مسموع ..؟  -ايوه يا ستي مسموع .. لانهم الاتراك ارجال و بيحترموا انفسهم. وما بيرضوا  احد ايدوس على طرفهم .. يا حرمة عندهم عزة نفس وكرامة . وما بيكتفوا  بالشجب والملامة .  -يا زلمة ومالهم العرب ..؟ انت دايما ما بيعجبك عجب.  -يا فهمانه العرب غرقانين لاذنيهم بالمسلسلات والطرب . والقيل والقال  والبورصة والذهب . وبيعملوا من الحبة قبة . وشاطرين بالبيانات ونقل الاشاعات. وصف الاخبار وفك الحصار بالاذاعات .. شو قولك في مباراة عملوا منها طنه ورنه.  وردحوا لبعض مثل الحماة والكنة ..! اي كلمة انحكت بالتركي خلت كل العالم يحكي ..  هذولا ارجال وصدق مين قال (الديك الفصيح من البيضة بيصيح) -قولك يا ابو صابر يمكن العرب يتعلموا ويعملوا مثل الاتراك؟  -انا بشك في الامر يا ام صابر .. الشعوب العربية طيبة لكن مغلوبة على امرها و بتقاسي   والقاعدين فوق عالكراسي مش داريين بالطبخة والعارف عامل حاله ناسي ..!  -في هل حال يعني الحق عالناس ال ساكتين وبالغلب راضيين. -ما هو الناس معمي قمارهم .. ابيرقصوا على طبل الوالي من الطفر والخوف .  ورقصهم مثل الديك المذبوح والخاروف .. وبيقولوا الحال مثل بعضه . حالنا مثل  حال اخوانا . وبيدعوا بالفرج وتحقيق امالهم وآمالنا . والدعم يشمل الجميع حتى ايربوا  عيالهم وعيالنا.  -لكن يا رجال المثل بيقول(الحركة بركة) وبدها مع الدعاء شوية قطران .  علشان ينعدل الميزان.  -ما هيه المشكلة يا مستوره انهم الناس المقهورين ما هم موحدين .. وفي لكل  جماعة شيخ . حتى صارت الحالة طبيخ.! وكل واحد ابيقرا في دفتره.   وما بيشوف في المرايه غير صورته ومنظره. وما بينظر لابعد من قدامه  ومستعد ايحارب حتى اهله وعمامه ..! وبيقول ما في غيري صح  والباقيين غلطانين وافكارهم تعبانه وبح. -يعني الحق على الناس .. لويش انلوم القاعدين فوق بالاساس..؟ -انا بلومهم علشان في ايدهم القرار .. وصدقيني لو يسمعوا من الشعب غير  الناس اتحبهم كبار صغار .. وتقف معاهم في الكبيرة والصغيرة. وتبيع علشانهم  الطنجرة والحصيرة ..!  «استمعتم ايها السادة الى اغنية ورجعت لنجاة الصغيره …   صاح ابو صابر .. عفارم هذا الكلام ال بينباس وبينحط على الراس .

نشرت في جريدة القدس بتاريخ 2010.5.25
Be Sociable, Share!


أضف تعليقك

*

*
To prove you're a person (not a spam script), type the security word shown in the picture.
Anti-Spam Image

Powered by WP Hashcash