مـن حـكـايـات بُهـلـول – مـدونـة الكـاتـب الشـاعـر جـودت راشـد الشـويـكي

hikayat_bahlool@hotmail.com



(أغاني للحياة)

أكتوبر 1, 2010
0 views

مجموعة أغاني للحياه -كلمات جودت راشد الشويكي

الدّنيا كورَه

لِفْ الدّنْيا وصَوَّرْ صورَة
وَدّيها لكُلِّ المَعْمورَة
إحْكي عنْ واحدْ كَفيفْ
لكْنُّه بْطبعوا شَريفْ
بيشوف بقلبو وْعَفيفْ
وِبْحِسّو الدّنيا مَسْحورة
ولِفْ الدّنيا وصَوَّرْ صورََة *
أوَّلهُمْ طهَ حُسينْ
أدَبو فايِضْ عَالجَنْبينْ
غَنّولوا يا ليلْ يا عينْ
وِبْعِلْمو الدّنيا مَأسورَه
ولِفْ الدّنيا وصَوَّرْ صورَة *
الإنسانْ مو إجْرْ أوإيْدْ
الإنسانْ عَزْمْ وَتجْديدْ
قومْ نْحاوِلْ مِنْ جْديدْ
 يا أبْطال الدّنيا كورَه
ولِفْ الدّنيا وصوَّر صورَة *
غَنّوا وقولوا هالمَوّالْ
إحْنا بْنِتْحَدّا الزَّمانْ
وِانْ داقَتْ فينا الأحْوالْ
هِيِّهْ الدّنيا إمتِحانْ
مينْ بيقْبَلها مَهْزومْ
مينْ بيقبلها خَسْرانْ
أمْشي خطوِة وبَعْد اليومْ
إبْتِوصَل لبَرِّ الأمانْ
يا أُمِّةْ شعْبي المَنْصورَه
ولِفْ الدّنيا وصوّر صورَة *

****************

شايْفينْكو

إحْنا مِنْكوا أوْ مِتْلِ النّاسْ
ما بِنْشوفْ بْهِلْ عِيْنَيْنْ
لكِنْ في عِنّا إحْساسْ
بِيْنَوَّرْ دَرْبِ الماشيينْ
نِعْمَلْ نُكْتُبْ والأساسْ
نِتْحَدّى الدُّنْيا بْقلبينْ
ما هي بِالقُوِّة والرّاسْ
يا ما عالمْ مِشْ شايْفينْ *
في واحِدْ ما عِنْدو إيْدْ
في واحدْ رِجْلو مَلويِّةْ
 في واحدْ طويلْ كْتيرْ
في واحدْ قَصيرْ كتيرْ
لكِنْ عِنْدو إرادِة قَوِيِّهْ
في واحدْ كَرْشُهْ مَليانْ
في واحدْ بايِتْ جوعانْ
في واحدْ عَقلو تَعْبانْ
هِيِّهْ الدّنيا بِالألوانْ
وِاحْنا فيها مْهَلَّبِيِّهْ *
أحْسَنْ ما نُقْعُدْ وِنْلومْ
ناكُلْ يومْ ويومْ نْصومْ
هِيِّهْ حْكايِةْ عَالعُمومْ
لكِنْ حِلوِهْ الدّنيا هَنِيِّهْ *..

عالأرغول ..

عالأرغول بكتب شعري للثوار
للعمال   والفلاحين
للعارفين  ايخلوا  الليل   نهار
للصاحيين  ومش  نايمين
عالأرغول بغني شعري للثوار
للأحرار  والمقهورين
قاموا  وهبوا   كبار  صغار
عملوها  ثوره  في الميادين
قالوا  ارحل  يا  غدار
ملينا  وجودك  مش  عايزين
شربنا  القهر وعيشه   مرار
أيد   بأيد   ومتحدين
شعب   العربي  شعلة  نار
تحرق   كل   المنحرفين
عنا  قوه  مع  اصرار
عنا  عزيمه  ومجتمعين
تنعمرها   دار  و  دار
نزرعها   ورد  وياسمين
ونغني   نشيد   ألأحرار
صوت  بيعلا  من  ملايين
ما     بنرجع   مهما   صار
نكتب   مجدك   والعناوين ..
 

 

غنوا معي .. 

يا هذا العالم  فلتسمع
أنا  للظالم  لا  نركع
وأن  الثورة  آتية
من غير بنادق أو مدفع
  

  

ثورتنا  لونا  ورديه
مطلبنا  دوما  حريه
فكرامة  شعبي  باقية
يجمعنا  هدفا  وقضيه 
 
  

  

مذهبنا   دين  ومحبه
والكل يحن الى  دربه
والعشره  عنا  راقية
والكل يسير الى  ربه
 
  

  

يجمعنا هدف  في  المحن
نحب  العدل  مع  الوطن
يا  ثورة   شعبي  ماضية
ستكوني  درسا  للزمن .. 
  

  

زنكا زنكا

زنكا  زنكا  يا بو  ترنكا   قالو  عنكا   انكا   حمار
ناصا وصاصا
عالمصاصه ضرب رصاصه هبت نار
نونو  نونو  يا 
  مجنونو  شوفو   فنونو  بالاخبار
كاكا  وماكا   يلعن 
ذاكا   شو  سواكا   كبير  الدار
سرق  وحرق   ذبح 
ونهق  عاش  بنفق  هالغدار
لزقه  وحزقه  مثل  البزقه
  لهط  الرزقه  كم  مليار
طوفو وشوفو عامل خوفو
نافش صوفو بالسشوار
بعبع وعوع قام اتدلع  ما عاد 
يسمع   مهما  صار
ارحل  يهبل  لا  تتولول  بلع  الم
نجل   عقله   طار
زاقا   وماقا  باب   و طاقه   بدنا   
فراقه   هالثرثار
حاره داره  هبت   ناره   ضربو   حجار
ه  عالمطار
لالا  ومالا صال  وجالا   صارت   حاله   شو 
غدار
توتو  بوتو  راح  بتموتو  او  بتفوتو  كبار   صغا
ر
هبت  هبه  صارت  قبه   ما  هي   صعبه    عالثو
ار
حشش مشش بوم وعشش خاف وكرمش  مثل الف
ار
حكحك  مكمك  شو بيلبقلك  عم   يندهلك   ذل  وعار
طارو فلوسو هالمنحوسو حوصو ولوصو هرب وطار
زنكا  زنكا  يا بو  ترنكا   قالو  عنكا   انكا    حمار ..
  

  

الهواره … 

هور  يا بو  الهواره
زنقه  زنقه  مع  حاره
تعالو شوفو هالمجنون
اهبل  راكب  عحماره
*****
شدو  الهمه  يا  ثوار
ايد  بايد  ودار  بدار
شعب الليبي  هالمغوار
ما  بيساوم  شعاره
*****
هبو هبه  كبار  صغار
شوفو الثوره  بالاخبار
قذافي  يحرقها  بنار
تيحرق  نفسه   بناره
*****
مش حنسيبك مهما يكون
شفنا  كتير جنون  فنون
قاتل  شهبه  هالنيرون
ثورة  شعبي  جراره
*****
في عنا  قاده  وحكام
يالله  تفرج  يا  سلام
حاجه غريبه  بهل ايام
شوفو الدنيا  دواره
*****
اولهم  زين  المحتال
هدم  بلاده  هل  بطال
هب الشعب وارحل قال
سرق  وهرب  بطياره
*****
ثانيهم  حسني  المهبول
نهب  بلاده عرض  وطول
قاعد عالكرسي ومسطول
ما  بيفهم  شو  العباره
*****
يا علي فات اللي فات
ما  بنريدك  للمات
بيكفينا  منك  بلوات
وطنك  ما هو  تجاره
*****
الشعب اليمني هب وثار
اعلنها  ثورة  احرار
لا تقاوم  هذا الاعصار
ضاع الكرسي ياخساره
*****
دنيا  دولاب  وبيدور
يا  ظالم عليك  الدور
لا تقهر  شعبك  ليثور
وتشكي  حظك  للجاره
*****
وهور  يا بو الهواره ….

  

مطر .. مطر .. مطر ..

هذا الليل المظلم يزيدني كئابه

ونباح المذياع الاتي من فتحات البيت الاسود وأبوابه

ترسم في الافق طلاسم ممزوجة بسؤال ..؟ آه من يعرف جوابه

  آه من الاه حين تصير موالا للعاشقين 

ومع الصمت نحتسي أكاذيب اذاعات تروي حكاية أبا زيد وقصص الفاتحين

و ……..

تمطر السماء بالقنابل

تقتل الزهور والسنابل

تزرع الموت والدمار

تغتال الحياة والمعاول

تطير أشلاء الاطفال

بين السهول والجبال

في أرض الصمود والنضال

من شعبك وطني المناضل

وطفلة قد بكت .. دمعها

من دمعها زيتت .. شمعها

تضيء لنا درب عودة

فهل يا ترى بكت امها

وشيخ جليل ينادي .. يعانق أرضا وجيلا

رصاص الغزاة والاعادي يغوص في القلب ميلا

عشقت تراب بلادي .. كوفيتي هي الدليلا

فهل تبلغون مرادي .. حرية بخيمة بديلا

وجدتي اللتي قتلوها .. في مخيمات العائدين

مرسوم على شفتاها .. خارطة فلسطين

كانها تقول لنا .. هنالك بين الربى

ايامنا كانت هنا .. بياراتنا ملعبا

ما ذنب طفل رضيع .. في حضن أم قتيله

أصرخات شبل تضيع .. ودم أم وجديله ..؟

قنديل هذا الطفل الثائر .. يصرخ من أعماق العدم

يصفع تمثال للياس .. يحرق أسفارا للندم

و صراخ الاطفال الاتي يلعن تاريخ الايام

قسما بالثورة وحياتي

سأعيد الليلة أنغامي

النغم الطالع من مقلع

وأغاني أشبال الثوره

نعلنها دوما لن نخضع

سنعيدك يا بلدي حره

 عزمنا اعصار .. سنهدم الجدار

ونزرع الزيتون في أرض السلام

(بالامكان الاستماع ومشاهدة هذه القصيده على الرابط التالي)

http://www.youtube.com/watch?v=6vkHF5ZY3JI&list=UUyIdX8AgxxuiOATt-NCzg5g&index=20&feature=plcp

?  

ربيع بلادي

  

فتح النوار ………… غنت الأطيار

يا ربيع بلادي ………… يا نسيم الهادي

والناي تنادي ………… فوف الجبل ازهار

النسمه والعنقود ………… يا جنه ما لها حدود

يا شعبي دايم جود ……….. يا أمة الأحرار

ما نامت عيوني ……….. ولا أهلي نسيوني

ولا كرم زيتوني ……….. عالتل والصبار

ولا زرعي هالأخضر ………… ولا حبي عالبيدر

والحلو يتمختر …………. والقلب غنا أشعار

يا صحبي يا راجعين …………. لأرضنا رايحين

أمانه يا تشرين ………….. أتكمل المشوار

أتكمل المشوار

  

غنو البلابل

 

غنو البلابل عالشجر

قالو السنابل للقمر

يا ابن الاصايل شو الخبر

القمح والله زاد حنينه

 

يا نور عيوني روحي بوحي

 انا من حنيني زاد جروحي

انا في غرامك بعت روحي

عاشق بلادي الله يعينه

 

مال الحمام عالغصن وقال

احلى الكلام ما في محال

يبلادي مهما البعد طال

شعبك ما يرضى غيرك عرينه

 

غنو البلابل يالله قومو

عزك بلادي هذا يومه

كل المراد لا تلومو

الحر يكتب مجده وسنينه

و عاشق بلادي الله يعينه

  

كانو السمار

كانو السمار في الليالي بيسمعو

صوت المزمار والاحباب اتجمعو

فات المشوار يالله بينا نرجعو

نكتب اشعار للدبكه في بلادنا

كان المختار يحمل دفتر اشعاره

يكتب اخبار عن رزقاته وعن داره

او بنت الجار ياما حكيت اخباره

والقلب احتار والساحات تنادينا

كانو الحصاده بيغنو بحضن البيدر

معهم زواده زيت وزيتون او زعتر

والقمح زياده قنطار وميه واكثر

محلا هلعاده رحنا للعونه وغنينا

 

كانو الحلوين يتلاقو على نبع المي

ورد وياسمين عصريه والدنيا في

واحنا ناطرين عودتهن نتلاقا شوي

زهر تشرين يا احبابي في وادينا

كنا بكير بنغني وعالدرب ايطير

قامو العصافير وجناحن شو حلوه كتير

قالو الشنانير للراعي شو رح بيصير

يابو قلب كبير عالنايه غني لينا

عالارغول بكتب شعري للاحرار

للعمال والفلاحين

للعارفين يخلو الليل نهار

للصاحيين ومش نايمين

غني غني مش معقول

لفينا الدنيا بغنيه

الحانك يا ربي اتطول

ارغولك كله حنيه

ارغولك كله حنيه

  

   

الساقيه

   

من كل شهيد …..

تحية

الى امه 

في 

العيد  

 

 

 

 لا تبكي دمي يا امي فانا لم امت

في سماء القدس ما زلت احيا

وعلى تراب القدس اشلائي نمت

لا تبكي دمي يا امي فانا لم امت

في زغاريد الصباح

وعناقيد الاقاح

و اناشيد الرواح

تجديني .. ازرع القمح للعيون الباكيه

اصنع الفرح للشفاه الباليه

بدمي ولحمي و عظامي الباقيه

انزفي يا ساقيه

انزفي يا ساقيه

انزفي من دم شعبي

انزفي من جرح قلبي

انزفي قد زاد حبي

انزفي كدمع العيون

قسم الفداء والمنون

قد عزمنا ان نكون

 نزرع القمح للعيون الباكيه

نصنع الفرح للشفاه الباليه

بالدم واللحم والعظام الباقيه

انزفي يا ساقيه

انزفي يا ساقيه

دمائي على تراب القدس باقيه

تنشر العطر والزهور القانيه

رغم الليالي والفلول الباغيه

انزفي ياساقيه

انزفي ياساقيه

انزفي يا ساقيه

(بالامكان الاستماع ومشاهدة هذه القصيده على الرابط التالي)

http://www.youtube.com/watch?v=7q7bnxyiO18

 

Be Sociable, Share!