كل عام وانتم بخير ..

الطّلاق ..

   قال صابر لأبيه .. = زوِّجني يابا…. = يا بنيِّ إذا بتظل هالحاله مثل النخاله يمكن أطلّق إمّك..! = يا خيبتي عليكي يا فهمانة .. شو ناوي إتطلّقني يا أبو صابر … = يا فهمانة أنا قصدي أشرح للولد عن الحال ، وهذي قوّاله بيقولوها بالأمثال … = أيوه عايزني أصدقك وتوكِل بعقلي حلاوه ، وإنت كل يوم بتهندز بحالك وتقف قدّام لمراية .. ليكون شايفلك شوفة ، وبتشوفني مثل الجاجةالمنتوفة..؟ = هي إنتي قلتيها بعظمة لسانك ، ما إنتي واقفتيلي كل يوم مثل شيخ الغفر ، وشعرك منبوش مثل واحد قاتله الطّفر ، وفستانك ما غيّرتيه من العيد مع إنّه عندك عشرين فستان جديد … = يا أبو صابر هذولا الفساتين بلبسهم في الأفراح والمناسبات ، علشان إيقولوا مرت أبو صابر مثل الحلوات … = يا ستّي أنا ما بيهمني شو بيقولوا النّاس ، المهم أنا أشوفك وأعبّي الرّاس . المرة الفهمانة كل يوم إبتعمل هذا اللي بيقولو عنه (لوك) جديد لجوزها ، وبتظل حلوة مش لاوية بوزها ، علشان جوزها إيحبها لازم إتحسّن منظرها ، وما ينظر لغيرها ويقهرها ، أي عليّ الجيره فقعتيني وخلّيتي الشّرار يطلع من عيني … = هوِّن عليك يا رجّال ، بشوف عقلك إنقلب واتغيّر فيك الحال ، وارجعت شب صغير، وعايزني أتزوَّق وأكون مثل العروس وأنت الأمير ، يا رجال إحنا كبرنا وصار عنّا ولاد .. شو بدك إيقولوا إذا الماضي عاد .. = ايقولوا شو ما ايقولوا .. يعني أحسن اتظلي مثل البومة ، ولا مثل فواتير الحكومة ، فكيها شوية وعدلي الحال ، علشان أنا طقت في عقلي ويمكن أغني هالموال … = يا رجال أنا طول نهاري محبوسة وقاعدة بالبيت ، مثل الزير بالقرنة لا رحت ولا جيت . وإنت حضرتك داير إتبصبص على النسوان وبِلّي عندك ما إكتفيت … = يا ستي أنا بلّي عندي راضي وقنعان ، لكن القصّة عايزة شوية بهار مع زعفران ، لأنها الطّبخة اليّ ما فيها بهار الأحسن تنحرق بالنار ، لأنه بكيون ما إلها طعم ومنظرها بلا قافية مثل الفحم … = لكن يا أبو صابر النسوان اليّ بيتزوقوا هم أل بيشتغلوا … = شو قصدك يعني .. أي هذا الّلي ناقصني .. يا فرحتك يا أبو صابر ، شو بدّك إيقولوا عنّي الناس ، إمشغل مرته علشان تصرف عليه وأصير مقلزه في البلد وأسمع تعليقات من غير عدد . عايزتيني أصير طرطور بين الناس .. لا يا ستي كلامك مرفوض من الأساس أحسن ما تقع الفاس بالرّاس … = شو فيها يعني لو إشتغلت ، مهم بيقولوا إنها البنت صارت مثل الولد ، والمرة لازم تشتغل وتكون لزوجها سند ، والشغل ما هو عيب ولا سرقه من الجيب … = شو هذا يا فهمانه ..؟ بتقولي إنّه الولد مثل البنت . والزّلمه مثل السّت .. أي ناقص إتلمي النسوان وتطلعوا مظاهره .. وإتقاهروا في الرجال مقاهرة . وتقولوا عايزين مساواة واتشقلبوا موازين الحياة .. الظاهر إنّك بتشوفي برنامج كلام نواعم . وأنا مضروب على عيني ونايم … = يعني ما بدَّك أشتغل ولا أشوف تلفزيون كمان . وإنت كل ليلة إبتسهر للصبح وبتشوف حاجات أشكال وألوان … = أيوه… أنا بشوف لأني مقهور وبعاني الحرمان ومكتوب عليّ الصّوم حتى في غير رمضان . وأنا ما قلت إنّك ما إتشوفي التلفزيون .. يا ستّي شوفيه . لكن إتعلمي من الحاجات المفيدة اللي فيه . وإلبسي كل يوم وشوفي حالك .. أحسن ما تعرفي شو رايح يجرالك .. علي الطلاق بحكي جد . ولازم أوضع لهل حال حد …… يدخل إبنهم صابر… = شو القصة .. كل يوم خناق وحلفان بالطّلاق … = يا بنيّ هذي إمك مجنّنتني … = إبتقبل الولد إيكون قاضي .. وأنا إبحكمه راضي … = أيوه بقبل .. بلكي هالحال يتعدّل والوضع يتبدّل … .. قول رأيك يا ولد ..او ما تخاف من أحد … = يا ست إم صابر الله جميل وبيحب الجمال . وإنتي مقصرة بحق نفسك وجوزك . حتى لو كان عمرك فوق السّبعين لازم إتكوني مثل ورده إمفتحة في البساتين . وانت يا أبو صابر عليك شوية حق وملامه . بالمسايره إبتمشي الأمور مع كلمة حلوه وشوية بخّور ، وكمان الشغل ما هو عيب ، وزوجة الرسول عليه السلام كانت تشتغل بالتجاره … سامحوني أنا قلت الّي عندي ورايح لعند صاحبي علشان تتصالحوا وإتحلّوا الموضوع والبيت إيكون مليان حب وتفاهم وشموع .. بدل الخناق والتهديد بالفراق … = صدقيني يا فهمانه إن كلام الولد موزون وبيحق له جيزه ..شو رأيك إذا وافق تخطبيله بنت أختك عزيزه … = من زمان وأنا للفرح ناطر ..يا فرحتك يا إم صابر .. غير البسلك وأتزوَّق كل ليله .. وخليك إتقول تعبان وما باليد حيله ..! لكن أنا زعلانه منّك علشان دايما إبتحلف بالطلاق وبتهددني كل لحظه بالفراق… = كلشي ولا زعلك يا إم صابر .. أي عليّ الطلاق عمري ما بحلف بالطّلاق ..!! حتّى إتكوني عنّي رضيانه .. وحلوه مثل القمر وعود الرّيحانه …

حكاية فلسطينيّة ..

حكاية فلسطينية

          كان النّدى بيغسل آهات يوم مضى . والعصافير بِتْزقزق على الأشجار . وهدهد قاعد بينْقُر بحبّة صبّار . وسلمى صِحْيت في البدريّه حتّى تِحمي الطابون . وأبو سالم ساري مع الاذان سايق الفدّان تيحرث كرم الزّيتون . وسعيد الرّاعي بيعزف نغماته على الناي بصوته الحنون . والبلد نايمه بحضن الجبل .والمختار كان قاضيها وحاميها وهو المستقبل والأمل . والنّاس كانوا عايشين برضى . بآمنوا بالقضاء والقضى . والماضي عندهم حداويت وحكايات وزمن راح ومضى . والمستقبل وسع كرم الزّيتون والبيادر والفضى . وصابر الصغير كان بيلعب مع أولاد الحاره . كان في عندهم حد البيت حاكوره يعني حديقه مع بيّاره . وعند العصر والمكان عند القصر كان بيجمع الحنّون .ويصيد العصافير في النُّقّيفه من على الغصون . وصبريّه كانت في الصبحيّه تحلب الغنمات . صوتها كان حلو كتير مليان حنيّه ونغمات . وإبن عمها راضي كان بسحرها مفتون وراضي . وبيحلم بيوم يكتب كتابها عند القاضي . كان ناطر الوردات تيكبرو على خدودها .والرّبيع يفتح ويزهر على عودها .ويعقد حب الرمان تيقيم الفرح ويصيرله بيت وعنوان. في هذاك الزّمان ما كان فيه إذاعه . ولا فيسبوك ولا حتى سمّاعه . وكانت الأخبار بينقلوها النّسوان بالاشاعه وكان في على البلد انتداب يعني وصايه مثل ما تقول وصاية الذّيب على الغنم لا رحمونا ولا خلّو مين رحم ونصّبوا علينا مخاتير أحسن منهم العدم . وماكان في عسكر ولا قلب من الغربه بيتحسر . والمختار كان مشغول طول الليل والنّهار . وبمشاكل نسوانه قلقان ومحتار .ولحراسة البلد كان مزروع في الحقل فزّاعه . عودين مع خرقه كفايه لأننا بنحب القناعه . وبنحب القريب وبنكرم الغريب والضيفان . والحياة حلوه ما فيها عكد ولا نكد ولا أحزان . لكن كان الغريب بيخطّط تياخذ الدّار . ومن يومها ابتدا الهم ومشينا مع الألم مشوار لأن الانتداب ساعد الغريب وإحنا كان نصيبنا ألاعتقال والسّجن والتّشريد والتّعذيب… صاحت الحجّه فاطمه والنّاس هاربين من المذابح خطيّتنا في رقبة الحكّام . وما بسامح بحقّي على مدى الأيام . وقالت لكن أنا صاحية وعلّقت برقبتي المفتاح . وحطّيت كمشة شعير للجاجات وبذرت مثلهم في المراح . وكلها كم من يوم وراجعين لأن العرب ما بيخلّونا كثير ناطرين … وهاجروا الناس مجبورين وتركوا البيوت والبيّارات مقهورين . وتوزّعوا في بلاد العرب وسموهم لاجئين .اللي عاش عاش واللي مات مات . وسكّنوهم في المخيمات .وصار العالم يحكي عن قصّتهم حكايات .ومن يومها الحكام قالوا كفاها الباري ولا الضّالين آمين .وحطّينا القضيّه في رقبة أصدقائنا المخلصين .ووزعوا البطاقات لقبض التّموين شويّة سكّر مع زيت وشوال طحين . ولغسيل الألم والمرار صابونه بالشّهر أو صابونتين . وكل شتويّه بقجة ملابس قديمه مع ثلات بطاطين .يمكن فيهم اثنتين مخزّقين لكن شو ما حصل وصل من الخواجات الطيبين .. آآآه يا زمن شو غدّار وكيف صارت الحاله . ما بقي النا غير كرت التّموين والذّكريات وحليب الوكاله. حتّى عملوها الناس قوّاله . وقالوا من بعد الرّز أكلنا نخاله . وصاروا مطسّه للأمم كأنهم على الأرض موجودين عاله .ومسكوا القضيّه كبار القوم والدّلاله . صار سعيد الراعي دوم داير في الطرقات . ما عاد في غناوي ولا ناي ولا غنمات . وفي عز الليل كانت الكلاب تملا الطرقات . وكان يغني بدل الميجنا والعتابا حرقة الآهات .ومرّت الأيام وماتت الحجّه فاطمه وبقلبها حسره . أخذت المفتاح من بعدها بنتها يسرى . وماتت يسرى من الألم والنواح . وأخذ المفتاح إبنها الصغير عبد الفتّاح . لأن ابنها الكبير هاجر لبلاد برّه . ساعي ورا الرّزقه من العيشه المرّه . وبقي المفتاح معلّق برقبة عبد الفتاح . وبيوم من الوجع هب وصاح وقال اللي راح راح . وكفايه بكى ونواح . وشاع الخبر من دار لدار وعملوها انتفاضة حجار . واستشهدوا شباب كتير وحطوا صورهم بالجرايد والأخبار. والقضيه بقيت واقفه بأمر الكبار . لا نفع مجلس أمن ولا أي مشروع قرار . ولا هيئة أمم ولا حتّى حوار . وزاد الوجع ألم ولا في من رحم . وراحت الانتفاضه وصارت ذكرى بيحكوها الشّعار . لكن المختار كان حايص لايص محتار . وكان شعاره عند الازمات . مبدأ الخذ وهات . وبالسّر عمل مفاوضات . حتى أنه أخفى الموضوع عن أخوه وعمّه . ومرت السنين وهو ناطر حزين واخرتها شو جاب لغراب لأمه . غير إنّه زاد الألم وجع وكبر همّه . وصارت كمان انتفاضه اشي كان يقاوم واشي يرقص عراضه . وراح اللي راح وبقي برقبة عبد الفتاح المفتاح . ومرت الأيام وتقاتل حسن وحسين وصاروا العرب عربين . كل واحد بيحكم حاكوره ونسيوا انها البلد للغريب مأسوره . وفي يوم وقف المختار وأعلن هذا القرار . قال من بعد اليوم ما في ألم أو أحزان ولأن المشاكل عندي كلها من النسوان .ولهذا السبب طلقت مرتي القديمه . وتفرغت لحل القضيه بكل عزيمه . وبهل مناسبه غنوا وارقصوا ثلات أيام . وقيموا الدبكه والسامر على الدوام . والحاله رايحه تصير تمام التمام . لأنها ستنا الغوله وافقت خطوه خطوه على اقامة الدوله . ورايحين نعيش احنا والجيران سوا سوا مثل اللحمه على الرغيف . وكل المشاكل صار الها حل وتصريف . والخير رح يصير للرّكب ونخلص من كل اللوم والعتب . وخلينا نمشي هالطريق لانها القشه اللي بتنجّي الغريق وكله صار ببركة التّنسيق. ومر يوم ورا يوم والحال رجع لورا وصرنا نقول ياريت اللي صار ما جرا .ضاعت بقيّة البلاد وزادت الحواجز القيود على العباد . وضاع الشّلوم وصرنا محشورين في قاع واد . حتى انهم سكّروا علينا الندى والرّيح . والصّلاة صار بدها معامله وتصريح . والدّيك الفصيح ما عاد يصيح . ناس ناطرين تيبيض ديك الاتفاق . وناس استغلّوها فرصه وتاجروا بالانفاق . والحركه بركه والرّزق على الرّزّاق . وكبرعبد الفتّاح وبعد برقبته المفتاح . والغريب غيّر الباب . وبعده عبد الفتاح ناطر ومن حبّه للوطن ما تاب . قالوله انهم هدموا القصر وعملوا مكانه عمارات . قال لكن موجود بحد القصر زيتونه مع الصّبرات . ناطرين مين يرويهم بالعرق والدّمعات . دموع الشوق ودموع الفراق . ورحله عمر والمختار نايم بعده ما فاق …

صابر الشيّال ..

          صابر يعمل شيّال يشيل الأحمال وأحماله من نوع آخر . يحمل هموم العالم على كتفيه قرارات وهتافات تعودت عليها اذناه . دخله القليل علمه القناعه وان زخارف الحياة هي فقاعة . وان يصدق كل ما تقوله الاذاعه . وأن يرضى بالمقسوم والحرمان هذا ما عوده عليه السلطان لان طاعة الوالي جزء من الايمان . يستيقظ مبكرا يطرد عن كاهله شقاء يوم مضى ينظر الى خيوط الشمس تتسلل تطرد ليلا قضى يبتسم كي ينسى احلامه متمتما كل شيء قضاء وقضى ومن يرضى بالقليل ويمسح الجوخ ينعم بالرضى .هو يحفظ برنامجه اليومي اخذ يحلق لحيته ويلمع حذاءه كي ينتظم بالطابور هو فقد الاحساس بالزمان والمكان وان يكون دوما مامور وعليه ان يزيد من ابتسامته ولا يظهر انه مقهور . وان يحفظ الاسرار ولا يبوح بالمستور حتى ينال الرضى من شيخ الطريقه والبيت المعمور … هذا اليوم حافل بالعمل كم انتظره الناس وعاشوا على أمل أن يجتمع الكبار ويكون القرار وينتهي الجدل . وفي يوم نظر الى عشة الفراخ وراى ان حمامه قد باض فاستبشر خيرا لانه بعد جهد جهيد ومخاض وبعد ان طفح الكيل وفاض . اجتمع المعنيون والاضداد وكان الأخذ والرّد والتمحيص مع الجد . قال قوم نشجب ..وقال غيرهم ندين وقال اخرون ليس باليد حيله وبالله نستعين . ومنهم من قال نستثمر الموضوع ونجعل منه طريقا ومشروع وعزفت كل الالات وقامت حلقات الذكر ومن يحرق البخور .. وبتردد على الملا صدى صوت مسموع هذا ملف قضيناه والحديث به بعد الآن ممنوع والليل يلف المدينه فلا ماء ولا غذاء ولا دواء ولا حتى شموع وعيون الاطفال ملأى بالعتب والدموع صار هذا في زمن الرده والجوع والخنوع …وظيفة صابران يشيل القرارات وينمقها ويحفظها في الخزائن وان يزينها ويرسل نسخا الى كل المدائن . حمل على كتفيه في ذاك اليوم رزمه كبيره كلها شجب وبيده رزمه أخرى كلها ادانات وترك للمتحدث الرسمي تبليغ الاستنكارات وساربها مبتسما كما عودوه الى قبو القرارات هو يحفظ عمله عن ظهر قلب يشيل الاحمال ويضعها على الرفوف ويصنفها حسب الموضوع في صفوف . ويعطي منها نسخة للأخبار بعد ان يلمعها ويمسح عنها الغبار .. من قال انه يوجد حصار والهرره والثعالب تقطع الحدود ليل نهار .. وحتى الصراصير والذباب وكل الزواحف والكلاب .. لكن ممنوع على الانفار ..لانهم مشاغبون ولم يحترموا القرار .. كان عليهم أن يركعوا سجودا وان يؤمنوا باله فرعون معبودا وان يكون كتابهم ما ارادوه بالحوار فهو منزل ومن يكفر به مصيره العقاب والنار . آه يا طويل العمر كم تمنيت أن تكون غير ذلك . وأن تنير ليلنا الحالك … وأن تشيل عني وأشيل معك وأن تسمعني وأن أسمعك … لكني أعلم كم أنت مكبّل بالقيود وأنك تهوى سماع الشعر والصيد والقعود . وأن من يمدحك بالموال والأقوال عليه تجود ومن يخالفك الرأي فهو منشق وعاق وكافر خالف المعبود …..لكنك لم تسمعني وانا لن اسمعك ..لأني أنا الاسير حر أكثر منك في مربعك ..وان ضيوفك هم أصحاب الدار والقرار في مرتعك .. صابر يشيل الأحمال منذ ستين عاما .. قرارات شجب استنكار ادانات لكن العالم عيناه مغمضتان ومن أذناه مثقوبتان هيهات أن يسمع هيهات .

حب في زمن الكورونا ..

         صوت القطار يبدّد السّكون وقضبان السّكة الحديديّة تهتز وكأنّها ترقص طرباً على ايقاع صوت العجلات وهي تسابق الزّمن وكأن القطار على موعد للقاء حبيبته ألا وهي المحطّة القادمة . ألرّكاب في وجوم وكلّ ينظر الى الآخر بخشية حتّى الحديث بينهم كان معدوم . أخذ القطار يتهادى في مسيره وصوت صافرته يعلن قرب الوصول . في المحّطة أُناسٌ كثيرون البعض ينتظر قريب أوحبيب وآخرون يريدون السّفر . كانت سلمى تقف وتنتظر متلهّفة للقاء خطيبها أحمد وهي تضع كمّامه .  إن الكورونا معدية وهي حريصة على سلامة نفسها وسلامة غيرها . نزل أحمد من القطار ..توجّه الى سلمى بعد أن لمحها بين المنتظرين . تقدّم  مهرولا كم كان مشتاق لها . شهران قضاهما بعيداً عنها . أخذ قلبه يخفق بسرعه .. الابتسامة إرتسمت على وجهه . نعم سلمى تنتظره وهي واقفة بقامتها الممشوقه تنظر اليه وكلّها لهفة للقائه. إقترب منها وسرعان ما راودت سلمى أفكار حول تعليمات الوقايه من فايروس الكرونا حيث لا قُبل ولا سلام والقليل من الكلام . تردّدت باتخاذ القرار هل تنزع الكمّامه عن وجهها  .. هل تصافحه وهل وهل  ….؟ صراع دار في خلدها بين نداء الحبّ ونداء الحذر أو لنقل العاطفه مع العقل فأيّهما يغلب .؟  ..انتصر العقل على العاطفه . نظر أحمد الى سلمى مبتسما وخاطبها قائلا ..=  الآن عرفت كم تحبّيني . حرصك على ذاتك هو من أجلي تكفيني نظراتك لأنّها تحمل كل معاني الحب والوفاء كم  أُحبّكِ …= أجابته قائلة وأنا أحبّك يا أحمد لا أريد أن يفرّق بيننا المرض وفتحت شنطة كانت تحملها وناولته كمّامه لبسها وسارا كعصفورين تبتسم لهما الحياة …

روح رياضيّه ..

 شو القصّه يا رجّال .. معصّب وحالتك حاله .. شو زرعتها رز وطلعت إنخاله ؟ ولاّ ماتت البقره الشّقره ولاّ الجاجه القرّاقه الحمره ..! = يا مستوره لا بقره شقره ولا جاجه حمره .. القصّه وما فيها انّي معصّب من اللي صار واللي جرا  .. واللي انكتب في الجرايد واللي انقرا والشمتانين فينا وفرحانين وكأنهم حرّرو فلسطين .. يا حرمه اخسرنا وضاع حالنا ومالنا .  وضاع تعب سنين وضاعت آمالنا …  = يا خيبتي .. شو خسرت ؟ هوّه إنت حاطط مصاريك في البورصه اللي بيقولوا عنها ورخص الدّولار ..  ولاّ مشغلهم مع المختار السّمسار .. ؟  = كمان لا بورصه ولا مختار.. اي والله من اللي صار عقلي طار … =  يمكن زعلان من غلا الأسعار. أو ما قبّضوك المعاش . أو سماعك للأخبار .؟  = لا أخبار ولا أسعار.. مش معقول لازم الدنيا تقوم وتقعد . والمظاهرات والاستنكار في كل بلد وكل دار .  وننزل للشوارع من اللي صار ومجلس الجامعه العربيه ينعقد .. ودول عدم الانحياز .  ومجلس تعاون الكاز . وحتى مجلس الأمن ياخد قرار . الليله وقبل ما يطلع النهار . .!  = آه هلحين فهمت .. عايزهم يعملوا اجتماع على شان القدس والمستوطنات .. وهدم البيوت وسحب الهويّات .  =  كمان ما هو هاظه المقصود .. يا حرمه خلّي مخك وساع .. في المهم وفي الأهم .  =  ويا ترى شو هوّه الأهم يا أبو العُرّيفْ ..!؟  = بشوف لسانك صار طويل يا فهمانه بقول إختصري في الخُرّاف أحسن ما إتصيري ندمانه إنتي ما بتّابعي الأخبار والعناوين . وما بِيهمّك من الدّنيا غير الطبيخ والفساتين وطق الحكي مع جارتك إم أمين ..  بقول يا فهمانه إنغلبنا .. انغلبنا في الفوطبول .. يعني برشلونه خسرت المباراه قدّام ريال مدريد .  وإنتي بتعرفي إني بحب برشلونه وبشجّع فريق برشلونه . وصدقيني يومها قبل المباراه صلّيت الصبح والظهر والعصر .  ودعيت من كل قلبي علشان يغلبوا وأنول النّصر لكن أكيد كان في مؤآمره .. إلحكم كان قابض وجمهور الملعب قابض .  أنا  شفتهم فرحانين مثل القرود  .ومدربهم عيونه إبتلمع من الفرح مثل الشيطان كأنّه بيقول انا موجود . والكل حامل علم ريال مدريد .  بلوّح فيه وهوّه فرحان وسعيد . ولمّن غلبوا عملوا طنّه ورنّه  كأنهم كسبوا الآخره ومقعد في الجنّه . وكمان  في تسريب خبر .. بيقولوا يا ستي انهم جماعة الرّيال عاملين عمل .  والفوطبول مقري عليه . وراشّين في الملعب كركديه  لأنهم في بلادهم شاطرين في التّنجيم . وفي خبر كمان بيقول إنه هذه مؤامره من الإستعمار .  قالوا لهم لازم تغلبوا برشلونه . على شان بتطالب إنها تنفصل عن الإسبان مهو أنا بحبهم علشان هُمّه زيْنا بطالبو بتحرير أرضهم من الاحتلال وبعد المباراه قامت طوشه في القهوه بين المشجعين وإشي إيقول زبيب وإشي إيقول تين …= لكن يا أبو صابر هذولا أغراب عنّا لا إحنا منهم ولا هُمّه منّا  وهذه رياضه فيها الغالب والمغلوب . ولويش العتب واللوم والوجه المقلوب .  =  اسكتي .. انتي شو بيعرفك في الرّياضه . مهي الرّياضه صارت سياسه . ومهمّه للجميع من النفر للرّياسه .  وكل حاجه هل أيام مربوطه بالفوطبول والسّياسه . حتى رغيف الخبز والتّعاسه . كان حظهم إبيفلق الحجر وبتشوفي بُكره رايحيين ينغلبوا وبتسمعي الخبر .  ويقولوا بيكفينا شرف المشاركه . وساعتها لاعمل هليله مع مباركه …  =  لكن لولاد بسمعهم بيقولو إنّه اللي بيلعب أحسن بيغلب …  = لا يا ستي المثل بيقول ( الحظ لما يواتي الأعمى بيشتغل ساعاتي . والأخرس بيصير حكواتي ).. !  = إذا كان حظ . طيب لويش الهوشه ويعملوا منها قصه وطوشه ..؟ مبروك للي غلب وحظ أحسن للي إنغلب .  =  أنا عارف إنّك فرحانه . وعامله حالك علشاني زعلانه . والحقيقه باينه إنّك بتشجعي فريق مدريد .  أي علي الطلاق إذا هلخرّاف صحيح ليكون بينا لفراق . وأخلّي أيّامك أحمض من السُّمّاق …  = حلمك شوي يا رجّال أحسن ما يطق من رقبتك عرق .  احنا عايزينك زخر لهلوطن وبيكفي قال وقيل وفتنه ومحن .  انا بعرف يا رجال انه قلبك كبير وحبّك للناس أعمق من البير . حمقان وزعلان على شان لعبة فوطبول ..  كان واجب عليك تسعى لعمل عطوه ( كَمْ ولَمْ ) على الطّريقه الفلسطينيّه وتبارك للي غلب بروح رياضيّه.  وواجب تعزمهم على أكلة منسف أو مسخّن بالطّابون  وإيصير المشجعين حبايب وأخوان ..  ونصلي الجميع على النّبي العدنان . -  كلامك معقول بدي أبلع هل غلب ولو إنّه بيعمل غصّه في القلب  ورايح أقترح عليهم الحل طالما في إنقسام وفريقين رايحه إتظل المشاكل موجوده ..والحل إنهم يعملوا فريق  مشترك لحتّى يفرح الكل . وإيقولو عِملها أبوصابر . وإيكون مدرّب الفريق أبو صلعه زيدان من الجزائر .. !

عربايه ..

أنا غَلْطانْ يا إمْ صابِر وبَعْتْرِفْ إنِّكْ عَلى حَقْ وبْكُلْ رِضى بَحُط ْإيدي في الشَّقْ وخلّي النّاسْ ايقولو شو ما يقولو خلّيهُمْ يقولو أبو صابر مَحكومْ لمَرتُه وإنّه مثل الطّرْطور وحتّى مثل عَصايِةْ النّاطورْ
…= لا يا أبو صابر سَلامِة قيمتَكْ ومقدارَكْ . والله يخَلّيكْ ويعطيك الصحه إنْت وحْمارَكْ وصوتَكْ إيْظَلْ مْلَعْلِعْ في الحارَه وجُوّاةْ دارَكْ
…= طولْ عُمرِكْ يا إم صابرْ أصيلهْ وأفكارِكْ عَظيمِهْ ونَبيلهْ لكنْ صارْ الحالْ مثلْ المَيِّهْ في الغُرْبالْ . ولازِمْ أبيعْ لحْمارْ ويمكن ابيعو لجارنا عبد الجبار . وبهذي الحالِهْ بَوفّرْ كُلْ يومْ رَبْطِةْ بَرْسيمْ ورَطِلْ شعيرْ . وشَطارِةْ الانْسانْ في التّدْبيرْ والتّوفيرْ . ومثِلْ ما بيقولْ المَثلْ نُقْطِةْ مَيّه على نُقْطهْ بيعملو بيرْ ، وبحق لحمارْ بشتري عَرَبيّه لأنها العَربيّه ما بِدْها أكِلْ ولا شُرْبْ ولا زعيقْ ولا ضَرْبْ . وبيعْ الخُضْرَهْ عليها في الحارات بيْوَفّرْ مَصاري وبنْصيرْ مِثل المَسؤولينْ والخَواجاتْ . أوْبِنْوَدِّعْ الطّفرْ ونيّالْ مين سَرى وباعْ واشتَرى
… = إتوكل على ألله يا زلمه وربّي إيسهّل أمرك وايطول في عمرك
وفي اليوم التّالي باع أبو صابر حماره واشترى عربايه جرّها الى بيته وأوقفها بجوار الباب ونادى على زوجته لتراها وهو يتأمّلها بإعجاب
….. = مَبْروكْ العَربايِهْ يا أبو صابرْ
… = شو بشوف تمك التوء وبتقولي عربايه اسمها عربيه مش عربايه ولا انعديتي من جارتك ام فوفو بدال ما اتقول هلئيت بتئول هلئ وبدال يما ويابا ماما وبابا يعني كمان شويه رايحه اتناديني ابو صوصو بدال ابو صابر
… = مهو يا رجال بدي أنزّك حالي وأشوف دلالي وإنْ شاللهْ تْشوفْ على وجِهّا الخيرْ ويُرُزْقكْ مثلْ ما بيُرزُقْ الطّيرْ وايظل راسك مرفوع لفوق . بجاه الأوليا وتظل مرزوق . حتى ناكل بدل العدس اللحم ونشوي الجاج على الفحم
… = الله يْبارِكْ فيكي ورَبّي إلي يْخلّيكي يا فهمانه يا بنت الأصول . وتظلي إلي سند ومنوره حياتي على طول
…= لكن بأنو لونْ ناوي تدهنها يا ابو صابر ولا تِنْسى تحُطْ عليها خَرَزِهْ زَرْقهْ وحَدْوِةْ احْصانْ وقُرْصْ شَبِّهْ كبيرْ وحَرْزانْ . وتِقرا عَليها حِرْزْ الصّالحينْ والصّمَدِيِّهْ . حتّى تِحْفَظها مِن الحَسَدْ و العينْ الرَدِيّهْ
…= والله يا مَستورَهْ أنا مِحْتارْ وعَقلي من كُثُرْ التَّفكيرْ فَلْ وطارْ
…= شايفتك حايص لايص بدل ما اتكون فرحان ولا عشان فقدت حمارك زعلان
..= لأ مش عشان لحمار الله يسعدو وبعيشه حلوه مع صاحبو لجديد يوعدو لكن قلتيلي أدهن العربيّه مهو إشي بيحيّر يا إم صابر يَعني إذا دَهَنْتْ لونْها أخْضَرْ رايْحينْ يقولو عنّي إنّي حَمْساوي وأنّي سَبَبْ الانْقِسامْ وكُل البَلاوي والباقيين مِشْ رايحينْ يِشتْرو مِنّي وكثيرْ مِن النّاسْ رايحينْ إيْقاطعوني ويِبِعْدو عنَّي ، وإذا دَهَنْتْها أصْفَرْ رايحينْ يقولو هذا فَتْحاوي ومِثلْ الجَماعَهْ على لَهْطْ مَصارينا والقَضِيّهْ ناوي ، وأذا أحْمَرْ أكيدْ بيقولو إنّي شُيوعي ويَساري وايْلوموني بْكُلْ شيئ حَتّى لأنّي بِعْتْ حْماري ، وإذا أبْيَضْ بيقولو هذا مُلحِدْ ومِنْ غيرْ دينْ ولونْ . ونافِخْ حالُهْ مِثل البَلّونْ ، واذا دَهنتْها بِاللون الأسْوَدْ رايْحين ايقولو عَنّي مِنْ جَماعِةْ داعِشْ وبَقولْ ان كُلْ خَلْقْ الله كُفّارْ ولازِمْ قَطِعْ روسْهُمْ بِالسّيفْ البَتّارْ إذا ما بايَعو الخَليفِهْ وتْكونْ دَشاديشْهُمْ قَصيرِهْ ولِحاهُمْ مِثْل اللّيفِهْ ، وإذا أزْرَقْ بيقولو إنّي عَميلْ والتَّنْسيق مَعْ اللّونْ هُو الدّليلْ ، ولَكلْ لونْ في قُوّالِهْ وتَزْميرْ وتَطْبيلْ ، ومِشْ رايحينْ إيْسيبوني بْحالي وأغَنّي منْ راسي مَوّالي
…= ولا يهمَّكْ يا أبو صابرأنا عندي الحَلْ وفيهْ رايحْ ترْضا وتِرْضي الكُلْ …= إلحقيني بالحَلْ حَتّى أرْتاحْ وأسْري على الشّغلْ من الصّباحْ ويهْدى بال عقلي ويرْتاحْ
…= يا أبو صابر إدْهَنْ العَربيه مْقلّمهْ يَعْني خطوطْ بكلّ الألوانْ حتّى تِسْعدْ الزَّباينْ والكُل إيْكونْ رَضيانْ
…= حَتّى لو دَهَنْتها خطوطْ بِتْصيرْ مثلْ عَلمْ أميرْكا ورايحينْ إيقولو عَنّي مِتْضامِنْ مَعْ الأميرْكانْ . وإنّي سَبَبْ الحَرْبْ في العِراقْ وأفَغانِسْتانْ ، يا مَسْتورَهْ حتّى لو نقّطْتْها تَنْقيطْ رايحينْ إيْلاقولْها فَتْوى وايقولو عَن المَلْفوفْ قَرْنابيطْ وانّي مِن غيرْ ذوفْ وعَبيطْ ،كثيرْ مِن النّاسْ هِوايِتْهُمْ كثْرِةْ الكَلامْ والكُلْ صارْ يِفْتي في الصّحْ والغَلَطْ والحَلالْ والحَرامْ وعَلَشانْ هذا الحالْ بنْظَلْ مَكانَكْ واقِفْ وما بنِتْقَدَّمْ خَطوِه لقُدّامْ
…= يا أبو صابر هَلحينْ خَطَرْ على بالي هَلحاجِهْ
…= قولي يا سِتّي واذا حَلّيتي المُشْكِلِهْ إلِكْ عِندي جاجِهْ مْحَمّرهْ ومْقَمَّرَهْ مَعْ إكْماجِهْ
…= خَطَرْ في عَقلْ بالي تِدْهَنْها بْلونْ لتْرابْ يَعني بْلونْ تْرابِ الوَطَنْ وتُرْسُمْ عَليها خُضْرَهْ وزيتونْ وتْزَيِّنْ دايِرْها بالوَرْدْ والحَنّونْ
…= يا عيني عَليكي ورَبْنا إلي ايْخلّيكي طَبْعاً مْوافِقْ وأنا منّكْ كثيرْ متْشَكّرْ ومَمْنونْ ولَتْرابَكْ يا وَطنْ كُلْ شيئْ بيهونْ …

تفسير حُلم ..

         بِدّي تْفَسْريلي هَلْ حِلمْ يا إم صابرْ ..= خيرْ والصّلاةُ على النّبي  ، قولْ يا أبو صابر قولْ شو حْلِمْتْ وانشاء الله إيْكونْ فالْ خيرْ  وإيكونْ سَعْدَكْ طايِرْ على جَناح الطّيرْ ..= هذا يا سِتّي حلِمتْ إنّي ساكِنْ في عمارَهْ واقِفْ على بابْها سَيّارهْ ، واثْنينْ حُرّاسْ كُلهُمْ عَزيمِهْ وباسْ رَهْن الإشارَهْ ، والنّاسْ مَصْفوفينْ عالصّفينْ في الحارَهْ بيْقولو يَعيشْ إبو صابرْ بْيِلبَقلو المَجْلسْ حَتّى الإمارَهْ ، وأنا لابسْ بَدْلِهْ جْديدِهْ مَعْ نَظّارَهْ وراكِبْ في مَوْكبْ رايِحْ عالوِزارَهْ ، والكُلْ بيِهْتِفْ بإسْمي يا أبو المَفْهومِيّهْ والشّطارَهْ جيبِلْنا حَقْنا وخَلّي العَدِلْ إتْهِلْ انْوارَهْ ، وأنا ببْتسمْ وبَلَوِّحْ مِثلْ صَيّادْ بإيْدُهْ صُنّارَهْ ، قولي يا فَهْمانِه شو التّفْسيرْ ولا تُنشْري السِّرْ خَلّيهْ في قاعْ بيرْ ..= مَبْروكْ يا أبو صابِرْ أيْ واللهِ نَفْسي أفْقَعْ زَغْروتِهْ ، وأنُطْ من الفَرَحْ مثْل البَنّوتِهْ ، يا أبو صابِر باضَتْلَكْ عَالوَتَدْ والحَظْ العاثِرْ ولّى لِلأبَدْ ، هذا يا سيدي رايِحْ إتْرَشِّحْ حالَكْ للأنْتِخاباتْ ، وتِنْجَحْ وتْصيرْ من المُهمّينْ في البَلدْ والباشاواتْ ، وايْصْيرْلكْ طَنِّهْ ورَنِّهْ وشانْ وشِنْشانْ ، وصُوَرَكْ امْعَلّقَهْ في المَجالِسْ والميدانْ ..= وكِلِمْتَكْ تِنكْتِبْ في الجَرايِدْ عِنوانْ ..= ألله إيْبَشْرِكْ بالخيرْ يا وِجْهِ السَّعدْ وإلِكْ عَلَيّي هذا الوَعْدْ ، نِذِرْ عَليّي لأشْتْريلِكْ أحْلا فُسْتانْ وجوزْ أساوِرْ مِن الذَّهبْ الأصْفَر الرَّنّانْ ، وهَلْحينْ روحي إعْمَليلْنا فِنْجانْ قَهْوِهْ على هَلْ خَبَرِيِّهْ وكَمانْ فْطورْ مْرَتَّبْ وحَرْزانْ …  ولكِنْ كانَ ما كانْ .. سيّارَة تَقِفُ أمامَ بَيتْ أبو صابرْ نَزَلَ مِنْها إثْنان شِدادٌ غِلاظْ وطَرَقا الباب واقتَحَماه دونَ إذنٍ أو جَوابْ ، وَوَقَفا أمامَ أبا صابِر كالرَّسَدْ وطَلبا مِنْهُ مُرافَقَتَهُمْ بلا مُقاوَمَةٍ أو نَكَدْ  … تَمَلْمَلَ مِنَ الغَيْظِ وجَحَظَتْ عَيْناهْ وقالَ مِنْكَ الفَرَجُ يا ألله وَصاحَ بِهِمْ قائِلا …= خيرْ يا عَمّي خيرْ يا طيرْ دَخَلْتو الدّارْ مِنْ غيرْ دَسْتورْ ولا حاظورْ هِيّهْ الدّارْ وَكالهْ مِنْ غيرْ بَوّابْ  ولاّ حاكورَهْ داشْرِهْ  منْ غيرْ صْحابْ ، لَويشْ هَلْ زْعيقْ الّي بِيْخَلّي المِيِّتْ إيْفيقْ …= إنْت مَطلوبْ عَشانْ مَكْسورْ عَليكْ ضَرايِبْ وَلاّ فاكِرْ إنّو حَقْ الحُكومِهْ سايِبْ ، صَدَرْ قَرارْ بإلقاءْ القَبْضْ عَليكْ وحَطْ الكَلَبْشاتْ في إديكْ سَواءْ كُنْتْ حاضِرْ أو غايِبْ … تَمْتَمْ أبو صابر وقالْ – يا رَبّي إتْنَجّيني من المَصايِبْ  أنا عارِفْ طولْ عُمُرْ حَظّي خايِبْ وعايِبْ ، بِتْقولْ حَرَمْنا المَصونْ فَهْمانِهْ إنّو تَفْسير الحِلمْ كانْ للإنتِخاباتْ لكنْ طِلِعْ خَرابْ بيت وسِجِنْ مَعْ غَراماتْ … شاطْرينْ عَلى الفُقَرا أمّا الأغْنِيا والواصْلينْ صَحْتينْ عَلى قَلبْهُمْ سِرْقِةْ المَلايينْ .. واااعَجَبي ..!!!

كُنتينر كورونا ..

عاد أبو صابر إلى بيته عصراً بعد أن قام ببيع أحذيه وبوابيج كان قد إستوردها من الصّين . دخل البيت وجلس ينتظر زوجته لكنّها لم تحضر فأخذ بالصّياح مناديا عليها …
يا فهمانه يا فهمانه وين إنتي
نسوان آخر زمان قومي الدّنيا صارت العصر أكيد إنتي نايمه ومطنشه واجباتك وعامله حالك عيّانه ودايماً مسطله ونعسانه هالمره إللي عندي يا نايمه يا حايمه ولمّا اتشوفني بتشكي وبتبكي آآه يا جنبي وآآه يا راسي واليوم غسلت وجليت واليوم طبخت وقشّيت وبتحمّلني جميله على شان شغل البيت قومي يا مره أي قومي قامت قيامتك والنّاس نايمه قومي إعمليلي كبّاية يانسون وأجلي طق الحكي مع النّسوان عالبلفون …= حاضر حاضر هي أنا جايه يصبحك بالخير يا أبو صابر …= قال صبحك بالخير قال . الدّنيا صارت العصر يا مره وإنتي مش عارفه شو صار وشو جره …= بشوفك راجع من الشّغل بدري مش عوايدك والزّعل مبيّن على وجهك وكايدك …= أيوه إرجعت بدري إشتغلت اليوم واللي فيها كافيها خلصي أعملي كبّاية يانسون وبلاش لت وعجن علشان راسي موجوع وبيطحن مخّي طحن …= لكن عمرك ما شربت اليانسون وكنت تقول إنّو للعيّانين سلامتك إنت عيّان يا إبو صابر …= أيوه كنت أقول ويا ستّي منّك السّماح ولا تآخذيني يا ست الملاح ومن يوم وطالع بدّي أصير أشرب يانسون من الصّباح للرّباح لأنّك ما بتعرفي شو صار بالبلد …= غليت قلبي يا أبو صابر شو صار لأنّي بطّلت أسمع الأخبار …= إلدنيا صارت متل الخبيصه والعيشه رايحه إتصير عويصه …= أي قول شغلت بالي وخربط أفكاري وحالي إحكي يا زلمة …= هادا يا مستوره بيقولو إنها البلد مليانه كورونه وكل النّاس هاجمين بيشترو مونه والأسعار غليت والحاجه بعينهم حليت إتصوّري الكمّامه اللي كان حقها قرش صار حقها عشرة وكل واحد لاوي بوزه من الخوف وباين عليه الكشره …= أنا بعرف إنّو طول عمرك شاطر أي يا زلمه لونّك إستوردت كونتينر ولا إتنين من هاذي الكرونا اللي بتقول عنها مبيّن عليها موديل بوابيج جديد أبتنفع للمناسبات والعيد والمتل بيقول مين سرى باع واشترى …= قال أستورد كرونا قال يا فهمانه هادي لكرونا عيا يعني مرض أللهم عافينا وإبعدها عنّا وإكفينا …= آاه هلقيت إفهمت ليش بدّك تشرب يانسون يعني اليانسون بينفع دوا للكرونا …= هادا إللي بيقولوه النّاس وكلهم هاجمين على العطّار أبو إلياس تيشترو تحويجة اليانسون أوبيقول إنّو الشّفا فيها مضمون …= حاضر يا أبو صابر حاضر إنت بتأمرني يا تاج راسي ويجعلك للهم والغم بعيد وناسي …= ما يأمر عليكي ظالم إلنّاس عقلها طار والرّبحانين من كل هالوطه هم التّجار أي إتصوري مثل ما قلتلك حاجات كتيره زاد سعرها عشر مرّات والبلد مليانه نقل أخبار وإشاعات وإحنا رايح ينقطع رزقنا من بيع البوابيج والكنادر عشان بضاعتنا من الصين مهمّه النّاس بيقولو إنّو لكرونا إجتنا من الصّين وأكيد خايفين ينعدو وانشالله هل هم عنّا يبعدو يعني لا رايحه ولا جايه ولا بيعه ولا شروه وضروري أشوفلي شغله غير هالشّغله ….= أي أطيعه تقطع لكرونه والصّين وربّي يبعتها لكل العدوّين .
في اليوم التالي عاد أبو صابر إلى منزله يحمل معه شوال مليئ بالأقمشه وقال لزوجته …
يا إم صابر بدّي إتحضريلي ماكنة لخياطة اللي عاملتيلي إيّاها طاوله وحاطّه عليها أغراض وازواء لأنّي من يوم ما إتجوزتك وإنتي راميتيها هلئيت أجا وقتها …= شو لزوم هالماكنه يا أبو صابر يعني مش شايفه إنّي أنا جبتلك معايي كيس مليان قماش إشي مقلّم وإشي مخطّط وإشي مورّد وإشي منقّط مهو بدّي أعمل من لقماش كمّامات وأنزّلهم على السوق أبيعهم وهاذي فرصه إلنا لازم نستغلها ونستفيد منها والّي بيلحق السّوق بياكل برقوق …= قال كمّامات قال إلي سنه بقلّك يا أبو صابر جيبلنا قماش نعمل برادي وإنت مطنشني أي هادا لقماش كتير حلو وبجنّن للبرادي ورزقي ورزقك على الله …= يا ستّي ونِعم بالله يعني حطّيتي عينك عليهم بِدّك إتسويهم برادي . أي والله ما أنا كاسفك وبرايك راضي . سوّيهم يا ست الدّار متل ما بِدّك وبلا كمّامات وبلا وجع قلب واللي كاتبو الله صاير .. بس كل واحد إيدير بالو على حالو هذي لكرونه ملعونه والإحتياط منها واجب وبلاش مباوسه بين الأهل والحبايب ..

تحت الزيتونه ..

تحت الزيتونه ..

     يا إم صابر بعد كتير من التّفكير والتّمحيص والتّدبير وبعد صلاة الإستخاره قرّرت أسيب البلد والحاره وأهاجر من هذه لبلاد والرّزق على رب العباد …= يا خيبتي يا أبو صابر يعني قرّرت تبيع الدّار والغنمات والحمار وتستغني عن عِزوتك والجار وتروح لبلاد الكفّار …= يا مستوره لا تقولي عنهم كفّار أي عليّ الجيره عندهم دين أكثر منّا واللي عايش عندهم مستور في عيشته بيتهنّى ، ومواقفهم منيحه وقت الشّدّه والزّحمه ومعاملتهم كلها إنسانيّه ورحمه لأن الإنسان موقف ما هو طق حكي ومنسف ورز ولحمه ، وحضري حالك على شان ترافقيني بالسّفر ونودّع عيشة الفاقه والطّفر والله الرّزاق وبيعطي مين سعى ومين صبر…= يا أبو صابر أنا من هالبلاد ما بهاجر لأن روحي مزروعه فيها مثل الزّيتون والقناطر …= طول عمرِك وجه فقر وأنا عليكي صابر ومقهور منّك قهر …= يا رجال عيشة القهر أحسن من العيشه غريب في بلاد الخواجات تُكنس شوارعهم وتعيش على الإعانات ، في بلاد الغربه بتعيش وحيد ومقطوع ورايح تندم وتقول ما أحلا القعده تحت الزّيتونه حتى مع الجوع …= هذا صايره يا إم صابر وطنيّه وما ناقص غير تقفي وتُخطبي في الناس عن القضيّه ، يا إم صابر بقول حضري حالك وحطّي الأغراض الضّروريّة في حِزمات .. ع شان ناوي أهاجر لبلاد الخواجات ، ونبعد عن الهم والغم وشملنا مع العيشة الكريمة يلتم ، بيقولوا إنه عندهم إحترام للإنسان والكل ماخد حقّه بالقسط والميزان وما بتعامله الحكومة مثل الحيوان …= لكن يا أبو صابر كيف بهون عليك تتخلّى عن وطنك وعزوتك وسندك …= يا مستورة طول عمرنا بنغني للوطن وما لقينا غير التعاسة والمحن وجور القوى وسمّة البد ن ، وبنقول الوحدة وصابرين عالشّده لكن طال العذاب وطالت المُدّه ، حياتنا كلها شعارات وما شفنا غير الهزايم والنّكسات والزعيق والتّحقيق والسجون والمعتقلات ، الحكّام عايشين في واد والشعب في واد والفقر ضارب أطنابه وبيقولوا الرّزق على رب العباد ، وللي بيقول كلمة الحق بتندق رقبته دق …= طيّب لو هاجرنا لبلاد برّة هاد إذا وصلنا بالسّلامة وما غرقنا بالبحر وأكلتنا النّدامة شو ناوي تشتغل يا رجال وإنت ما بتعرف ترطن بكلامهم ولا علامك مثل علامهم …= يا ستّي بشتغل أي شغلة لأنّه عندهم ما في واسطة والحكومة بتعطي تأمين وبتوفّر عيشة محترمة لكل المواطنين قال بقولوا عليهم انهم كفار صدقيني مشايخنا أغلبهم ما بيفرق بين الفقّوس والخيار وحتى بين البغل من الحمار ..= وأكيد رايح تلبس متل لبسهم وتتخلّى عن القُنْباز والحطّة وتلبس برنيطة مع ربطة وتصير تتقمّز متل البطّة …= أي أنا عارف لويش انتي ما بدّك نسافر .. أكيد بتغاري من نسوانهم أو ع شان مش قادرة تفارقي جاراتك كل يوم طق حكي وقال وقُلنا من الصّباح للرّباح . لأن نسوان الناس برّة ما عندهم هالعادة وكل وحدة منهم بتشتغل مثل جوزها وزيادة ، وبتقابله بابتسامة آخر النهار مش لاوية بوزها ومنكدة عليه الدار ، ولا تنسي انّو خالي موجود في هديك لبلاد .. أكيد رايح يستقبلنا ويقوم بالواجب على شان إحنا أهل وقرايب ، والمثل بيقول ثلثين الولد لخالو وفي بيت خالو بشوف دلاله …= يا أبو صابر النّاس في بلاد برّة ساكنين في شُقق صغيرة وكل واحد حِمله على قدّه يعني ما في عندهم مثل عاداتنا عزايم وولايم وأغلب أكلهم برّه البيت في المطاعم ، يا إم صابر أنا قرّرت وما في رجعة بكلامي وواجب عليكي طاعتي وإحترامي ، ولا تنسي تاخدي معك الصّاج لعمل الشراك على شان المسخّن لإنك عارفة انّي بحترم المسخّن وما بقدر إستغني عنّو لأنّه في بلاد الخواجات ما في مِنّه …= قال الصّاج قال ما ناقص غير تقول خدي معك الطّابون وشوال قُطّين مع زبيب وتنكة زيتون …= اآااه ومالو خدي معاكي كمان مفتول وعشر كيلو حمّص ومثلهم فول وكيس ملوخيّة وللشاي حزمة ميرميّة …= لكن أنا سمعت ان هذه الأغراض بياخدوها وممنوع تفوت معانا …= يعني ممنوع إيفوت الصّاج والملوخيّة وإنتي عارفة قديش بحبها . أي أجَتْ منهم ما أجت منّي وما بدّي إياهم وايحلّوا عنّي . وعليّ الطلاق ما أنا مسافر وخسارة فيهم أكون عندهم ، يعني بِدْهم أقضيها على الهمبرجر وأكل المسخرة وأنا بعشق ريحة الطّبيخ في الطّنجرة وقدْحِةْ الثّوم فوق الملوخيّه والبصل فوق المجدّرة ، أي صدقيني أفطر كل يوم زيت وزعتر ورغيف طابون محمّر ومقمّر وأسمع ديك جاري أبو عوّاد أحسن من كل هديك لبلاد .. أعيش غريب في وطني ومبهدل وصايم أحسن ما أكنُس شوارع الخواجات وأجلي صحونهم في المطاعم ، وعنّك يا هل وطن ما في رواح وإن طال الليل علينا وزادت لجراح، لأن ورا كل ظل في شمعه مضويه والفجر رايح ايشقشق وننعم بالحرّيه …=والمثل بيقول يا أبو صابر ( اللي بيطلع من داره بينقل مقداره )…= معك حق يا إم صابر وهلحين قومي وإعملي برّاد شاي عالحطب وكلامك موزون وصافي مثل الذّهب … مزروعين فيك يا وطن ..