• محرك بحث جوجل

  • مربعات القائمة الجانبية

      أضف ماتريد من مربعات القائمة الجانبية لتظهر هنا من خلال الذهاب الى قوالب - مربعات القائمة الجانبية اسحبهم الى القائمة الثانية
حتشي فلاحين للحفاظ على لهجة الفلاحين في عالم يحاول التمدن
عباس الكباس
14 مارس 2011, frankoameer @ 6:57 م
15 views

في تشل وكاحة وما في بعدها وكاحة, اليوم خبر عباس الكباس اللي بيتهم حالة انة رئيس للشعب الفلسطيني وللسلطة الفلسطينية ولمنظمة التحرير الفلسطينية ( مش عارف إنا تحرير شو يعني )ومش ظايل علية يكول إلا أنة هو أبو الشعب الفلسطيني زى ما بكا يكول المعزول البهلول حسني باراك الخبر بكول أنة عباس الكباس عمل مكابلة مع راديو الغولة. وبكول فية عباس الكباس انة مستعد يكاوم أي انتفاظة ثالثة في الكوة وأنة لو بعرف عن عملية كتل المستوطن واولادة في المستوطنة اللي جنب نابلس ,تشان مستش الكاتل وبكول انة مستعد يتعاون مع الغولة مشان يسمتشو اللي كتل ,بكول الزلمة أنة بتشى وعيط حسرة على المستوطنين وكلبة حنين يا كبرت أهلة , طبعا أحنا ما بهمنا خبر كتل المستوطنين لاننا أحنا أصلا ما إلنا دخل في الموضوع لا من كريب ولا من بعيد والمسئول عن هذا الكتل هي الغولة نفسها تشيف ما انلفها وانجيبها الاحتلال هو المسئول الأول والأخير وإحنا هذا مش شغلنا لا اندين ولا انأيد عملية كتل من هذا النوع ,لان الثورة الفلسطينية في تاريخها ورغم كل اجرام إسرائيل ضدنا , احنا ما بنسوي شغلات من هالنوع.بس اللي اخطر من هاي العملية تشلها تصريحات عباس الكباس اللي فيها بكول بتشل صراحة انة هو بشتغل اتشر من إسرائيل نفسها على امنها وبكول انة مستعد يكتل أي فلسطيني بفتشر انة يعمل انتفاضة ثالثة ضد اسرائيل, عباس الكباس في مكابلتة ما كال ولا تشلمة عن اللي بسوة المستوطنين تشل يوم في كتل الفلسطينيين ولا مصادرة اراظيهم ولا الهجوم على الكرى الفلسطينية وحرك السيارات والمزروعات الفلسطينية , والكباس نسي التحريض اللي عملة النتن ياهو على الفلسطينية ونسي انة اللي بسوة المستوطنين تشل يوم بكون تحت حراسة جيش الغولة , يعني الزلمة في تشل وكاحة بكول للشعب الفلسطيني طز فيشتم وطز في شهادئشتم وطز في طز في طز في تشل اشي لة علاكة فيشتم انا رئيستشم وبفهم اتشر منتشم واللي بدة يرفع راسة بدي اخبط في بطنة والعن اللي طركة . اتشثر أشي بظحتش في المكابلة برجع عباس الكباس بكول انة مش راح يستنى أي فلسطيني يكلة الشعب بدة إسقاط الرئيس , وراح يكول باي باي ,الزلمة مسدك حالة انة رئيس وبدة الشعب يكلة فليسكط الرئيس , يا عمي إنا بكلك من هالكيتة فلتسكط وانا كفلسطيني بدي اسكاطك لانك مش رئيس منتخب واللي انتخبوك أنت عارف مين همة , والشعب بدة اسكاطك وراح يسكطك مش بطريكة محترمة , بطريكة تليك فيك لاني انا كفلسطيني وكل فلسطيني عنده دم ما بشرفة انك تكون رئيس إلنا , وأنت مكامك بعد اللي كلتة لاذاعة الغولة انك تروح تحاول تصير رئيس هناك عند الغولة مع إنهم مش راح يكبلوك ولكن لعل وعسى يكلولوك تراي اغين لانا أحنا بنكلك غيم أوفر وحل عن سمانا, نصيحة ببلاش ,تتبهدل اتشر ما انت مبهدل , وبكلك إن اللي حواليك بظحجو عليك ومش راح ينفعوك لما تكع الواكعة وراح يتخلوا عندك وكتها مش راح ينفع الندم .


يوم المرة العالمي
8 مارس 2011, frankoameer @ 11:21 م
14 views

والله أشي حلو انا نسوي زي باكي دول العالم ونعمل مثلنا مثل تشل الناس لان اصلاً احنا في تراثنا وفي تاريخا العربي الاصيل , اه بكول الاصيل مش التاريخ المخربش والي غير تشل حالنا , اول من احترم المرة واعتبرها شريكة في تشل اشي وحافظ عليها وبعتبرها اغلى شي في الدنيا , في هذا اليوم يوم المرة العالمي انا بكول لتشل النسوان في العالم .تشل سنة وانتن بخير , والمرة الفلسطينية تاج راسنا امنا واختنا وزوجتنا وعمتنا وخالتنا وستنا , تشل سنة وانتن طيبات يا ربي ,بس في هاي المناسبة انا بدي اكول شغلة ان احترام المرة والحفاظ عليها لازم يكون واجب دايما مش بس في يوم المرة العالمي لان المرة هي مش بس نص المجتمع , هي تشل المجتمع لانة بصراحة بدونها احنا ما بنسوى اشي , وبعدين المرة في حياتنا زي الوردة ما بنكدر نعيش بلاها يا عمي , طيب يعني بتخلف وبتربي وبتهتم في تشل اصغيرة واتشبيرة في حياتنا , ودايما شايلة همنا في الحرب والسلم , شايلة همنا لما بنروح الدار ولما بنطلع من الدار , قلبها دايماً علينا , على الاكل لازم نعطيها اشي مكابل اللي بتعملة شوية احترام . لا تنسوا ان الرسول علية الصلاة والسلام لما بلش الدعوة الاسلامية كان معاة سبعة وعشرين مرة الوحدة منهن احسن من الف رجل , والمرة في شعبنا الفلسطيني شاركت وبتشارك جنب على جنب مع الزلمة الفلسطيني , يعني في المختصر المفيد بدون ما اكعد اعدد عن المرة , لازم تشل الناس تعرف انة لولا المرة ما في زلمة بعيش , وانا مني وعلي بكول ان مهما اعملنا ومهما كلنا عن المرة اللي زي الروح في الجسم ما بنكدر نعطيها حكها , وتشل سنة وانتي بخير يا روحي ,وربي يخليكي وردة بتنور حياتنا ,وردة عمرها ما تذبل يا رب العالمين .


منقول لروعة الموضوع _إبراهيم حامد وأحلام التميمي وحوار رغم أنف السجان
8 مارس 2011, frankoameer @ 5:47 م
10 views

ياسر الزعاترة

القصة التالية نقلها لنا فؤاد الخفش، الباحث المعروف في شؤون الأسرى، والمشرف على موقع أحرار على الإنترنت، وهي تحكي واقعة لقاء عابر، بل أكثر من عابر في ساحة سجن “هشارون” الإسرائيلي بين البطلة أحلام التميمي التي تقضي حكماً بالسجن لستة عشر مؤبداً، والمجاهد الأروع، إبراهيم حامد، قائد كتائب القسام في الضفة الغربية، والمعتقل منذ ست سنوات ويتوقع أن ينال الحكم الأكبر في تاريخ دولة الاحتلال، ربما يصل إلى مئة مؤبد، وبالطبع لمشاركته وإشرافه على عمليات أدت إلى مقتل ما يقرب من مئة من الإسرائيليين، حيث يعرف أن كل قتيل يقابله حكم بالمؤبد.

يسعدني أن أنقل هنا بعض وقائع القصة، لاسيما أنني تشرفت بلقاء إبراهيم الذي عاش في عمان لبعض الوقت، حيث عرفته كباحث ومفكر شارك معنا في الكتابة لمجلة “فلسطين المسلمة” خلال النصف الأول من التسعينيات قبل أن يعود الضفة الغربية مفضلاً طريق البندقية على طريق القلم والفكر، فكان أن قدم بعطائه وبطولته ما يتفوق بأثره عن مليون مقال وألف كتاب.

القصة التالية يرويها الخفش نقلاً عن محامي إبراهيم الذي وقف مشدوها أمام ذلك اللقاء بين البطل والبطلة، بين الأخ والأخت، بين التلميذة والأستاذ. يقول الخفش: وقفت أحلام على مسافة ليست بالبعيدة عن إبراهيم، وأشارت له بيدها بعد أن أشهرت إصبع السبابة وقالت له: أخي أبا علي فرّج الله كربك. اصمد واصبر أيها الرجل. الليل ساعات ويرحل. من صوتك وأنت ترتل سورة الإسراء نستلهم الصبر. ومن عيونك التي تشع إيماناً نزداد عزماً ومضاء.

رد عليها أبو علي وقال لها موعدنا مع التحرير قريب، سيزول ليلهم وسيبزغ الفجر، استغلي كل دقيقة من وقتك وهيئي نفسك للقادم من الأيام. سلامي لأخواتي الأسيرات واعلمن أنكنّ الآن تكتبن التاريخ وعين الله ترعاكنّ.

حدث ذلك أثناء لحظات عابرة خرج خلالها إبراهيم لزيارة المحامي بينما كان البطل والبطلة محاطين بعشرات الجنود والمجندات ممن حاولوا بكل الوسائل وشتى الطرق أن يمنعاهما من الكلام، لكن الرسالة وصلت وجاء الرد، ثم مضت البطلة إلى زنزانتها، ومضى البطل إلى عزله (معزول عن بقية الأسرى منذ اعتقاله)، بينما وقف المحامي الذي نقل المشهد مبهوراً من هذه الروح التي تحدثت بها أحلام ومن الثقة التي أجاب بها إبراهيم.

كان إبراهيم كما هي العادة عند الخروج من الزنزانة مقيد اليدين والقدمين يمشي بخطى بطيئة. يداه للأمام. يرتدي بدلة رياضة وفي قدمه حذاء رياضي، بينما يحيط به عشرة جنود جميعهم مدججون بالسلاح، لكن الذعر من البطل لا يغادرهم، وكذلك كانت أحلام مصفدة بالقيود ومن حولها المجندات، لكنها لم تنس الحديث عن موعد الحرية، كما لم تنس أن تبعث بتحياتها إلى زوجة إبراهيم المبعدة، الأسيرة المحررة أم علي وسلمى (أسماء) التي كانت رفيقة قيد لأحلام قبل سنوات.

من أين يستمد هؤلاء الأبطال كل هذه العزيمة وكل هذا الصبر؟ إنه الإيمان، ليس الإيمان بموعد الحرية، لأن شيئاً كهذا يبقى في علم الله، لكنه الإيمان برب عظيم قال لعباده “إنما يوفى الصابرون أجرهم بغير حساب”، وإبراهيم خرج يطلب الشهادة، لكن مشيئة الله جعلته أسيراً، ربما ليكون شاهداً على المرحلة، وليكون عنواناً للصبر، ونموذجاً للعطاء.

هذا المفكر العظيم والبطل الأروع سيبقى شوكة في حلوق الصهاينة، يذكرهم بأنهم راحلون لا محالة عن هذه الأرض التي تلعنهم صباح مساء، وسيظلون يتذكرون أن وراء قضبانهم بطلاً لو كان لديهم مثله لكتبوا عنه الكتب وأنتجوا عنه الأفلام، لكن تاريخهم تاريخ جبن وغدر لا تاريخ بطولة وصبر.

لا يعني ذلك أن أمل إبراهيم وأحلام بالحرية هو مجرد تحليق في الخيال، بل هو أمل حقيقي، وأنا هنا لا أتحدث عن صفقة الأسرى، بل عن زوال هذا الاحتلال الذي يعيش مرحلته الأخيرة بعد أن بدأ منذ سنوات بعيدة محنى التراجع، ولا شك أنه كلما استعادت الأمة قرارها سيقترب أكثر، وهي بدأت تستعيده، من تونس إلى مصر إلى محطات أخرى بإذن الله.

فجر فلسطين وفجر إبراهيم وأحلام وسائر الأبطال قادم بإذن الله، مع التذكير بأن هذا النموذج من الأبطال إنما يرجون ما عند الله أكثر مما عند البشر أو في هذه الدنيا. ألم يجعل رب العزة الآخرة أكبر درجات وأكبر تفضيلاً حتى يتبوأ هؤلاء أماكن تختلف عن سواهم من الناس الأقل إيماناً وعطاء.

سلام على إبراهيم وأحلام وسائر الأبطال الصابرين في كل سجن وكل ثغر من ثغور الحق. سلام، سلام.

صحيفة الدستور الأردنية


ما بعرف رطني إلا ابن بطني
23 فبراير 2011, frankoameer @ 1:36 ص
22 views

من حد ما ولعت في تونس وبلشت الانتفاضة الشعبية ضد ألحرامي زين الهاربين في تونس , بلشنا أنشوف مظاهرات تأييد للرئيس وصاروا يكولولنا هذا الشعب بعبر عن تعاطفه وتأييده للرئيس , في الأخر طلعوا اشويه حرامية اصغار من جماعة الرئيس , ولما صارت المظاهرات في مصر والناس كبعت معها على اسنين الذل والهوان اللي شافوها على زمن الحرامي حسني مبارك طلعت مجموعة من الحرامية واللي سموهم بلطجية في مصر يعملو مظاهرات تضامن مع الحرامي التشبير , وظربو الناس ورتشبو الجمال والحمير بس نسوا يعلقوا صور الرئيس على الحمير والجمال ,وفي ليبيا نفس الموديل طلعوا مجموعة من نفس الحرامية وعملو مظاهرات دعم للكايد المعلم حرامي ليبيا , وفي اليمن نفس الموديل برضوا طلعو علينا حاملين صورة المعتوة الحرامي اللي مسمي حالة رئيس , وهو بينة وبين الله ما بعرف شو معنى تشلمة رئيس , والمصيبة والطامة الكبرى انهم الحرامية الصغار ما بطلعوا الا بعد ما يلقي الحرامي التشبير خطبة على التلفزيون , وكانة بكلهم يلله يا حبايبي شوفوا شغلتشم مع الناس , خليهم يعرفوا اني اعرفت اربي الحرامية الصغار . اما احنا الفلسطينية فمصيبتنا اتشبر من تشل المصايب لانا احنا اللي علمنا الشعوب العربية الثورات واحنا اللي علمنا تشل شعوب العالم على ظرب الحجار وظرب الدبش , بس انا احنا يطلع عنا ناس يحملوا صورة الريس ويعملو مظاهرات في الشارع هذا اللي غريب عنا , لانا احنا متعودين في المظاهرات انشيل صور شهدائنا وصور اسرانا مش صور زعماتنا , لكن الواضح انة سبب تشل مصايبنا هو اللي اجا عنا من عند هذول الزعما الحرامية , عشان هيذا صار عنا حرامية تشبار وحرامية صغار , يشيلوا صور للحرامي التشبير ,وهاذا الفلم بطل ينفع وبطل يمشي علينا , لانا احنا بنعرف اشي بسيط اتشير , ان الرئيس الناس بتنتخبة مشان يرعى مصالحها , والرئيس هو مجرد موظف للدولة , لما يكوم في واجبة ما بنكلة يعطيك العافية لانة بيكبض مصاري مشان يكوم في واجبة , ولما يكصر بنكصر عمرة و بنكلة انتشب غاد وحل عنا خلينا نشوف غيرك هذا المفروض , والرئيس مش نبي ولا آلة لان زمن الانبياء انتهى وما فشي رسل اجديدة على الارض .غير هذا الحتشي فشي عنا الي بعجبة حياه الله واللي ما بعجبة يشرب من البحر الميت.


السلطة تريد اسقاط الشعب
13 فبراير 2011, frankoameer @ 10:43 م
28 views

وكع فرعون عن عرشة , الله لا يكيمة ولا يردة , وكع في الكندرة والايام جاية اذا بالة ينفد في المصاري اللي لطشهن هو واولادة , لانة لو نفد من المحاكم مش رايح ينفد من دعاوي اثنين وثمانين مليون ثم مصري بدعوا علية ليل انهار , وبعد ما وكع فرعون , طبعا هذا الوكوع راح أيأثر علينا احنا الفلسطينية ,لانة فرعون في الة شلة اذناب عنا وبعيشوا بينا , وبلشوا ايرجو وينتفظو وصابهم اسهال , خوف من الشعب يكوم علهيم ويمسح فيهم الارض , صاروا زي الجاجة المظروبة على راسها مش داريين شو يسوا , وبلشوا يكولوا النا ان الشعب بدة ينهي الانكسام , وهمة شباب وحريصين على ان الشعب ينهي الانكسام , مع انهم همه اللي عملو الانكسام وهمه اللي سركوا الشعب وبهدولوا الشعب وجابولنا العار في تشل العالم واخزونا كدام تشل الناس , وهمه نفسهم اللي داسوا على دم الشهدا وعذابات الاسرى وخلونا ملطشة للي بسوا والي بسواش ,وهمه اول من فتح مراكز تحكيك واعتكالات لشبابنا , هذول همه اللي اليوم بدهم يكودوا الشعب مشان ينهي الانكسام .
كبل اتشم شهر لما تلفزيون الجزيرة كشف الوثايك الفلسطينية , طلع علينا واحد من حبايب فرعون اللي بكى مسمي حالة اتشبير الدجالين , وصار يعص على حالة ويسب اشمال يمين وحنبط وجهة من تشر ما عص على حالة وهو يتهم الجزيرة والشيخة موزة انهم همة اللي زيفو الوثايك وهاذي الوثايك مش مزبوطة , وكال اذا ثبت انها الوثايك انسركت منة هو راح يستكيل , وهدد انة راح يرفع كظية على الجزيرة وعلى مديرها ويحبسة ,بس الظاهر انة ما لاكاش الونش اللي يرفع فية الكظية عشان هيذا راح وهو مكدم استقالتة , وكأنا احنا كلكنين في اللي سرك الوثايك والا مين اللي سربها من مكتب الاستاذا, حتى في هذي الشغلة بدة يستهبلنا , احنا يا عمي كلكنين في الي جوا الوثايك , مش كلكنين في اشويه ورك , كلكنين على التنسيك الامنيى والتبادل في المعلومات مع اولاد الغولة وكلكنين على المساومات على وطنا وبلدنا , والحرب الضروس على تشل أشي اله علاكة في المكاومة ضد الغولة . واليوم طالعين في فلم اجديد اسمة ثورة الكرامة , على مين ثورة الكرامة هاذي بالله ؟ على اللي حارب الغولة وحرر غزة من بين أسنانها؟ للهدرجة كله الحيا وصلت! ثورة الكرامة على اللي اختارهم الشعب ! يعني مش ظايل عليشتم الا اتكولو السلطة بدها تسكط الشعب , وانا بكلتشم الشعب اللي اختار مش راح يشارك الا في شغله وحدة هي اسكاط نهج استهبال الشعب , ونهج اذلال الناس , ونهج السركة والعربدة , ونهج شكلبة الحكيكة الي صارت موديل ,والوقت لسه موجود عشان اتصحصحوا وتصحوا من غيبوبة طالت وختيرت , اليوم احنا بدنا احزاب وكوى شبابية , لان أحزابنا تشلها ختيرت وشاخت وخرفنت وصارت مصابة في مرض أسمة الزهايمر.
الشعب بوكف مع رئيس بفهم هم شعبة ومعاناة شعبة , مش رئيس بودي حزمة ورد لوحدة يهودية بتولد في مستشفى في رام الله , وبغمض عينة عن فلسطينية بتموت وهي بتولد في مستشفى في نابلس , الشعب بوكف مع رئيس بكول انا اهم اشي عندي كرامة شعبي ودم شعبي وقضايا وطني وشعبي , مش رئيس بقول انا بصاطير الاحتلال على راسي, ومبسوط على حالة , الشعب بوكف مع رئيس ببوس بصاطير جرحى ومعتكلين شعبة , مش رئيس ببوس شلاطيف اللي بكتل شعبة ليل انهار , هان بدنا ثورة كرامة مشان ننهي الانكسام ونرجع شعب يحترمنا تشل الناس في تشل العالم , لان مستحيل ثم مستحيل يكون في وحدة بين فدائي بكدم دمه وروحة للوطن وبين معطي معلومات للغولة وأولادها .


انتم مش عايزيني ؟انا عايزكم يا حبايبي
31 يناير 2011, frankoameer @ 12:13 ص
25 views

من تشثر ما اتشرهنا الريس الابدي سي حسني , صرنا نتشرة البكر , لانا اكتشفنا علاكة جدلية بين مبارك والبكرة من ناحية الشكل ومن ناحية التفتشير , تشل الشعب طالع بصيح في الشارع المصري وبكلة طيح ولك طيح عن الشجرة وبلاش تياسة , والاستاز متنح فوك , وبكلهم جوزتش وان راد الله , وبحلف تشل الايمان انة هو بحب الشعب والفكرا والمسخمين والمعدمين, وبحب الشرفا والحرامية, وبحب الجيش والشرطة والشعب ,وبحب الجزيره والعربية وبحب الزعماء العرب تشلهم من السعودية للسطلة الفلسطينية , وحتى بحلف مليون طلاك انة بحب اسرائيل واميركا , وبحب التفاح والموز والبرتقان والمزيكا , وبحب يصبغ شعره, وهو رئيس منفتح جدا , حتى انة اشترك في الفيس بوك وتويتر , وعنده ماسنجر وياهو , وهو زية زي الشعب بحب الشعب وبموت في الشعب لدرجة ان بكدرش يفارك الشعب ولا لحظة. الناس بتصيح في الشوارع بتكلة ولك خلص اكرفناك حل عن سمانا , طيح بلا كلة حيا ,طيح يا ابهيم , ولا حياه لمن تنادي . الجيش نزل الشوارع وبلش الطخ وانكتل اللي انكتل والدم طاح واخينا متنح . شكلة مش فاهم شو اللي بصير ؟والا فاهم غلط؟ والا مفكرها الكامرا الخفية؟
مبين علية خلص زية زي باقي زعما هالوطن المسخم حالف يمين انة ما ينزل عن رئاسة الجمهورية الا على القبر ,او على الطياره ويهرب ويفل , ممكن يكون بفكر في العمره وبدة يروح يعمل العمرة على السعودية مثل زين الهاربين؟ممكن يعني يكون غار من زين الهاربين وبكول فشي حد احسن من حد؟ والا يمكن الشعب مش فاهم علية؟ طيب ممكن يكون الزلمة عاملها على حالة ومش كادر يمشي ؟انا بكول انة ما في حل مع هذا التيس الا حل واحد ان الناس اللي في الشوارع تهجم على الكصر الجمهوري وفي الصرامي اتنزلة عشان يدخل كتاب جينتس في بطولة اكل الصرامي من الشعب , لان هيذا حكام حمير ما بيجي معهم غير الصرماية .


قالو لجحا مرة ابوك شخت في الشمس ! قال والله ما في على عينها اشي هجنة
26 يناير 2011, frankoameer @ 6:13 م
24 views

ذاب الثلج وبين اللي تحتة , وطلع اللي تحتة ريحتة بتقلعط , ويا ريت الثلج ما ذاب لانة لما ذاب زاد العذاب ,والعذاب هان عذاب الضمير , وعذاب الهبل اللي عشنا فية عشرين سنة , بنظحتش على حالنا وبنظحتش على شعبنا , تشل اشي بكى كدام عنينا واحنا دافنين روسنا في الرمل زي النعامة, بنكول بجوز احنا غلطانين, وبجوز يطلع هاظا الحتشي مش مزبوط,زي اللي ماشي في الصحرا وميت من العطش وتشل ما شاف سراب يكول لحالة اخيرا اوصلت المي ولما يوصل يلاقي حالة مطرحة لا مي ولا كشل , وهاظا حالنا وحال شعبنا , من عشرين سنة واحنا نظحتش على حالنا ونكول انة في مفاوضات مع الغولة , وبجوز هالمفاوضات ترجعلنا اشي من حقنا وعشنا على امل تشذاب ,مع انا عارفين مسبكا ان الغولة ما بدها تعطينا اشي , وانة احنا نفسنا بنكدرش نوخذ منها اشي لانة فشي في ايدينا عوامل للكوة , هاذي العوامل احنا ظيعناها لما بكت في ايدينا .
جوانا عارفين انها السلطة اللي سويناها من اول يوم سلطة فاظية وسلطة وهمية لا بتحل ولا بتربط ,الا على شعبنا , عملو اللي عملوه في غزه سرقوا ونهبوا ونسكو مع اسرائيل عيني عينك, وعلى التلفزيون طلعو وكالو احنا اكدرنا انوكف عشرات العمليات ضد الغولة واولادها ,بدون خجل وفي تشل وقاحة , وكتلو اتشر من واحد من شعبنا , حتى كبعت مع شعبنا في غزه وفي الصرماية طردوهم ومسحو الارض فيهم وصار اللي صار في غزه ,بعد غزه هربو على الضفة وهناك صار مركز الكياده عشان يرتشبوا على شعبنا ويدلو اجريهم ويسركو على خاطرهم , وشعبنا المسخم مسدك انهم بفاوظو مشان يرجعو حكة , بس الحكيكة عمرها ما بتتخبا وارظنا مكدسة فشي فيها اشي بتخبى , طلع من نصهم ومن جوا دارهم شبانة وتشلتشم متذتشرين شبانة لما كشف عمليات السركة وكصة طفي الظو ,وكتها الجماعة هاجو وماجو وصاروا يكولوا هذا جاسوس بشتغل للغولة , والدليل انة راح كدم هاذي الوثايك للكناة العاشره تبعة الغولة , ولو انة شريف ووطني تشان راح على تلفزيون الجزيرة لان تلفزيون الجزيرة تلفزيون عربي وعنده مسداكية ,طعنو في الزلمة وفي شرفة وفي وطنيتة , حتى خنكوه ونزلو الدمعة من عينة, وكالو رايحين نسوي لجنة للتحكيك في تشل عمليات السركة وعمليات بيع الاراضي في الكدس , والمسخمين سدكو , ومع الوكت الناس نست , وكالو بجوز الله يجيب الخير وهالمفاوضات مع الغولة ترجعلنا شوية من احكوكنا , راحت كصة شبانة وكصة طفي الظو زي عشانا مبيرح , واليوم اجاك يا بلوط مين يعرفك , اجت كناة الجزيره اللي كالو ليش شبانة ما راح عليها وسلمها ملفات الفساد, اجت الجزيرة شخصيا وجابت ملفات بتخرش المي ,وتشفت المستور , وبين تشل اللي صار بين اتشبير المفاوظين , الي طلع صغير بحجم الذبانة ,مش عارف على شو سموه اتشبير ؟ طلع بكول لاولاد الغولة بدنا نعطيتشم اتشبر اورشليم, وابو كرعة بكلهم ليش ما ترجعو على غزه وتحتلو محور كارني , والاجهزة الامنية ! يا حبيبي اجهزة الامن اللي مفروظ في اي مطرح في العالم انها اتدافع عن مواطنيها , وزيرداخلية بكول لابن الغولة , احنا اعطينا الامر في كتل مسؤول في كتايب الاقصى , واظح وظوح الشمس من تشل هاذي الوثايك ان شبيحة السرطة شبيحة بس على شعبنا وانهم بشتغلوا عند الغولة واولادها , لما نشرت الجزيرة هاذي الوثايك , دشروا الوثايك والفظايح ودكو في الجزيرة اللي مبيرح كالو ليش شبانة ما اعطاها الوثايك ,وطلعو يدافعو عن حالهم واجو ايتشحلوها خلعو عينها , اول يوم كال وزير الداخلية هذا تشذب وانا عمري ما اجتمعت مع ابن الغولة موفاز واصلا هذا بكى رافض يعقد معي اي لكاء واليوم بكول انا كعدت معاه مره واحدة , يعني اخينا من اول غزواتة تشسر عصاتة , واتشبير المفاوظين بكول هاذي الوثايق مزبوطة صارت بس الحتشي اتغير من الجزيرة والجزيرة تشذابة ,يعني الجزيرة بتخطط انها تحتل الظفة , وتوخذها من السلطة , بالتشم كطر خايفة انها فلسطين اتنافسها على كاس العالم سنة 2022 وعشان هيذا بدها تسقط السلطة وبتفظح فيها؟


ثورة فرد بثورة شعب
15 يناير 2011, frankoameer @ 10:33 م
29 views

هاظا التشافر لينين شو كال , كال انة العبد اللي بقبل في عبوديتة لا يستحك الا الاحتكار والازدراء , طبعا هو بكصد عن الشعوب اللي بتكبل في عبوديتها وظلمها . شعوبنا العربية تشلها من اولها لاخرها حالها من حال بعظها , تشلها شعوب مكهوره ومظلومة من حكامها اللي رتشبو عليها ودلو اجريهم , طبعا مشان العالم ما يحتكر شعوبنا لازم شعوبنا تشلها تكوم وتنتفظ على الحكام الحرامية اللي راتشبين عليها ,زيهم زي شعب تونس البطل , هذا الشعب الي كان كانة شعب ميت من ثلاثين سنة وكام من الموت مرة وحده , هذا الشعب العظيم اللي اثبت لتشل الناس انة ابو الكاسم الشابي هو ابنهم وهو محرك الهم لما كال : ( اذا الشعب يوما اراد الحياة ,,, فلا بد ان يستجيب القدر) يعني اذا حللنا حتشي ابو الكاسم الشابي , بنلاكي فية ان الكرار للشعب نفسة ومش للاحزاب السياسة والتتظيمات والكوى الوطنية والاسلامية, هذا الحتشي اتشثير اتشبيير , والدليل كدامنا انة شب واحد من اولاد ابو الكاسم الشابي اسمة محمد بو العزيزي كدر انة يعمل عمل فشلت كل احزابنا وتنظيماتنا في الوطن العربي مجتمعة مع بعظها البعظ انها تعملة , هو ما كعد ستين سنة يحاول ينظم الناس ويكنعها انها بحاجة للانتفاظ والتغيير ولا عمل احزاب وتنظيمات وبعد ما وصلو للسلطة طلعو حرامية ونصابين وزيهم زي اللي قبلهم وبس ظيعو عذابات شبابنا واهلنا دجل وتشذب . هذا البطل اللي من المفروظ انة ينعمل لة تمثال في تشل مطرح في الوطن العربي ومن المفروض ينكتب عنة مجلدات في علم الثورات , لانة هاذي الحالة الاولى اللي بتصير في التاريخ الجديد ولازم يصير تدريسها في المدارس والجامعات ويصيروا الناس يتخرفو فيها ,لانهم في فلسفة الثوارت بكو يكلولنا ان الثوره محتاجة ظروف موظوعية وظروف ذاتية مشان تستوي الطبخة وبعدين تطلع النتيجة في الانتصار . بس انا اللي شايفة انها وصفة محمد بو العزيزي لحالها وفرت علينا شغلات اتشيرة احنا مش محتاجينها , مش محتاجين احزاب وتنيظمات تشذابة ولا محتاجين انظيع اسنين عمرنا ورا احزاب في الاخر تطلع مثلها مثل اللي قبلها , وعلى زمانها انصير انقول ساك الله على ايام زمان , ولا محتاجين انجيب محتل اجنبي يقتل نص شعبنا وينهب ابلادنا مشان يكيم حاكم ظالم راتشب علينا ومسوينا مزرعة للي خلفوة يلعب فينا شمال يمين واحنا ما في عنا غير الحسرة والالم على حالنا واحوالنا ,انا اللي بكولة انة الوكت هاظا وقت الثورة على واكع وطى روسنا وجابنا في الارظ , واكع خلانا ملطشة للي بسوى ومبسواش من امم اللم ,ومبروتش لشعبنا العربي اللي خلصنا من ظالم واحد , بس ظايل عنا واحد وعشرين ظالم , يعني المشوار لسة طويل وبده شغل وشده حيل , بالتشي صرنا زي باكي شعوب العالم واطلعنا درجة لفوك عشان انصير بني ادمين وانبطل انصير عبيد .ويصيروا الناس يطعاطفو معنا مش يحتكرونا ويكولو اللي من ايدة اللة يزيده.


وزراه الصحة صحتها متدهوره
6 يناير 2011, frankoameer @ 11:50 م
18 views

بعد اللي شفناه في البرازيل لما اعترفت فينا دولة البرازيل مثلنا مثل باكي دول العالم , وصار النا سفاره والحمدلله على هالنعمة , كعدت احلل تحليل عميك ليش البرازيل هي اول دولة في العالم بتعترف فينا كدولة , لكيت الجواب على سؤالي بسيط اتشير , لانة بتشل بساطة في بينا عامل مشترك احنا والبرازيل , البرازيل طول عمرها لما بتشترك في كاس العالم بتخسر في اغلب الاوقات مع ان لاعبينها احسن واغلى لعيبة في العالم , لكن وين المشكلة ؟ المشكلة في البرازيلية انهم عندهم ظعف تاريخي في حراسة المرمى , ومش كادرين ايحلو هالمشكلة, احنا زيهم بس مش حراسة المرمى احنا مشكلتنا التاريخية في كيادتنا السياسة , وهذا هو العامل المشترك بينا وبين البرازيلية , يعني زينا زيهم , عشان هيذا بادروا هم وكدروا هالنكطة هاذي واعترفو فينا اول ناس , هالكيت بنطلي واحد بكلي وين الظعف التاريخي يا زلمة , احنا كيادتنا كياده حكيمة , ومنيحة , بكلة طيب روح شوف المستشفيات اللي عنا , فرلك اتشم فره وشوف النظافة اللي عنا , هذيك اليوم صحفي فلسطيني عمل تكرير مصور عن مستشفى في الخليل , وسوا لكاء مع مدير المستشفى , والا المدير بكول في تشل وقاحة وكلة حيا , وبعلي صوتة , احنا النظافة عنا اهم شي والمواصفات اللي عنا للنظافة هي مواصفات عالمية وانا عندي ثمانين شغيل , منهم خمسين بس للنظافة , لان النظافة يا عمي اشي مهم عنا وصحة المواطن فوك تشل اشي. بيني وبينتشم انا افرحت وانبسطت وجعصت على الكنباية , وكلت هاي الحتشي المزبوط , على الطرشاك انا صاير عنا تكدم , والله يا جماعة بعد ما خلص المدير المعط على التلفزيون , الا هالمنحوس المصور اللي عامل التكرير بيطلع من غرفة المدير وبصير يلف جوا المستشفى , اخلع, الا الناس المراجعين فوك بعظهم , ولا تكول ناس هاجمة على جمعية توزيع اطحين , اخبط الا المراسل بدخل غرفة الولاده وبصور في كل غرفة ثلاث نسوان , وشو النظافة اللهم لا حسد الزبالة على الارض وبقع دم على الارض , والصراصير , يا حبيبي احتشي ولا حرج , الصراصير عاملة فرقة مشاه عسكرية ابتجول جوا المستشفى وبتكزدر , يعني مش ناقصها غير اتحط سجاير في ثمها وهي ماشية , يعني كد ما احتشي مش راح اكدر اوصف الوضع في المستشفى من تشثر القرف , والمدير التشذاب بقلك عنا معايير دولية للنظافة. طبعا هذا مش بس في المستشفى في الخليل , المستشفيات تشلها هيذا والسبب البسيط لهاظا التسيب هو كلة المراكبة , طبعا هذا تشلة اكدوه الناس اللي اتصلو على البرنامج الا مرة واحده مش عارف هي الغيرل فرند تبعة وزير الصحة والا مرتة , شو بتكول , بتكول هو انتو بتشم يعني الوزير هو يروح ينظف المستشفيات؟ هذا شغل الناس اللي في المستشفى .
لع يا ستي بدناش الوزير لا اينظف ولا يتعالج في مستشفياتنا لانة عيب ويازك انة وزير الصحة يتعالج في مستشفى تابع لوزارتة , لانه اكيد المستشفى مش كد المكام , لازم الوزير يروح يتعالج في مستشفيات اوروبا وامريكا , هناك المستشفيات انظف اكيد , بس اللي بدنا اياة ان الوزير يعين مراكبين يراكبو المستشفيات ولو سمح معالية يعني لو فظي اشوية يمرك من تلى المستشفى يشوف شو بصير في هالمستشفى , بلتشي المسخمين المواطنين سركو هالمستشفى وعملو انكلاب على الوزاره , وبالتشي ما ظلش مستشفى من اساسة , لان في ظل هيذا كياده سياسة مش غريب اذا اتهرب المستشفى على احدى المناطك الثانية , لان في نفس التكرير شوفنا حجر اساس كاعد لحالة من سنتين , من على زمن رئيس الوزراء هذا اللي مش عارف اسمة , بكول التكرير انة حط حجر الاساس ولليوم بعد سنتن ظل الحجر لحالة والمستشفى ما انبناش , طيب يعني هو اللي بحط حجر في مطرح مش لازم يسال بعد سنة سنتين شو صار في هالحجر ؟ وين وصلنا يا ناس في هالحجر تشبر ولا لسة لحالة؟بس شكلة هاظا رئيس الوزرا حاطط حجر في سندوك السيارة وتشل ما اجى على بالة بروح بوخذ معاه اتشم صحيج واتشم كامرة تلفزيون بصور حجر الاساس وبعد ما يخلص برجعة معاة في سندوك السياره. انا امي في زمناتها كالت لي اللي بحظر شاتة بجيب توم , واللي ما بحظرها يوم تولد بنسرق منة سخل وما بظللة غير سخل ,عشان هيذا انا اللي بشوفة ان هالكياده السياسية راح اتظلها هي سبب فشلنا التاريخي وما اظني انا رايحين نشوف تغيير عن كريب , اذا ما طارت هالروس هاي اللي عاملة حالها وزرا ومديرين وما في عندهم هم غير اسم الوظيفة وراتبها اخر الشهر , وعلى هالرشة بجوز احنا نوخذ كاس العالم في كرة الكدم والبرازيل هي اللي تكود العالم .


اجاك يا بلوط مين يعرفك
2 يناير 2011, frankoameer @ 9:19 م
47 views

هاظا هذيك السنة لما اتغير اسلوب المكاومة الفلسطينية للغولة , واتغير التكتيك من تشثر ما سوت وعملت فينا من كتل ومجازر , لانها عندها امكانيات بارزه وخلفية ثكافية احنا مش كادرين عليها , طلع من عنا بطل اللة يرحمة ويرظى علية , اخترع اسلوب التفجير الاستشهادي , هاظاالاسلوب الكايم على ان الاستشهادي يحمل هالكنبلة على جسمة ويمشي فيها لوين يبكو اولاد الغولة كاعدين , يكوم الاستشهادي يفجر حالة فيهم ويكتل كد ما يكدر من اولاد الغولة , وكدام هاظا الاسلوب صارت الغولة في خطر , وصاروا اولادها يهربو برا فلسطين , واكتصاد الغولة بلش ينهار , وبدل ما تكون الهجرة على فلسطين من اولاد الغولة, صارت الهجره معاكسة لبرة فلسطين , صارت الغولة اطورش شمال يمين وصارت زي الجاجة المظروبة على راسها , صارت اتخطط وتدرس تشل الخطط مشان تقظي على هاظا الاسلوب , لان هاظا الاسلوب قرب يقظي عليها وعلى دولتها , وكد ما ما عملت من مجازر وكتل وحبس للناس ما كدرت الغولة اتوكف هاظا الاسلوب , لانة وكف هاظا الاسلوب مستحيل , مين يا عمي بدة يكدر يوكف واحد بدة يكتل حالة ؟ ما في حدا بكدر .
كعدت االغولة هي واولادها يفتشرو ا تشيف بدهم يوكفوا هاذا الاسلوب . بعد ما ولعت سيجارة وفتشرت, فتشرت, لكت انة احسن اشي لتوكيف هاظا الاسلوب هو انها اتخلي اللي استعملوا هاظا الاسلوب هم بنفسهم يدينوا هاظا الاسلوب ويحاربو حالهم فية . تشيف ؟ انا بكلتشم تشيف , اول اشي فتشرت فية الغولة انها تسوي تنظيمات اسلامية تشذابة بأسم الاسلام يكون المسؤول الاول عن هاظا التنظيم هو من اولادها , ويصير هاظا المسؤول اينظم اولاد المسلمين الهبايل ويكنعهم انهم بعملو هاظا الاشي من شان الله والاسلام , وانة محاربة التشفر الموجود في البلاد العربية والاسلامية بأسم الله والدين واجب ديني وهاظا الحتشي بوديك على الجنة , وهناك في الجنة بتسلخ سبعين حورية اذا فجرت حالك بين التشفرة اللي مش كايمين في تطبيق شرع الاسلام في دولهم , ومش مهم مين تكتل مسلم مسيحي ابن شعبك والا ابن شعب ثاني , المهم تكبس هالزر واتفجر حالك وكد ما يموت يموت من اولاد اصغار و ناس اتشبار ونسوان , المهم تكتل ,وطبعا الشغلة سهلة جدا ما ما بدها غير لحية طويلة ودشداشة وشبشب زنوبا وتحفظ اتشم سوره قرأن واتشم حديث نبوي شريف , عده الشغل.
نجحت الغولة في هالشغل هاظا وكدرت تنظم ناس تشار من اهل الدار , حتى انها وصلت الهند والسند صارت تودي ناس يفجروا حالهم في بيوت ربنا, تشان مساجد والا كنايس , وصار الكتل تشل يوم , بعد هاظا الي صار ,صاروا الناس يكولوا يا عمي هذا اسلوب حرام واجرام وهاظا ارهاب , حتى صرنا احنا نفسنا لما واحد منا عن جد يروح يفجر حالة في الغولة واولادها , صرنا نشفك عليها وعلى اولادها وصرنا اندين هاظ الشغل ونقول عنة ارهاب وكلة حيا وعيب علينا نسوي هاظ الاشي , حتى ان الغولة واولادها صاروا يطلعو على الفظائيات وتشل وسائل الاعلام ويقولو يا عمي احنا فشي عنا صراع في الشرك الاوسط مع الفلسطينية , الصراع الموجود بين الشيعة والسنة , وبين المسيحية والمسلمين , والدليل هية كدامتشم, كاعدين بفجروا في بعظهم , يوم بفجروا مسجد للسنة بأسم الشيعة , ويوم بفجروا مسجد للشيعة بأسم السنة , ويوم بفجروا اتشنيسة للمسيحية باسم المسلمين , هاظا اللي صار عنا والغولة كاعدة ومبسوطة علينا وبتوتشل بزر واكظامة وبتكول يا اسناني امظين امظين على حسن واخوة حسين , بدها توتشلنا تشلنا واحنا اللي صرنا تشلنا زي الجاجة المظروبة على راسها ودايخة مش داريين شو انسوي , خلتنا الغولة انشك في دينا وفي وطنيتنا وهي كاعدة مبسوطة بتتفرج علينا . واحنا ما عنا اشي غير انا اندك في بعظنا.وبعدها بجيك اتشم معتوة فاشلين في حياتهم ومش ملاقين شغل , بصيروا يحلفو ايمان ان هاظا الشغل جهاد في سبيل الله والدين وانة اللي سوه امجاهدين .


« المواضيع السابقة    المواضيع اللاحقة »