ان عشت فعش حرا

تعالي نطلع على راس الجبل,

 نقعد تحت خروبة الراس ,

 كتفي على كتفك وراسي على راسك,

 نسمع صوت البلد ,

جاي من قاع الواد.

ام بتنادي على اولادها ,

 وضجة الاولاد ولعبهم .

انا وانت فوق الجبل ,

 تحت خروبة الراس , والهوى لحفتنا, والارض فرشتنا .

انا وانتي نحكي عن الحب وعن فلسطين ,

 في لحظه هدوء, صوت الورق و والاغصان تتمايل  ,

 بتحلى قعدتنا .

انا وانتي كتفي على كتفك ,

 وراسي على راسك .

 لما نسمع صوت اذان الجامع للعشى ,

 والناس اتبلش اتلملم بعضها .

وعتمه الليل سادت ومحبتي الك زادت.

ننزل عن الجبل ,

 نمشي على الهدى .

من طريق حركه العراك ,نشبك ايدينا وندوس على الاشواك.

والكهربا مقطوعة في البلد ونورك ينور الطريق.

 لما نوصل عين الدرج, تنزلي تشربي وتسقيني من العين .

 .نقعد على حفه الدرج نتنسم من الهوى وايدي  بايدك وانا حاسس في الدفا والعفى .

وسط الهدوء والانسجام فجأة نسمع صوت ارصاص , نجري حتى نوصل اسطيح .

 وهناك انشوف الشباب بضربو احجار على الجيش , نشارك مع الشباب نضرب احجار ,والصوت يعلى ويعلى , نجري بين الزيتون واحنا ابنضحك على الجيش اللي بطوخوا في الهوى.

بنوصل على الدار سوى, ابنعمل عشى ملوكي ,(نواشف ) ابنقلي بيتنجان وبطاطا وبيض بلدي , زعتر وشا ي,وجبنه ولبن مع زيت , نتعشى سوى, اطعمك في ايدي وتطعميني في ايدك .

 الفرح هالل حوالينا.

 بعدين اتجيبي بزر ونتسلى على التلفزيون , وشويه شويه النعاس بيتسلل علينا , اتحطي راسك على صدري والاعب شعراتك وتغفي على صدري وانا طاير فوق فوق متخيل حالي عايش في الجنه .   

* حركه العراك منطقه في الجبل في قريه دورا القرع   

*اسطيح منطقه في القريه

* عين الدرج عين ماء في القريه