• محرك بحث جوجل

  • مربعات القائمة الجانبية

      أضف ماتريد من مربعات القائمة الجانبية لتظهر هنا من خلال الذهاب الى قوالب - مربعات القائمة الجانبية اسحبهم الى القائمة الثانية
حتشي فلاحين للحفاظ على لهجة الفلاحين في عالم يحاول التمدن
صحيح اللي استحو ماتو
25 ديسمبر 2010, frankoameer @ 3:14 ص
49 views

كبل اسبوع اسبوعين بكينا كاتلين حالنا على صلاه الاستسقاء , ونشف حلكنا واحنا بنترجى في رب العالمين يمطر علينا اشوية مطر نسكي هالزريعات , ونعبي ابيار المية اللي نشفت من كلة المطر , طيب ربنا انعم علينا ونزل علينا المطر والمطر بيجي معاه برد وريح كوية , بس اللي ما حسبنا احسابة ان هالمطر وهالريح تهد على اهلنا المسخمطين في غزه اللي انهدت دورهم من الكنابل اللي رموها اليهود عليهم في حرب غزه الخيام اللي كاعدين فيها , اخبط واخلع ما نزلت اشوية مطر واشوية برد الا الخيام طايره والناس المسخمطين صاروا ربي كما خلكتني , لا خيمة تستر ولا صوبة اتدفي , واحنا كاعدين نتفرج ونوتشل طكش وبزر ونتفرج على التلفزيون , ونلعب طرنيب وهاند , وتركس ,كأن اللي بصير مش لهلنا وناسنا , وحكوماتنا بتفرجو زيهم زي الجمهور في ملعب مباراه بين برشلونة وريال مدريد , اي الله يحرك حريشتشم , شو كاعدين بتسوا ؟ انا مش فاهم , واحد بكلك حكومة مكاومة والثاني بكلك حكومة شرعية , طيب كرد اللي يسلختشم النحتين , ما تشوفو الناس اللي اتبهدلت والناس اللي احترك حريشها في هالزوبعة , والا مستنين الفارط بان كيمون اللي على بنطلونة ما بيمون تبع الامم المتحده يجي ويبني دور للناس اللي بتنام في المطر , وبتستنو في امة اللمم تجي وتشفك على النسوان والاولاد اللي بنامو في المطر , والله هالحال ما هو حال يا خال , بدها همة وشده حيل وما بدهاش كلة حيل وتستنو الناس تشفك على ناسنا واهلنا , والمشكلة اصلا حلها بسيط ومش معكد , تشلها تلفون يسلخة الرئيس الله ايطول عمره على رئيس الوزرا المكال في غزه ويحتشي معاه عن كظية اعمار غزه ويخلصونا من هالشغلة , لان الناس كرفت من هالشغل اللي بطعمش خبز , ودشرونا من خلافات الفصايل اللي جباتلنا البهدلة وخلتنا عيره في العالم تشلة , اي على الجيره من الجرجيره انها مصاريف فصيل من هالفصايل في احتفالات انطلاكتهم بتشفي تبني مية دار للناس المسخمة ومش لاقية مطرح تكعد فية في هالمطر . على سيلة الفصايل , باللة شو اللي سوتو لشعبنا من يوم ما انطلكتو تشلتشم؟,
حررتو الوطن والا هزمتو اليهود ؟ اللي حرر المحرر هو دم اولاد الناس المسخمة , واللي كاتل في صفوف الثوره تشلها هم اولاد الناس المسخمين , مش تبعين البدلات المطكمين , اللي لما اتشوفهم بتفتشرهم حاكمين العالم , انا بكلتشم بدهاش كلة حيل وديرو بالتشم على الناس لانة هاي الناس امبتشره راح تشلح من اجريها وتعرفو وين راح ترمي كنادرها , فخليتشم صاحيين وحذرين لان الكاعد على الخازوك بسب السلطان , وبدل ما تصرفو المصاري على الانطلاكات استغلو هاذي المصاري واصرفوها على الناس المسخمة احسن التشم ولشعبتشم .

Be Sociable, Share!


أضف تعليق


*
To prove you're a person (not a spam script), type the security word shown in the picture.
Anti-Spam Image

Powered by WP Hashcash