سماعات الجامع مش لكليلين الحيل
31 viewsكلة الحيل صارت اشي اصيل عنا في البلد , حتى انها وصلت للجوامع , مشان هيذا كام وزير الاوقاف طويل العمر باصدار تعليمات بتوحيد الوذان في الجوامع في الضفة الغربية ومنع استعمال سماعات الجوامع الا للوذان . واللي بخرك هذا القانون راح الوزاره تحرك اللي نفظة , وفي كرار الوزير ان هاي السماعات في الجوامع مش ملك للي خلفوتشم عشان تنادو فيها على الناس وتعلنو مين مات ومين طاب ومين حبلت ومين ولدت , ومش عشان تنادو على الناس لما المسطوطنين يدخلو بلدتشم يحرقوالزتونات والا يحرقو الحاتشوره , هاي السماعات يا عمي بس عشان الموذن يوذن فيها وقت الصلاه , ومش مهم اذا الموذن هذا نايم على التخت والا على المصطبة وهو بوذن , وبعدين هسة عن جد مين احسن يكون في موذن واحد لكل البلاد والا يكون في عنا الف موذن وكل واحد منهم بوذن على خاطره وزي ما بده ؟
اذا بدتشم تحتجو وتقولو طيب تشيف بدنا نكول للناس مثلا ان فلان من الناس مات وعشان يحظروا الدفنة وتشيف بدنا نكول للناس ان فلانة حبلت وفلانة ولدت؟ هاذي بسيطة ولا في ابسط منها روحو على الفيس بوك وافتحو حساب ما هو ببلاش وما في دفع مصاري وهناك بتصيروتكتبو على الفيس بوك تشل اشي بدتشم اياه ! واذا مش عاجبتشم الفيوس بوك استعملو الماسنجر واستعملو الياهو والا اكولتشم استعملو المسج على التلفون والا لشو يبا عملت التشم الحكومة شركة اتصالات وتلفونات وجوالات , والا كلة الحيل خلتشم حتى ما تعبو دكايك على التلفون ؟اي ياللة عاد اتنشطو واكتبو تشل شي على الحيط تبع الفيس بوك وهناك ما حدا بمسح لا في دهان ولا شيد .
