السلطة تريد اسقاط الشعب13 فبراير 2011, frankoameer @ 10:43 م 27 views
وكع فرعون عن عرشة , الله لا يكيمة ولا يردة , وكع في الكندرة والايام جاية اذا بالة ينفد في المصاري اللي لطشهن هو واولادة , لانة لو نفد من المحاكم مش رايح ينفد من دعواي اثنين وثمانين مليون ثم مصري بدعوا علية ليل انهار , وبعد ما وكع فرعون , طبعا هذا الوكوع راح أيأثر علينا احنا الفلسطينية ,لانة فرعون في الة شلة اذناب عنا وبعيشوا بينا , وبلشوا ايرجو وينتفظو وصابهم اسهال , خوف من الشعب يكوم علهيم ويمسح فيهم الارض , صاروا زي الجاجة المظروبة على راسها مش داريين شو يسوا , وبلشوا يكولوا النا ان الشعب بدة ينهي الانكسام , وهمة شباب وحريصين على ان الشعب ينهي الانكسام , مع انهم همه اللي عملو الانكسام وهمه اللي سركوا الشعب وبهدولوا الشعب وجابولنا العار في تشل العالم واخزونا كدام تشل الناس , وهمه نفسهم اللي داسوا على دم الشهدا وعذابات الاسرى وخلونا ملطشة للي بسوا والي بسواش ,وهمه اول من فتح مراكز تحكيك واعتكالات لشبابنا , هذول همه اللي اليوم بدهم يكودوا الشعب مشان ينهي الانكسام .
كبل اتشم شهر لما تلفزيون الجزيرة كشف الوثايك الفلسطينية , طلع علينا واحد من حبايب فرعون اللي بكى مسمي حالة اتشبير الدجالين , وصار يعص على حالة ويسب اشمال يمين وحنبط وجهة من تشر ما عص على حالة وهو يتهم الجزيرة والشيخة موزة انهم همة اللي زيفو الوثايك وهاذي الوثايك مش مزبوطة , وكال اذا ثبت انها الوثايك انسرقت منة هو راح يستكيل , وهدد انة راح يرفع كظية على الجزيرة وعلى مديرها ويحبسة ,بس الظاهر انة ما لاقاش الونش اللي يرفع فية الكظية عشان هيذا راح وهو مكدم استقالتة , وكأنا احنا كلكنين في اللي سرك الوثايك والا مين اللي سربها من مكتب الاستاذا, حتى في هذي الشغلة بدة يستهبلنا , احنا يا عمي كلكنين في الي جوا الوثايك , مش كلكنين في اشويه ورك , كلكنين على التنسيك الامنيى والتبادل في المعلومات مع اولاد الغولة وكلكنين على المساومات على وطنا وبلدنا , والحرب الضروس على تشل أشي اله علاكة في المقاومة ضد الغولة . واليوم طالعين في فلم اجديد اسمة ثورة الكرامة , على مين ثورة الكرامة هاذي بالله ؟ على اللي حارب الغولة وحرر غزة من بين أسنانها؟ للهدرجة كله الحيا وصلت! ثورة الكرامة على اللي اختارهم الشعب ! يعني مش ظايل عليشتم الا اتقولو السلطة بدها تسقط الشعب , وانا بكلتشم الشعب اللي اختار مش راح يشارك الا في شغله وحدة هي اسقاط نهج استهبال الشعب , ونهج اذلال الناس , ونهج السرقة والعربدة , ونهج شقلبة الحكيكة الي صارت موديل ,والوقت لسه موجود عشان اتصحصحوا وتصحوا من غيبوبة طالت وختيرت , اليوم احنا بدنا احزاب وكوى شبابية , لان أحزابنا تشلها ختيرت وشاخت وخرفنت وصارت مصابة في مرض أسمة الزهايمر.
الشعب بوكف مع رئيس بفهم هم شعبة ومعاناة شعبة , مش رئيس بودي حزمة ورد لوحدة يهودية بتولد في مستشفى في رام الله , وبغمض عينة عن فلسطينية بتموت وهي بتولد في مستشفى في نابلس , الشعب بوقف مع رئيس بقول انا اهم اشي عندي كرامة شعبي ودم شعبي وقضايا وطني وشعبي , مش رئيس بقول انا بصاطير الاحتلال على راسي, ومبسوط على حالة , الشعب بوقف مع رئيس ببوس بصاطير جرحى ومعتقلين شعبة , مش رئيس ببوس شلاطيف اللي بقتل شعبة ليل انهار , هان بدنا ثورة كرامة مشان ننهي الانقسام ونرجع شعب يحترمنا تشل الناس في تشل العالم , لان مستحيل ثم مستحيل يكون في وحدة بين فدائي بكدم دمه وروحة للوطن وبين معطي معلومات للغولة وأولادها .
أضف تعليق
