|
|
بكولك بعد وثيقة حماس طلعت فتح تكول حماس صارت زي فتح, وانا بكول الهم لع.
شفت جيبات الشرطة بغزة ماشية عالحدود مع جيبات اليهود? لع
شفت واحد من قيادة حماس قاعد مع نتنياهو أو مسئول صهيوني?… برظو لع.
طيب شفت شباب القسام سلموا سلاحهم وتركوا أنفاقهم وبحرهم وأخذوا عفو من العدو? … برظو لع….
طيب شفت خالد مشعل قاعد كدام المجلس الوطني اوالتشريعي وبيسأل النواب موافك ع تعديل الميثاق ويعترف في اسرائيل وانة في نواب رفعوا ايديهم الثنتين موافقين؟ اكيد لع
طيب شفت كتائب القسام مكسمين دتشاتشين وتشل حاره كياده وطخيخة جنازات واعراس؟ لع والله ما شفت
طيب عمرك اسمعت مشعل بيقول انا عايش تحت بساطير الاحتلال الاسرائيلي؟ لع
طيب عمرك اسمعت هنية بيقول صفد راحت وما بدي ارجع عليها والكدس الشرقية عاصمتنا؟ لع
في عند حماس سفير والا ناطق رسمي في اروربا وغيرها بكى ملطة للاولاد في الحاره وهو صغير؟ لع مستحيل
طيب عمرك شفت كياده حماس بتصلي في الجامع لحالهم وشيخ بخطب فيهم اصلة حرامي ؟ لع والله ماشفت
طيب حماس اعترفت في اسرائيل؟ لع ما اعترفت
طيب اسمعت انها حماس بطلت تقول فلسطين من البحر للنهر وبالعكس؟لع ما كالت
طيب اسمعت انهم موافكين على حل الدولتين؟ لع
طيب اسمعتهم بدهم يعترفوا في يهودية الدولة؟ لع
طيب اسمعتهم تخلو عن الاسرى؟ لع
طيب عمرك اسمعت انها حماس قطعت مصاري عن معتقليها والا ابناء الشهداء,
عمرك شفت حماس بتحكي عن قيادتها خرفنت وتبعين اولاد؟ اكيد لع
عمرك اسمعت انها حماس تنكرت لقيادات اسستها ومش معترفة فيهم ؟ طبعا لع
عمرك اسمعت واحد من حماس بكول شو بدنا في الكدس؟ لع والله ما شفت
طيب ما دام كله لع لع لع على اي اساس بتساوي حماس في فتح؟
هذا في الزمانات بكى في اخوه اثنين فكرين وحالتهم المادية صعبة, وكان عندهم احمار مسمينة ابو صابر بشتغلوا علية بناكلو علية ابظاعة للناس مكابل اجره, ويوم كانوا ماشيين في منطكة ابعيده عن الناس والحمار ماشي وحملة اثكيل, وكع الحمار ومات. وراح مصدر رزكهم الوحيد. كعدوا وصاروا يلطموا على حظهم وعلى حالهم ودفنوا الحمار مكان ما وكع ومات. وصاروا يعيطوا على كبره. هم كاعدين بعيطوا صاروا الناس يمركوا عليهم يشفكوا عليهم ويعطوهم مصاري والناس مش عارفين شو الكصة. صاروا الاخوه الاثنين يلموا تشل يوم كد ما كان يطلع الهم ابو صابر واتشثر على عشر مرات من تبرعات الناس. المهم لما صار معهم الشغل احسن راحوا بنوا مكام تشبير على كبر ابو صابر. وصار المكام مزار لتشل الناس اللي بدها تحبل تيجي تستدعي عند ابو صابر واللي مريضة واللي مريض يجي يستدعي على كبر ابو صابر ويدفعوا مصاري لروح ابو صابر والاخوه صاروا من اصحاب الملاين. بعد فتره من الزمن اتكاتلو الاخوه الاثنين والاخ التشبير اخذ تشل المصاري وما رضي يعطي اخوه اي شي منهن. الاخ الصغير كلة والله اذا ما بتعطيني النص غير اروح المكام تبع ابو صابر وادعي عليك دعوه اخسرك كل مصاريك واشلك. الاخو التشبير كلة روح ادعي زي ما بدك ما( احنا دافنينة سوا).
وهذا حالنا احنا العرب عاملين الفيس بوك مكام ومسجد نستدعي فية وننشر دعاوي وايات قران بنستنى ربنا يستجيب لدعاوينا على الفيس بوك. دشرنا الجوامع واماكن العباده وجاين ننشرها على الفيس بوك . وشو كال اذا ما بتنشرها وما بتعمل لايك ربنا راح يستشرها في اوجوهنا وحياتنا تتحول لنكد وحسره. اي بلاش كلة حيا وتخريب وتحريف للدين, والفيس بوك انوجد مشان الناس تتواصل مع بعض وتتعلم وتعلم مش مشان الانحراف والتحريف وفي المكابل مش كعبة ولا جامع.
هذا كان في كديم الزمان هالام وابنها عمره 17سنة والمره ارملة ما الها غير هالولد وما في عندهم دخل يعيشوا منة. كان في عندهم بطة وفي يوم من الايام احتاجو مصاري, كالت الام لابنها روح يمة بيع هالبطة, لف على الدور واسال الناس بالتشي حدا شرا هالبطة منك. راح الشب يلف على هالدور ويسالهم تشتروا هالبطة وما حدا كبل يشتري البطة من الولد ولما زهك حالة مرك على هالدار , دك على الباب, فتحت صبية عمرها في العشرينات شافت الولد كالت لة تعال اعبرعلى البيت . سالها تشتري البطة ؟ كالت لة انت بس اعبر وبعدين بنتفاهم, دخل الشب على البيت والصبية اخذتة على المطبخ, وصارت تحاول معاه انها تغرية وكربت تبوسة. الا الباب بدك , لما سمعت دك الباب كالت لة ييييييي هذا جوزي روح اتخبى في الخزانة . دخل الشب في الخزانة والدنيا عتمة وظل واكف ميت من الخوف. وهو واكف في الخزانة سمع صوت بوس وغنج في المطبخ وفجأه صوت بصرخ ييييي اجى جوزي روح اتخبى في الخزانة . وفجاه فتح باب الخزانة ودخل شخص وكف جنب الشب . وسكر الباب , والباب مسكر الشب بدك في اللي جنبة بكلة : تشتري البطة ؟ اللي واكف جنبة كلة ولك اسكت تفضحناش اسكت. الشب رجع دكة تشتري البطة ؟ كلة اه بشتريها بس اسكت كديش بدك فيها؟
كلة هات عشر ليرات . كلة خذ هي عشر ليرات. بعد اشوي الشب رجع دك اللي جنبة كلة تبيع البطة ؟ كلة ولك اسكت تفضحناش, الشب كلة تبيع البطة ؟ كله اه ببيع , كلة خذ هي ليرتين فيها وشراها . بعد اشوي رجع دكة تشتري البطة؟ كله ولك اسكت تفضحناش . كلة بكلك تشتري البطة؟ كلة اه بشتريها كديش بدك فيها؟ كلة عشر ليرات . رجع باعها بعشر ليرات . بعد شوي رجع دكة تبيع البطة؟ كلة ولك اسكت راح تفضحنا , كلة تبيع البطة ؟ كلة اه ببيع كلة هي ليرتين . المهم اتبيع البطة , تشتري البطة ظل ايبيع فية البطة ويرجع يشتريها حتى حوش منها مية ليره .
بعد اشوية راح الصوت من المطبخ اللي جنبة فتح الباب وهرب والشب ظل معاه مية ليره والبطة , وبعد شوي طلع من الخزانة وظل مروح على الدار. اعطى المية ليره لامة والبطة ظلت عندهم .
بعد اسبوع ويوم الجمعة الام كالت لابنها يمة روح اليوم على الجامع وكف باب الجامع بالتشي حدا شرا منك البطة. المهم الشب راح وكف باب الجامع والناس طالعين من صلاه الجمعة يعرض عليهم يشتروا البطة والناس يهزوا روسهم ما بدهم يشتروا البطة. اخر واحد طلع شيخ الجامع. الا الشب راح يجري علية سيدي الشيخ تشتري البطة ؟ كلة شيخ الجامع ولك يا حريك الوالدين انت لاحكني لهان ؟ . وهاذي كصه الشيخ الكردضاوي اللي بتاجر في الكظية الفلسطينية وببيع الناس فتاوي في الدين والوطنية وفي نفس الوكت بيفتي وبيترجى امريكا انها تهاجم بلد عربي ومسلم وتكتل المسلمين , وبفتي في كتل العلماء المسلمين .
بعد الحرب اللي سوتها الغولة على غزه وكتلها للبطل احمد الجعبري نائب الكايد في كتائب عزالدين الكسام , ردت كتائب الكسام ومعها تشل فصائل المكاومة على الغولة وخزكت عينها. الغولة سمت الحرب على غزه عمود السحاب بس طلع هالعامود اسمة خزوك بسحاب وكعد على هالخازوك ابن الغولة النتن ياهوا وباراك اللي خزي على حالة واستكال واعتزل الحياه السياسية من هالخازوك. طبعا الحرب زي ما انتو تشلتشم عارفين وكفت بشروط المكاومة الفلسطينية لان ميزان الكوه على الارض اجبر الغولة واولادها على انهم يكبلوا وكف اطلاك النار من تشثر ما طاح عليهم صورايخ من تشل الاشكال والانواع واثبتت هالصورايخ انها مش صورايخ عبثية ولا صواريخ عابره للبيارات زي ما حاولت الغولة واذنابها يكنعوا الفلسطينية مشان يرسخوا انة ما في فايده من المكاومة مشان الغولة تمشي مخططها في فلسطين, تهجر شعبها وتبني مستطوطنات في تشل فلسطين. تشل هذا وهي بتستغل في السلام المزعوم والي اتبناه كسم من القياده الفلسطينية. هذا السلام اللي قلعطونا فية ومن يوم ما وافكنا علية ما شفنا يوم حلو. من اول ما اكبلنا فية والغولة تمارس الكتل ضد شعبنا والمستطوطنات تتمدد في ارضنا من رخاوتنا ولأنا تخلينا عن المكاومة وانشغلنا في امكاتلة بعضنا البعض بدل ما انكاتل الغولة واولادها وهذا اللي خلى الغولة تستفرد في شعبنا وتعمل اللي بدها اياه فينا. بعد الانتصار اللي حككناه في غزه, غزه اللي ركعت الغولة وخلتها تطلب وقف اطلاك النار من العين الحمرا اللي شافتها من غزه, غزه العزه اللي رجعت النا كرامتنا اللي ظاعت في ردحات هيئات اللمم اللي مش متحده غير على اتشل احكوك الفلسطينية ودعم الغولة في اللي بتسوية في الشعب الفلسطيني من كهر وتعذيب وكتل تشل يوم.
طبعا على الخط الثاني ما تفتشروا انها الغولة واولادها رايحين يستسلموا ويسلموا ان اللي صار في غزه انتصار لانها الغولة راح تسخر تشل امكانياتها عشان تثبت انها ما انهزمت واول شغلة راح تعملها راح تدفع في اعلامها والكتاب المؤجورين مشان يتفهوا هذا الانتصار وتشغل طابورها الخامس مشان ينشر دعايات في الشارع الفلسطيني انة غزه ما انتصرت وان الحال ما اتغير في غزه. بس الحكايك على الارض بتثبت انة الانتصار واضح وثابت وما في مجال للتشكيك فية. اول شغلة بتثبت هالحتشي انها الغولة اول مره بتستنجد في امريكا وعرابيها ودول اوروبا وبتطلب منها تدخل على الخط مشان وكف اطلاك النار. وثاني شغلة انها الغولة وافكت على وكف اطلاك النار زي ما بدها فصايل المكاومة مش مثل ما هي بدها. والشغلة الثالثة والاهم انها هاي الحرب لمت الجرح الفلسطيني وعملت على توحيد الشارع الفلسطيني بعد اسنين من الانكسام اللي هد حيلنا على مستوى الشارع, واللي نشف ريكنا واحنا نحاول نتوحد. هذا الانتصار رجع النا كرامتنا واثبت للكاصي والداني انة ما في مجال للتعامل مع الغولة واولادها الا المكاومة وان اللي بده يعمل سلام لازم يحظر حالة مشان الحرب وان الزلمة الضعيف ما بيكدر يفاوض وانة ما حدا بكدر يفرض شروطة غير الكوي. تشل هالحتشي بيوخذنا على كصة الدولة المراقبة في هيئة اللمم اللي كاتل حالة عليها الرئيس الفلسطيني ابو مازن, طبعا احنا مع تثبيت فلسطين في كدولة كاملة العضوية مش بس كدولة مراقبة. بس هالحتشي هذا ما راح يمشي الا اذا ابو مازن غير وبدل واعتمد على ميزان الكوه في غزه اللي اثبت فعاليتة وجدارتة , ميزان الكوه هذا بتمثل في كل فصايل المكاومة في غزه من اصغرها لاتشبرها. مع انة يعني مش لازم نفرح اتشثير لمشروع دولة غير كاملة العضوية لانها مش تشير راح تغير في الواكع, انا شخيصا مع توجة ابو مازن بس لسبب بسيط جدا, هذا السبب انة هالشغلة زعلت الغولة واولادها وهم معارضين الها , وكشفت تشذب اميركا واصحابها في الشرك الاوسط, اميركا اللي رئيسها كال وبكول انة هو مع دولة فلسطينية, والسؤال هان! يا دجال على اي اساس انت مع الدولة الفلسطينية تكوم ? وانت بتعارض انها توخذ صفة دولة مراقبة في هيئة اللمم الي انت عامل حالك اتشبيرها؟ احنا عارفين انها مش راح تاثر اتشير على الغولة كبول فلسطين دولة غير كاملة العضوية لان التجربة عنا موجوده وما بجرب المجرب الا اللي عكلة مخرب . عنا دول عربية وعضويتها كاملة في هيئة اللمم مثل سوريا ومصر والاردن ولبنان, هاذي الدول اللي الها حدود مع فلسطين والغولة عملت مستطوطنات في الجولان وعملت في سينا من كبل , وفي مساجين عند الغولة من الارن ومن مصر ومن لبنان ومن سوريا. شو نفعتهم عضويتهم في هيئة اللمم؟ ولا شي كلة اظراط على بلاط (حشى السامعين) لان المساجين ما بطلعوا الا بكسر عين الغولة واولادها وبطلعوا بالعصاه والمستطوطنات ما طلعت من غزه الا بالعصاه وهاي الغولة ما بنفع معها ومع اولادها الا العين الحمرا. عشان هيذا انا بكول وغيري ما بكول انة ابو مازن من هالشغلة لازم يستفيد من كوه المكاومة ويعمل على التوحد مع التشل الفلسطيني ويكون العمل الفلسطيني تشلة عمل موحد باتجاه ان الشعب الفلسطيني يوخذ احكوكة من ثم الغولة ويا عمي ما بدناش اتشر من انا نوخذ حكنا المسروك واللي كسم منة في قرارت دولية صادره بتاكد هذا الحك, مثل حك العوده والتعويض للشعب الفلسطيني لان قرار حك العوده هذا كرار عالمي وتشل العالم موافك علية. هذا هو الحتشي اللي بيمشي علية الترين ( القطار) وغير هالحتشي كلة بيكون اظراط على بلاط.
هذا في الزمانات بكى في شيخ متشيخ على بلد, وفي عنده هالجمل. اهل البلد مساكين على نيتهم يزرعوا ويفلحوا ولما يطلعن الزرعات يجي الجمل يوتشل الزرعات عن بكره ابيهن. الناس صارت تتذمر على هالاشي هذا وصاروا بدهم يسوا ثوره على الشيخ. بس مين البطل اخو اختة بده يسترجي يكود الناس ويطالب بتوكيف جمل الشيخ من الاعتادء على زرع الناس. اهل البلد احتاروا في الحل لهاذي المشكلة العويصة. في, فالبلد هالختيار الحكيم والفهمان.
كَلهم يا جماعة انا عندي الحل, كالوا لة تشيف بدك اتحلها؟
كَلهم بسيطة بنروح انا وانتوا يا اهل البلد على الشيخ, ولما بنصير عند الشيخ انا بكول يا شيخ! انتوا من ورايا بتكولوا الجمل اتشل تشل زرعنا وخرب حياتنا. كالو امنيح اتفكنا. سحب حالة الختيار ومعاة اهل البلد وراحوا على الشيخ. لما وصلوا رحب فيهم الشيخ وكال الهم: يا هلا يا هلا شو في؟ الختيار كال: يا شيخ هالجمل! اتطلع وراه الخنتيار ولا حدا من اهل البلد فتح ثمة. رجع الختيار كال: يا شيخ هالجمل! برظوا ولا حدا من اهل البلد فتح ثمة, نشلهم ناصتين. مره ثالثة الختيار كال يا شيخ هالجمل! برظوا ولا حدا من اهل البلد فتح ثمة وظلوا ناصتين. رجع الختيار كال: يا شيخ هالجمل ؟ الشيخ كال شو مالة الجمل؟ الك ساعة بتكول هالجمل . شو مالة الجمل جننتي فية؟ الختيار كال: يا شيخ الجمل مستشين عايش لحالة. بده وليف عشان يساعده ويسلية حرام ايظل عايش لحالة. وهذا حالنا احنا الشعب العربي اللي ساكت وناصت عن شيوخ التنابل اللي خربوا الوطن العربي ودمورا كل اشي حلو فية.وأولهم شيخ قطر ومن لفة لفيفة.
فكعت مرارتنا واحنا تشل يوم من اربع اسنين او خمسة واحنا بنسمع عن المصالحة بين فتح وحماس, اتشبر فصيلين في الفصائل الفلسطينية. والناس زهكت حالها وهي تكول يا ليلة الله هالخلاف يخلص بين أولاد شعب واحد واللي اصلاُ مش لازم يكون بينهم خلاف اذا الطرفين في عندهم ذرة دم بلا مؤاخذة. واحنا الشعب الكحيان بنكول من اول يوم ما في داعي لهذا الخلاف من اصلة اللي مَزع شعبنا تمزيع وكسمة كبايل وعشاير وهذا اللي الغولة طول عمرها بتخطط عشانة, اجينا احنا وكدمنا هالخلاف هذا على طبك من فظة.
طبعا اسباب الخلاف معروفة لاصغر ولد من شعبنا والشغلة ما بدها فلسفلة وجدل ليش هذا الخلاف صار, المهم احنا في هذا الوكت بحاجة كوية انا ننسى الي مظى ونحترم حالنا وشعبنا ودم شهدانا وجرحانا ونوحد اصفوفنا مشان نعرف انكاوم الغولة واولادها اللي فايعين في الظفة تشل يوم بحركوا جامع وبكطعوا في زتوناتنا والناس واكفة تتفرج مش عجز وخوف لانها الناس كرفانة من اشي اسمة حل سياسي والناس خايفة تكاتل اولاد الغولة تيجي السلطة اتكولهم لع يا عمي ما بصير هذا الحتشي لان احنا بدنا انسوي سلام مع الغولة واولادها , بس طبعا الغولة واولادها مطكعين للسلطة ولسلامها ومش حاسبة احساب لحدا. ساك الله على ايام زمان لما بكينا من سماعات الجامع بس نصرخ صوت ونكول المستطوطنين خشوا على البلد, بكيت اتلاقي الختياره والعجوز كبل الشباب يطلعوا شايلين اللي بيجي تحت ايديهم. حتى مره بتذتشر وحده ختياره بكت شايلة مطرك رمان بدها تشمغ المستوطن على اجرية عشان عبر على البلد. وبكوا المستطوطنين من اول ما يسمعوا حرتشة في البلد يفكسوا ويشردوا من الخوف بس من تشلمة الله واكبر.
اليوم المستطوطنين بخشوا البلد اي بلد وبحركوا الجامع وبكطعوا الزتونات والناس ما بتسوي اشي غير الحسره يا حسره. شو السبب بالتشم؟ انا بكول انة السبب مبين واظح للكريب والبعيد وما بده فلسفة. السبب انا احنا متفركين ومش موحدين على راي واحد, وثاني اشي الناس كرفت من هيمنة مجموعة التشل عارفها على الكرار الفلسطيني وهاي المجموعة مشان تحافظ على راسها بدها خاوة تمنع اي اشي اسمة مكاومة والاهم والاخطر ان احنا ناسطين على هيذا ناس وهيذا وظع. والله يا عمي ما بحتش جلدك الا ظفرك واللي بنام عن حكة ما بطلعلة حك وبصير الحك بدل ما يكون الة بصير علية. انا بكول وغيري ما بكول انة الوظع هاظا لازم يتغير وانة الكياده الفلسطينية لازم تتفك على العودة للناس وتطلك امكانياتها لمكاومة الغولة والاودها وان الكياده السياسة لازم تنسى من مره كصة التفاوض والسلام مع الغولة واولادها لان الظعيف ما بكدر لا يفاوظ ولا بكدر يعمل سلام والسلام ما بصير الا اذا احنا بنكون كويين مش اظعاف, والفصائل تشلها بما فيها حماس والجهاد وفتح لازم تتفك على برنامج مكاومة موحد مش برنامج اعتراف وتنازل للغولة واولادها غير هيذا علي الطلاك من اذراعي عمرنا ما بتكوم النا كايمة. وتشل هالحتشي اللي بنكال عن المصالحة عمره ما بصير وما رايحين نكول عنهم هذول اللي مجتمعين في الكاهره غير يا شايف الزول يا خايب الرجا. احنا بدنا مصالحة مش مصافحة وبوس الحا.
[ 29/05/2011 - 07:33 ص ]
الأسيرة أحلام التميمي
من الخطأ أن تحكم على الأسير الفلسطيني بالانغلاق عن الحياة ومتطلباتها حسب حكمه الصادر بحقه وأن ننظر إليه بعين الشفقة ولا نقدم له إلا عبارة ” صبرك الله وتحمّل ” ونهرب من التزاماتنا أمام كل أسير يوجب علينا صناعة السعادة له بكل أنواعها ..ولا ينفكّ العدو عن إغلاق كل سبل تواصل الأسير مع الخارج .. ولربما أننا سلّمنا لغاية العدو بدون وعي وأغلقنا على الأسير السبل المفتوحة أصلاً وليس للعدو يد بإغلاقها، فعندما يتوفر أكثر من خمسين محطة إذاعية في الوطن على سلم أولوياتها برامج التضامن مع الأسرى والتواصل المجتمعي، ولا تلتفتون لمثل هكذا برامج وتتوفر خدمة البريد للمراسلة ولا تلتفتون لهذه الخدمة وتتوفر الصحف المكتوبة ولا تلتفتون لها، إذن أنتم تغلقون على الأسرى سبل الانفتاح بانقطاعكم عن الإطلال عليهم عبرها ..وهذا يولّد مع تقدم سنيّ أسر الأسير قناعة أنه منسيّ من قبل المجتمع، ولا أحد يذكره مما يولّد عنده دعوة للانفراد الذاتي والعيش على أمل انتظار كلمة من أحدهم دليل أنه موجود ليرد عليها ويشعر بطعم الوجود ..إن واقع الأسير المرير كمرارة العلقم الذي تتجرعه ثم تقذفه لخارج فمك ليستمر طعمه طويلاً في الفم، والرتابة الدائمة في أيام حياة الأسير والأشخاص الدائمين أنفسهم من عائلته المطلين عليه بين الفينة والأخرى بسلام أو اطمئنان هي أمور لا تغيّر مرارة واقع الأسير بل وتزيده مرارة .وشعور الأسير بالوجود .. شعور الأسير أنه عنصر فاعل .. شعور الأسير أن أحدهم يحتاجه وأن هناك من يعتبر الأسير أمراً مهماً له .. هو الشعور الذي يجب أن نخلقه عند الأسير حتى نخرجه من حالة الشعور الدائم أنه شهيد مع وقف التنفيذ وأن الحياة مستمرة بدونك ..!!
والزواج هو السبيل الوحيد نحو خلق هذا الشعور عند الأسير .. بالزواج تقلب حياة الأسير كلياً، فالنفس البشرية بحاجة إلى الآخر دوماً الذي لا تكتمل إلا فيه، وبدونه يظل هناك نقص مهما حاول الأسير تعبئته لا يقدر أبداً ..إن حضور المرأة في واقع حياة الأسير مهم جداً .. إذ معها ترتسم الابتسامة الحقيقية على وجه الأسير ومعها تزوره الفراشات في قلب زنزانته وتحيلها إلى حديقة غنّاء، إذ تعتبر المرأة الزوجة هي ذات الزوج وأخوه، وللمرأة التي تعتبر ارتباطها بالأسير نوعاً من أنواع الجهاد في سبيل الله خصوصية عن باقي نساء الأرض في الوقت الذي يُعتبر المجتمع الفلسطيني هذا النوع من النساء وما تقدم عليه من ارتباط زوجي بالأسير ضرباً من الجنون، فإن ” غفران زامل ” ابنة مخيم العين بنابلس آمنت أن ارتباطها بالأسير ” حسن سلامة ” ابن غزة هاشم هو إحدى مراحل طريق الجهاد الطويل وأدخلت على زنزانة حسن الحياة .. وبددت ظلامها إلى نور وأضاءت حوله الشموع .. وشعر حسن سلامة أنه موجود حقيقة .. وأن هناك امرأة مسؤولة منه وأنه لأجلها سيواصل ولأجلها لن يسلم نفسه لرتابة المكان وقسوة الجدران وغاية السجان .
ما عاد حسن سلامة بعد ارتباطه بغفران يرى حوله إلا تلك المرأة التي للكلام معها طعم آخر … وللنظر إليها عبر الصور طعم آخر ولزيارة نغم كلماتها عبر الإذاعات طعم آخر أزاح مرارة العزل كما دفعه نحو الاستمرار كي يصل إلى النور الموجود آخر الممر ..بعد ارتباط حسن سلامة بغفران زامل أرسل إليّ قائلاً : ” أين كنت وأين وصلت يا أختي .. لقد ولدت مع غفران من جديد .. تاريخ ارتباطنا هو تاريخ ولادتي على الحياة .. والآن بدأت “يظن الأسير نفسه دوماَ أن المرأة لا تلتفت له وأنه ليس على مواصفات ومقاييس نساء اليوم، لذلك الأسرى النخبة لا يصلح لهم إلا نساء المجتمع النخبة، لأنهم أفضل الرجال وهنّ أفضل النساء، ولكن قليلات هنّ من يحملنَ زمام المبادرة وقليل من الأسرى من يملك جرأة الإقدام على هذه الخطوة التي تحتكم للعادات والتقاليد واحتمالية عدم الإفراج عن الأسير أو هجران المرأة لشريكها مستسلمة لقيود المجتمع وتقدم العمر الذي يقابله المجتمع بالكلام التقليدي الذي اعتدنا على سماعه..
وهنا أود القول : …إن مشروع ارتباط المرأة الموجودة خارج الأسر بالأسير هو مشروع على الأسير أن يدرك فيه أن عليه عدم تأجيله لأن الحياة يجب أن نعيشها بكل ما فيها، فأربعة جدران لا يجب أن تقعدك أيها الأسير مشلولاً، وعلى المرأة من جهة أخرى أن تدرك أن الارتباط بالأسير هو لله أولاً وآخراً نتائجه تفترض عدة احتمالات، إذ قد تطول مدة أسر الأسير فالارتباط غير مبني باشتراط الإفراج عن الأسير، فالارتباط هنا وقود يدعم الأسير للاستمرار حتى يقضي الله أمراً كان مفعولاً، فإن أفرِج عنه اكتملت الحياة الزوجية وإن لم يُفرج عنه يجب أن يستمر التواصل .
والاحتمال الآخر أن يخرج الأسير ويُغتال أو أن يؤسر من جديد، وهنا على المرأة أن تدرك أن حياة الأسير تحتمل كل السيناريوهات، وهي يجب ان تكون سيدة موقف وصاحبة مبدأ ..والاحتمال الآخر وهو المهم أن يتقدم عمر المرأة التي آثرت الارتباط بالأسير لإيمانها بهذا المشروع الرباني، أن سنوات انتظارها لتحرر زوجها جعلتها غير قادرة على الإنجاب وهذا أصعب احتمال، إذ سيتعرض الاثنين إلى ضغوطات عائلية ومجتمعية لا ترحم، وهنا عليهما اتخاذ القرار المناسب إما باكتفاء الذات بالذات وإما أن يتزوج الأسير أخرى بغرض الإنجاب، وهنا على المرأة المجاهدة أن لا ترفض الأمر لأن أساس ارتباطها من البداية هو ارتباط غير مشروط وأي شرط فيه يفقده خصوصية الجهاد في سبيل الله ونيل رضاه عن طريق إسعاد أسير مجاهد في سبيل الله ..
وهذه هي غفران زامل صاحبة المبدأ الحق .. عاشقة الحسن .. المنتظرة لحظة التوحد ضربت بعصاها السحرية الأرض فانشق النور من عزل حسن سلامة وتفجرت ينابيع روت ظمأه فاخضر عوده وأورقت دنياه ..يا ليت كل النساء غفران زامل .. ويا ليت كل الأسرى حسن سلامة .. هكذا ننتصر على واقعنا ويعلم العدو أن لا شيء يشلّنا عن مزاولة حياتنا مهما دبّر وخطّط..كل النساء تنحني أمام روعة شخصك الكريم يا غفران .. وأنا في أسري واحدة منهنّ أنحني احتراماً وتقديراً للفكر والمبدأ الذي تحملين .. طوبى لك وطوبى لزوجك الحسن، هذا الأسير الذي اصطادك يا سيدة اللبؤات .. ظلي شاخصة الأبصار نحوه وسيظل شاخص البصر نحوك، فنور الله يحيطكما وعين الله تحرسكما ..ولتحذو كل فتاة حذو عفران حتى نصنع للأسرى السعادة الحقيقية فعلاً لا قولاً .. ويكابر الأسير على نفسه ويظلمها إن ادّعى أن المرأة الحبيبة غير مهمة في واقع حياته ..فاسألوا الحسن .. واسألوا نزار .. واسألوا وليد دقة .. واسألوا حسام شاهين .. واسألوا هيثم صالحية .. وغيرهم …ماذا صنعت لهم حواء وكيف أن حبها أوصلهم إلى حد الهذيان .. فنسوا معهنّ السجن والسجان ..
ـــــــــــ
مركز أحرار لدراسات الأسرى وحقوق الإنسان
بكول وفي تشل جرأة اني اول مرة بسمع في بشكير ستان بعد زيارة الرئيس ابو مازن عليها ومعاة وفد صحفي على راسهم حسنين هيكل الفلسطيني اللي كتب عن المسلمين في بشكير ستان وعن العسل واحجار الزمرد في هالبلد المسلمة وطيبة اهلها , وتشيف همة مسلمين وطيبين , طبعا المقال لولا اشوي تشان صرت افتشرها هاذي جزء من فلسطين التاريخية واحنا ناسينها , بس الفظل برجع للاخ الرئيس ابو مازن اللي اكتشفها وعرفنا عليها و حتى في الامرية انة فيها طلاب من الظفة الغربية بقروا فيها طب ولو انها شهادات الطب مش معترف فيها من كبل دول العالم ( من دول الكتلة الشرقية سابقا),بس بهمش المهم انهم ولادنا عايشين هناك وبكروا حتى لو ما حدا اعترف في شهادتهم , زيهم زي دولتنا اللي صرنا معلنين عنها اتشر من خمس مرات وما حدا معترف فيها الى اتشم دولة ما حدا اكتشفهم الا ابو مازن ومرافقة هيكل . وبيجي يكلي حققنا انتصارات وهمية زيها زي انتصارات الانترنت , الرئيس مدشر شعبنا تحت القصف اللي نازل علية زي رش المطر وهو رايح على بلاد العسل والاحجار الكريمة الحلوة , المصدي نتن ياهو كبل اتشم يوم لما صارت عملية الكدس وانكتلت فية مرة وكف في المطار وكال انة بدة يلغي رحلتة على روسيا , وكعد في المطار ايجعر ويكول بدة يظرب بيد من حديد على الفلسطينية , اما اللي بكول عن حالة رئيس للشعب الفلسطيني ما فتح ثمة في تتسلمة وحدة على اتشر من عشر شهدا سكطوا في غزة , وراح كمل رحلتة وتشيف وانبسط وشم الهوا , دشر شعبنا مكسوم والشباب بطالبوا في انهاء الانكسام , دشرهم وراح على حساب انه هو كدم اللي علية وودالهم اتشم ارغيف فلافل على المناره على اعتبار انة متظامن معهم , والله يخلف عليك ويعطيك تيرظيك يا سيادة الرئيس , ومبروتشة عليك الدكتوراه الفخرية اللي اعطوك اياها في بشكير ستان وان شاء الله الشهادة الجاية بتكون من منشفة ستان .
كالو لفرعون شو اللي فرعنك ؟ كلهم ما لكيتش حدا ايرودني .
في تشل وكاحة وما في بعدها وكاحة, اليوم خبر عباس الكباس اللي بيتهم حالة انة رئيس للشعب الفلسطيني وللسلطة الفلسطينية ولمنظمة التحرير الفلسطينية ( مش عارف إنا تحرير شو يعني )ومش ظايل علية يكول إلا أنة هو أبو الشعب الفلسطيني زى ما بكا يكول المعزول البهلول حسني باراك الخبر بكول أنة عباس الكباس عمل مكابلة مع راديو الغولة. وبكول فية عباس الكباس انة مستعد يكاوم أي انتفاظة ثالثة في الكوة وأنة لو بعرف عن عملية كتل المستوطن واولادة في المستوطنة اللي جنب نابلس ,تشان مستش الكاتل وبكول انة مستعد يتعاون مع الغولة مشان يسمتشو اللي كتل ,بكول الزلمة أنة بتشى وعيط حسرة على المستوطنين وكلبة حنين يا كبرت أهلة , طبعا أحنا ما بهمنا خبر كتل المستوطنين لاننا أحنا أصلا ما إلنا دخل في الموضوع لا من كريب ولا من بعيد والمسئول عن هذا الكتل هي الغولة نفسها تشيف ما انلفها وانجيبها الاحتلال هو المسئول الأول والأخير وإحنا هذا مش شغلنا لا اندين ولا انأيد عملية كتل من هذا النوع ,لان الثورة الفلسطينية في تاريخها ورغم كل اجرام إسرائيل ضدنا , احنا ما بنسوي شغلات من هالنوع.بس اللي اخطر من هاي العملية تشلها تصريحات عباس الكباس اللي فيها بكول بتشل صراحة انة هو بشتغل اتشر من إسرائيل نفسها على امنها وبكول انة مستعد يكتل أي فلسطيني بفتشر انة يعمل انتفاضة ثالثة ضد اسرائيل, عباس الكباس في مكابلتة ما كال ولا تشلمة عن اللي بسوة المستوطنين تشل يوم في كتل الفلسطينيين ولا مصادرة اراظيهم ولا الهجوم على الكرى الفلسطينية وحرك السيارات والمزروعات الفلسطينية , والكباس نسي التحريض اللي عملة النتن ياهو على الفلسطينية ونسي انة اللي بسوة المستوطنين تشل يوم بكون تحت حراسة جيش الغولة , يعني الزلمة في تشل وكاحة بكول للشعب الفلسطيني طز فيشتم وطز في شهادئشتم وطز في طز في طز في تشل اشي لة علاكة فيشتم انا رئيستشم وبفهم اتشر منتشم واللي بدة يرفع راسة بدي اخبط في بطنة والعن اللي طركة . اتشثر أشي بظحتش في المكابلة برجع عباس الكباس بكول انة مش راح يستنى أي فلسطيني يكلة الشعب بدة إسقاط الرئيس , وراح يكول باي باي ,الزلمة مسدك حالة انة رئيس وبدة الشعب يكلة فليسكط الرئيس , يا عمي إنا بكلك من هالكيتة فلتسكط وانا كفلسطيني بدي اسكاطك لانك مش رئيس منتخب واللي انتخبوك أنت عارف مين همة , والشعب بدة اسكاطك وراح يسكطك مش بطريكة محترمة , بطريكة تليك فيك لاني انا كفلسطيني وكل فلسطيني عنده دم ما بشرفة انك تكون رئيس إلنا , وأنت مكامك بعد اللي كلتة لاذاعة الغولة انك تروح تحاول تصير رئيس هناك عند الغولة مع إنهم مش راح يكبلوك ولكن لعل وعسى يكلولوك تراي اغين لانا أحنا بنكلك غيم أوفر وحل عن سمانا, نصيحة ببلاش ,تتبهدل اتشر ما انت مبهدل , وبكلك إن اللي حواليك بظحجو عليك ومش راح ينفعوك لما تكع الواكعة وراح يتخلوا عندك وكتها مش راح ينفع الندم .
والله أشي حلو انا نسوي زي باكي دول العالم ونعمل مثلنا مثل تشل الناس لان اصلاً احنا في تراثنا وفي تاريخا العربي الاصيل , اه بكول الاصيل مش التاريخ المخربش والي غير تشل حالنا , اول من احترم المرة واعتبرها شريكة في تشل اشي وحافظ عليها وبعتبرها اغلى شي في الدنيا , في هذا اليوم يوم المرة العالمي انا بكول لتشل النسوان في العالم .تشل سنة وانتن بخير , والمرة الفلسطينية تاج راسنا امنا واختنا وزوجتنا وعمتنا وخالتنا وستنا , تشل سنة وانتن طيبات يا ربي ,بس في هاي المناسبة انا بدي اكول شغلة ان احترام المرة والحفاظ عليها لازم يكون واجب دايما مش بس في يوم المرة العالمي لان المرة هي مش بس نص المجتمع , هي تشل المجتمع لانة بصراحة بدونها احنا ما بنسوى اشي , وبعدين المرة في حياتنا زي الوردة ما بنكدر نعيش بلاها يا عمي , طيب يعني بتخلف وبتربي وبتهتم في تشل اصغيرة واتشبيرة في حياتنا , ودايما شايلة همنا في الحرب والسلم , شايلة همنا لما بنروح الدار ولما بنطلع من الدار , قلبها دايماً علينا , على الاكل لازم نعطيها اشي مكابل اللي بتعملة شوية احترام . لا تنسوا ان الرسول علية الصلاة والسلام لما بلش الدعوة الاسلامية كان معاة سبعة وعشرين مرة الوحدة منهن احسن من الف رجل , والمرة في شعبنا الفلسطيني شاركت وبتشارك جنب على جنب مع الزلمة الفلسطيني , يعني في المختصر المفيد بدون ما اكعد اعدد عن المرة , لازم تشل الناس تعرف انة لولا المرة ما في زلمة بعيش , وانا مني وعلي بكول ان مهما اعملنا ومهما كلنا عن المرة اللي زي الروح في الجسم ما بنكدر نعطيها حكها , وتشل سنة وانتي بخير يا روحي ,وربي يخليكي وردة بتنور حياتنا ,وردة عمرها ما تذبل يا رب العالمين .
