نصائح وارشادات للسياحة في اسطنبول

1-      لا تذهب لزيارة اسطنبول في شهر سبعة بسبب الجو الحار جداً والاسعار الغالية.

2-      تركبش التاكسي الا في الحالات الاضطرارية لإنه التكسي بيعد عليك دولار امريكي كل دقيقة سواقة.

3-      استخدم المترو والترام لتنقلاتك، الترام بشبه المترو بس الفرق انه الترام بيكون عبارة عن قطعتين بس بينما المترو بكون اربع او خمس قطع، والمترو بيكون تحت الارض والترام فوق الارض.

4-      ليش انا بقلكم تستخدموا المترو والترام؟ عشان اول شي بتعيشوا الحياة متل الاتراك وبتتنقلوا بينهم وبتختبروا البلد على حقيقتها.

5-      غير هيك كمان، تذكرة المترو او الترام 1.75 ليرة تركية يعني تقريبا دولار واحد، دولار واحد بس من اي محطة لاي محطة اخرى.

6-      غالبا رح تركب ترام لانه هو اللي بيوصل بين منطقة تقسيم – محطة كاراكوي- ومنطقة البلدة القديمة – محطة سلطان احمد-

7-      اوعك تفكر انه في واحد على باب الترام بياخد منك مصاري ولا بيقطعلك تزاكر، لا، في كابينة متل كابينة التلفون العمومي بتكون عند المحطة بتحط فيها المصاري وبتاخد منها “توكن” لونها حمرة، وبتحط التوكن في بوابة الدخول فبتفتحلك وبتدخل تستنى الترام لييجي.

8-      لما تكون في شارع الاستقلال في منكقة تقسي وبدك تروح على محطة الترام مشان تروح على البلدة القديمة مثلا، بتضلك ماشي لاخر اخر شارع الاستقلال بتوصل نزلة سحيقة وبعدين شارع رئيسي، هناك بتشوف محطة – كاراكوي- ، اذا حسيت حالك مش مندل اسأل اي واحد تركي مستخدما كلمة واحدة ” ترام فاي” وهو رح يدلك بالاشارات.

9-      اوعك تسجل باي رحلة سياحية مع الشركات اللي هناك او مع الشركة اللي بتحجز عندها لانهم بيربحوا عليك كثير.

10-   اذا بدك تروح على جزيرة الاميرات مثلا، بتركب الترام، وبتنزل في اخر محطة واللي اسمها – كابتاش – بتنزل من الترام وبتروح للشط مباشرة بتلاقي في شبابيك ببيعوا تذاكر لجزر الاميرات، التذكرة للشخص الواحد خمس ليرات، ولما بدك تروح بتروح محل منزلت بالزبط في الجزر وبتشتري كمان تذكرة، يعني كمان خمس ليرات، بيطلع المجموع 10 ليرات، و 3 ليرات ونص للترام رايح جاي هي 13.5 ليرة، واذا بدك تعيش الجو في الجزر بتركب حنطور – لانه فش سيارات هناك والحنطور جزء من ثقافتهم – اذا بتكونوا اتنين بتركبوا عشر دقايق بعشرين ليرة، يعني عشرة عالواحد، هيك المجموع بيطلع 23.5 ليرة عالواحد، يعني 14 دولار، بتعرفوا قديش الشركات السياحية بياخدوا عالواحد؟ 60 دولار.

11-   ضروري انك تروح طلعة مضيق البسفور على السفينة، نفس الاشي من نفس المحل اللي طلعت منه على جزر الاميرات بتطلع طلعة البسفور. طبعا لما نقول تزاكر احنا بكون قصدنا تزاكر بواخر مش باصات.

12-   في البلدة القديمة لازم تروح على الجامع الازرق والمعروف ب سلطان احمد، لازم تروح على متحف ايا صوفيا، ولازم تروح على توب كابي.

13-   اسأل عن جامع السليمانية وروح شوفه، هاد الجامع رهيب، في معماري اسمه سنان كان على زمان الدولة العثمانية، بنى 400 منشأة معمارية، جامع السليمانية عاد يعتبر الماستر بيس اله يعني افخم اشي بناه، المسجد ضد الزلازل طبعا.

14-   لازم تروحوا على دوار تقسيم وترشوا للحمام اكل، كاسة الحبوب تاع الحمام بليرة تركي، حلو تتصوروا مع الحمام وهو طاير.

15-   لازم تروحوا على شارع الاستقلا ويفضل بالليل، كلوا كستنا مشوية وكلوا بوظة تركية، وشوفوا كيف تاع البوظة بتخوت عالناس هناك وبجننهم – رح تفهموا قصجي بس تروحوا.

16-   اذا حابين تشتروا اشي بالجملة روحوا على منطقة “لالي” برضوا هاي المنطقة ممتازة للتسوق الفردي، لانها رخيصة والناس هناك كثير بيحكوا عربي، برضه منطقة اكسراي نفس الاشي منيحة للتسوق.

17-   اول متوصل هناك المنطقة القدية دور على واحد ببيع كتب عن اسطنبول، بكون مبسط او بلف بين الناس، اشتري منه كتاب اسطنبول بالعربي، رح يطلب 37 ليرة، بس تعطيهوش اكتر من 12 ليرة، هاد الكتاب اقرا فيه عن كل المناطق الاثرية مشان لما تروح عليها متكونش متل االهبل ومش فاهم اشي.

18-   ضروري يكون معك خارطة لاسطنبول، ويكون معك خط سير المترو والترام.

سأقوم باضافة صور وتحديثات عندما احصل على مزيد من الوقت

Be Sociable, Share!