يوليو
23
كتب الاخ اياس قاسم .. اقرأوها للنهاية !
صباح الخير دولة رئيس الوزراء،،،
إن شاء الله يكون الوطن وانت بخير!
دولتك انا عندي رضيعة عمرها سنة و٨ شهور، لما تجوع وبدها حليب شو اعمل؟
دولتك اقرألها مقاطع من بيان اللجنة المركزية او بيان اللجنة التنفيذية عشان ترضع حب الوطن وحليب الصمود!
والا أتلو امامها بيانات بعض فصائل منظمة التحرير اللي غالبا بتكون نسخ ولصق عن بعض حتى بالاخطاء نفسها حول التضحية من اجل الوطن والجوع في سبيل الحرية!
والا أسمعها مقاطع من خطابات أصحاب المعالي والسعادة حول الصبر على طريق التحرير، تخيل دولتك ناس شبعانة ومصابة بالتخمة بتحث جوعانين على الجوع من اجل الوطن!
والا اسمعها أغاني ثورية وطنية عشان تتعفر بتراب الوطن!
او ممكن احكيلها قصص عن التضحيات في سبيل نيل الحرية وتحقيق الاستقلال.
او ممكن اسمعها شوية شعارات دينية مهو ركوب متن الدين افضل طريقة لتخدير آلام الجوع؛ باعتبار انه جوعنا في سبيل الله ومن اجل الوطن!
دولتك،،،
لما ييجي صاحب البيت اللي انا ساكنه يطلب اجرة البيت؛ شو احكيله؛ اوقف قدامه وقفة عسكرية واغنيله السلام الوطني: مــوطــنــي، مــوطــنــي
الجـلال والجـمال والســناء والبهاء
فـــي ربــاك، فــي ربـــاك
والحـياة والنـجاة والهـناء والرجـاء.
دولتك لما بدي اشتري ربطة خبز، وما معي ادفعله شو اعمل؟ اغنيله مقطع من ازرع زيتون ازرع ليمون ازرع تفاح!
دولتك،،،،
شركات الكهربا والمي اللي ناهبة البلد لما تيجي تقطع عني الخدمات، شو اعمل، اوزع عليها دعوات للمشاركة في المؤتمرات الوطنية للتعبير عن حب الوطن والموت في سبيله!!!
دولتك،،،
ليه كل ازمة بتعصف بهالوطن -وما اكثر أزماته- لازم يدفع ثمنها الموظف الغلبان والا العامل المسكين، ليه ما نشوف اصحاب الامتيازات معنا في نفس خندق المعاناة!
دولتك؛؛؛
احنا الموظفين رواتبنا يا دوب تكفي لنص الشهر لانه كل شي بيرتفع سعره عندنا الا الانسان؛ وراتبه بدل شحدة فقط! وفوق كل هاذ مطلوب منا نلتزم بالدوام! طب كيف؟! كيف ندفع للمواصلات؟ من وين ندفع ثمن محروقات؟ كيف ومن وين؟
“لن نقايض حقوقنا الوطنية بالمال” حلو الكلام؛ لكنْ دولتك اموال المقاصة حقنا ليه نرفض استلامها، ثم احنا لما رحنا وقعنا اتفاق باريس الاقتصادي؛ ووافقنا انها اسرائيل تستلم مفاتيح كل الابواب؛ ما حسبنا حساب انه رح ييجي يوم تسكر علينا وقت ما بدها وتفتح على مزاجها؛ واحنا لا نملك الا اللطم وتجويع الموظف في سبيل الحفاظ على منجزات السلطة الوطنية!
واذا طالبنا براتبنا اللي هوي حقنا الطبيعي والقانوني والانساني، بنصير “طابور خامس”؛ طيب ليه خامس تحديدا، مش رابع او سادس، او بنصير لا بارك الله فينا!
دولتك؛؛؛
الناس اللي بطالبوا فينا نجوع من اجل الوطن؛ امتيازاتهم بتعيشنا، ونثرياتهم بتشبعنا، بتنقلوا بمواكب، فواتيرهم مدفوعة، سفرياتهم مغطية، إجارات بيوتهم مدفوعة او هي ملك؛ يعني بالعربي مش محتاج الراتب ويمكن يصبروا سنة بدون رواتب مش فارقة عليهم، وبالآخر بيجوا يطالبونا بالجوع عشان الوطن يشبع، والسهر عشان الوطن ينام قرير العين، والموت عشان الوطن يعيش، عفوا مين هو الوطن؟! وايش يعني وطن!
“انتو بدكو وطن والا مصاري”، دولتك احنا بدنا وطن نعيش فيه، مش ننذل فيه امام العوز والحاجة!
دولتك طفلتي ما اقتنعت بكل الشعارات والتصريحات والمؤتمرات والاغاني الوطنية والثورية، بدها حليب عشان تقدر تعيش بهالوطن!
على فكرة،، دولتك،،،، بنتي اسمها سيليا، الاسم اسباني معناه الجنة، يا ترى وطنا ح يصير جنة، بعد هالمعاناة والا اطفالنا ح يكونوا من طيور الجنة في سبيل الوطن!
181Nafe Hasan, Rami Walweel and 179 others
76 Comments
45 Shares
Like
Comment

Share

 

Be Sociable, Share!
أضف تعليقك

You must be logged in to post a comment.