بِلادك الّلي عايش أنت فيها
لو بْدمّك ضروري أن تفيها
ولا تهتم يوماً إن تفيها
غدر بالشعب أو خان التراب

شعبنا اللي عليه عثرات شو مَر
شرب قهر وظلم من كاس شو ُمر
ومثل ما فاح باب الواد شومر
راح يفوح النصر من كل باب

أنا اللي برسم امْربّع بفرجار
كريم ومِن جِواري ما بفرّ جار
وأنا قلمي إذا مرّة بِفور جرّ
ملوك الشعر وأمراء العتاااب

نسرنا الـْ كان في العالي برخرخ
فقس عصفور مطرح ما برخ رخ
لأنو الأخ فينا ما برّ أخ ، رخـ..
..ـصلو وما غِلي بعين الاغراب

أناني وصار هدفي إنشقاقي
بعد ما كنت أجاهد إن شقاقي
نده للحرب وقاللي إنْ شي قاقي
ترى بلون اليهـ.ود ارجم لهب

وَجَعني الرّاس جابولي دَوا مُرّ
وقالولي كل ما راسك دَوى مُرّ
عَ بيت اصفيح مدعوم بْ دَوامِر
هداة البال مش قصر وذهب

إلي لون وْ فِ شِعري بَنطي لوني
وبَظل مُزهر ولو بالْبُن طَلوني
تراثي رغمْ إنّو بَنطلوني
بلا القمباز ما بيسوى جراب