الدّيار الّلي مَ تِلْقِي أُنْسْ فيها
بِكُـل عَــزْم وْإرادة إنسِفيها
وَ رُدِّي الصّاع صاعين إنْ سَفيها
أسـاءَ الفِعـل أو قلّ الأدَب

إذا اتّحدوا الجماعة بِالقَوائم
صَلاتك قيم فيها وْبِالقُوَى إِمّ
وْإذا عمّك وخالك بَلْقى و أُمّ
يصوتوا لي سيكتمل النصاب

بعِد ما شِرِب من هذي القناة طير
صار الحَب في بلادي قناطير
عَ مصر العرب لَشُبْرا وقِنا طِير
لعل النيل يرجع للعرب

وَجاهات وْبِلوحوا في المسابح
ما بيمونوا على اولاد المسابح
لإيدك مِن رَجاهم في المسا بِحّ
لأنّ الشّور لأمّات الكعاب

كُنّا نِحلَم نْعَلّي بِنَجمات
لكن هالأمل تحت الـْ بَنِج مات
وبعد ما السبع فِ الغابة بنى اجمات
أجا هالكلب يعمل ملك غاب

إذا بَطلُب مِلِح قال لي ما عِنّاش
وإذا بَطلُب معونة ما أعنّاش
وإذا شَمشَم وَليمتنا مع النّش
مِثِل لِبْساس أجا يُطلب كباب

سقى الله دارنا الـْ كانت غُرُفتين
وعشانا فْتيت ولعَدَسِك غَرَفتين
ومِنِ الجِفْتات ومن حطبِك غَرِفتين
تخلّي النار توصل للسحاب

عَ باب الدار لازرعلِك عِشِبتين
مِنِ النعنع وحَضّر لِك عَشا بْتين
لو إني أروح عَ شُقبا وْعَ شِبتين
رح ارجع لِك ولو طال الغياب

فيه مِن ناس في العتمة بَدِرهُم
يشعشع نور لو مرّة بَدَر هَـم
وفي من ناس لا يُشرَى بِدِرهم
لئيم ولا يُعدّ مْن الصّحااااااب

بحِب الشاي والنعنع عَ شايي
وْقنوع ولو خبز حافي عشايي
وْبعيد النظر رغم انو عشايي
ضرب عيني المليحة والاعصاب
#صباح_الهير_للجميع