سبتمبر
18
في 18-09-2019
تحت تصنيف (Uncategorized) بواسطة a1b2

مساء الخير يا أهل القرايا
….مساء الفرح والتين الاخضاري
ورزق الربّ عَ قدر النوايا
…. وصحن التين أحلى من المصاري
وصديقي اللي غمرنا بالهدايا
…….يعمّ الخير في داره وداري
والازراقي اللي أشهى من (البابايا)
…. بذكّرني فِ تينات الشراري
والابياضي عسل يروي حَكايا
…. وكرْم التين أحسن من (فِيراري)
والاعداسي اللي بيحكي عن قضايا
…….مساطيح الفرح في كرم جاري
وعجلوني مثل خد الصبايا
….. إذا ما بفغمه بتشيط ناري
الخُرُطْمَاني اللي خلانا ضحايا
…. بخلّي الكهل يصبح أسد ضاري
للاعناقي والاحماضي خفايا
…. بيكشف سرّها التين الشّنَاري
والاشحامي من الله أحسن عطايا
…. كطعم الشهد في الشريان ساري
والاموازي ولا كنافة أباظة
… والاسوادي المشطب والاصفاري
….
…شعر: عقبة فالح طه
2018/8/17